ໃນວັນທີ 22 ສິງຫາ ຜ່ານມາ ທີ່ນະຄອນຫຼວງຮ່າໂນ້ຍ ສສ ຫວຽດນາມ, ສະຫາຍ ໄຊຊະນະ ໂຄດພູທອນ ກໍາມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ໄດ້ນຳພາຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ເຂົ້າຮ່ວມກອງປະຊຸມພົບປະສອງຝ່າຍກັບອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ຊຶ່ງນຳໂດຍ ສະຫາຍ ເລມິງ ຈີ ກໍາມະການສູນກາງພັກກອມມູນິດ ຫວຽດນາມ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ.
ກອງປະຊຸມໃນຄັ້ງນີ້ສອງຝ່າຍ ໄດ້ແຈ້ງໃຫ້ກັນຊາບກ່ຽວກັບບົດບາດ ແລະ ໜ້າທີ່ວຽກງານຂອງຕົນທີ່ຮັບຜິດຊອບໄລຍະຜ່ານມາໃຫ້ກັນຊາບ ແລະ ສະຫຼຸບຕີລາຄາຄືນຜົນສຳເລັດໃນການຈັດຕັ້ງປະຕິບັດບົດບັນທຶກຮ່ວມມືກັນໄລຍະຜ່ານມາ ແລະ ພ້ອມກັນປຶກສາຫາລືຮ່ວມມືກັນໃນຕໍ່ໜ້າ.; ສອງຝ່າຍໄດ້ເປັນເອກະພາບ ກັນກ່ຽວກັບການຈັດກິດຈະກໍາຮ່ວມກັນ ເພື່ອເປັນການສະເຫຼີມສະຫຼອງ “ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ”.
ຕະຫຼອດໄລຍະທີ່ຜ່ານມາ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ ແລະ ພັກກອມມູນິດຫວຽດນາມ ເວົ້າລວມ ເວົ້າສະເພາະ ຄະນະພັກ-ຄະນະນໍາອົງການໄອຍະການປະຊາຊົນ ຂອງສອງປະເທດມີການພົວພັນຮ່ວມມືກັນ ມີຄວາມເຕີບໃຫຍ່ເຂັ້ມແຂງ ແລະ ເຂົ້າສູ່ລວງເລິກຢ່າງບໍ່ຢຸດຢັ້ງ, ປະກອບສ່ວນສໍາຄັນເຂົ້າໃນການພັດທະນາວຽກງານໄອຍະການປະຊາຊົນ ກໍຄື ການພົວພັນລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ອ້າຍນ້ອງ ຢ່າງໜັກແໜ້ນ. ເພື່ອເປັນພື້ນຖານໃຫ້ແກ່ການຮ່ວມມືກັນຢ່າງມີປະສິດທິຜົນໃນຕໍ່ໜ້າ, ສອງຝ່າຍໄດ້ລົງນາມບົດບັນທຶກຊ່ວຍຈຳສະບັບໃໝ່ດັ່ງນີ້: ໂດຍສຸມໃສ່ການແລກປ່ຽນຄະນະຜູ້ແທນຂັ້ນສູງ, ຜູ້ແທນຂັ້ນວິຊາການ, ການຖອດຖອນບົດຮຽນ ກ່ຽວກັບການດໍາເນີນຄະດີປົກຄອງ ແລະ ບົດບາດ ຂອງອົງການໄອຍະການປະຊາຊົນ, ການຮ່ວມມືທາງອາຍາ, ການປະຈຳຄ້າຍຄຸມຂັງຂອງພະນັກງານໄອຍະການປະຊາຊົນ, ການຂຽນຄຳຖະແຫຼງ ແລະ ການເຂົ້າຮ່ວມປະຊຸມສານຂອງ ພະນັກງານໄອຍະການປະຊາຊົນ, ການກໍ່ສ້າງພະນັກງານໄອຍະການປະຊາຊົນ, ການຮ່ວມມື ລະຫວ່າງ ອົງການໄອຍະການປະຊາຊົນທ້ອງຖິ່ນທີ່ມີຊາຍແດນຕິດຈອດກັນ ແລະ ວຽກງານອື່ນ ທີ່ສອງຝ່າຍໃຫ້ຄວາມສົນໃຈ ຊຶ່ງຈະປະກອບສ່ວນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ – ຫວຽດນາມ, ຫວຽດນາມ-ລາວ ເວົ້າລວມ, ການພົວພັນ-ຮ່ວມມື ລະຫວ່າງ ອົງການໄອຍະການປະຊາຊົນ ແຫ່ງ ສປປ ລາວ ແລະ ອົງການໄອຍະການປະຊາຊົນ ແຫ່ງ ສສ ຫວຽດນາມ ເວົ້າສະເພາະ ໃຫ້ນັບມື້ກ້າວສູ່ລວງ ເລິກ, ມີຜົນສຳເລັດໃຫຍ່ຫຼວງກວ່າເກົ່າ ແລະ ໝັ້ນຄົງຂະໜົງແກ່ນຊົ່ວກາລະນາ, ເພີ່ມທະວີການຮ່ວມມືທາງດ້ານກົດໝາຍ, ຕ້ານອາຊະຍາກໍາຂ້າມຊາດ, ເຮັດໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ ຈະເລີນກ້າວໜ້າຢ່າງບໍ່ຢຸດຢັ້ງ ຕາມທິດສັງຄົມນິຍົມ.
ຮ່ວມລົງນາມໃນຄັ້ງນີ້ລະຫວ່າງ ສະຫາຍ ໄຊຊະນະ ໂຄດພູທອນ ແລະ ສະຫາຍ ເລມິງ ຈີ ໂດຍມີຄະນະຜູ້ແທນທັງສອງຝ່າຍເຂົ້າຮ່ວມ. ໃນການເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສສ ຫວຽດນາມຂອງຄະນະຜູ້ແທນ ອົງການໄອຍະການປະຊາຊົນສູງສຸດ ຍັງໄດ້ເຂົ້າຢ້ຽມຂໍ່ານັບ ການນຳຂັ້ນສູງຂອງ ສສ ຫຽດນາມ ຕື່ມອີກ.
ຂ່າວ-ພາບ: ອານຸສັກ ກວາງວັນ
