ຂປລ. ແຫລ່ງຂ່າວຈາກ ເມືອງປາກລາຍ ແຂວງໄຊຍະບູລີ ໃຫ້ຮູ້ວ່າ: ເມື່ອບໍ່ດົນມານີ້, ອົງການກາແດງແຫ່ງຊາດລາວ ຮ່ວມກັບອົງການກາແດງເມືອງ, ຫ້ອງການ ແຮງງານ ແລະ ສະຫວັດດີການສັງຄົມ ແລະ ອົງການປົກຄອງເມືອງປາກລາຍ ໄດ້ລົງຢ້ຽມຢາມ ແລະ ມອບເຄື່ອງຊ່ວຍເຫລືອບັນເທາທຸກ ໃຫ້ຄອບຄົວຜູ້ທີ່ຖືກຜົນກະທົບຈາກພະຍຸມູລານ ປະກອບມີ: ເຂົ້າສານໜຽວ, ໝີ່, ປ່ອງປາ ແລະ ເຄື່ອງໃຊ້ຈຳນວນໜຶ່ງ, ລວມມູນຄ່າ 80 ລ້ານກວ່າກີບ.
ພະຍຸມູລານ ເຮັດໃຫ້ນໍ້າຫ້ວຍຫລາຍສາຍ ໄຫລນອງ, ຖ້ວມເຮືອນຊານ, ທີ່ດິນທໍາການຜະລິດ, ໜອງປາ, ພາຫານະຮັບໃຊ້ ແລະ ສັດລ້ຽງຂອງປະຊາຊົນ ແລະ ສໍານັກງານຂອງລັດ ຢູ່ເຂດບຸ່ງມາ-ຕາກແດດ, ເຂດບວມເລົ່າ-ຜາແກ້ວ, ເຂດເທສະບານເມືອງ ແລະ ເຂດຫາດດ້າຍໂພນງາມ ເມືອງປາກລາຍ ໄດ້ຮັບຜົນກະທົບ ຈໍານວນ 12 ບ້ານ, ມີ 279 ຄອບຄົວ, ລວມມູນຄ່າເສຍຫາຍທັງໝົດ 3,1 ຕື້ກວ່າກີບ.
ໂອກາດນີ້, ຄະນະທີມງານດັ່ງກ່າວ ກໍໄດ້ນຳເອົາເຄື່ອງຊ່ວຍເຫລືອ ໄປແຈກຢາຍໃຫ້ປະຊາຊົນທີ່ໄດ້ຮັບຜົນກະທົບຢ່າງທົ່ວເຖິງ. ພ້ອມນີ້, ກໍຕ້ອງໄດ້ພ້ອມກັນສືບຕໍ່ເຝົ້າລະວັງໄພ ພິບັດທີ່ອາດຈະເກີດຂຶ້ນ, ທັງວາງແຜນການຮັບມື, ເອົາໃຈໃສ່ຕິດຕາມຂ່າວສານ, ແຈ້ງການຂອງກົມອຸຕຸນິຍົມ ແລະ ອຸທົກກະສາດ ລາຍງານໃຫ້ເປັນປົກກະຕິ.
#Medialaos MMD
