ແມນເຊັສເຕີ ຢູໄນເຕັດ ຫຼິ້ນໄດ້ຢ່າງສຸດຍອດ ເຖິງແມ່ນຈະມີຫວາດສຽງໄລຍະທ້າຍເກມ ກ່ອນເປີດຖິ່ນເອົາຊະນະ ລິເວີພູລ ແບບຫວຸດຫວິດ 2-1 ໃນເກມສີແດງທີ່ຮ້ອນແຮງ ຍັດຄືນຄືນວັນຈັນ ຄວ້າ 3 ຄະແນນທຳອິດໃນ ພຣີເມຍລີກ ໄດ້ສຳເລັດ.
ການແຂ່ງຂັນບານເຕະ ພຣີເມຍລີກ ອັງກິດ ລະດູການ 2022/23 ເມື່ອຄືນວັນຈັນທີ 22 ສິງຫາ 2022 ເປັນເກມສີແດງທີ່ຮ້ອນແຮງໃນການແຂ່ງຂັນຄືນວັນຈັນ ແມນເຊັສເຕີ ຢູໄນເຕັດ ເປີດສະໜາມ ໂອລ ແທຣບຟອດ ຕ້ອນຮັບການມາຢາມຂອງ ລິເວີພູລ.
ເອຣິກ ເທນ ຮາກ ຜູ້ຈັດການຊາວໂຮນລັງ ມື້ນີ້ຕັດສິນໃຈພັກ ແຮຣີ ແມັກກວັຍ ກອງຫຼັງຫົວໜ້າທີມເປັນຕົວສຳຮອງ ໂດຍສົ່ງ ຣາຟາເອວ ວາຣານ ຈັບຄູ່ກອງຫຼັງກັບ ລິຊານໂດຣ ມາຕິນເນສ ສ່ວນກອງໜ້າ ຄຣິສເຕຍໂນ ໂຣນັນໂດ ນັ່ງເທິງຕັ່ງສໍາຮອງເຊັ່ນດຽວກັນ ແລະ ໃຊ້ ອັນໂຕນີ ອີແລງກາ, ມາຄັສ ແຣຊຟອດ ແລະ ຈາດອນ. ຊານໂຊ ເປັນ 3 ປະສານ.
ສ່ວນ ເຈີເກນ ຄລັອບ ຜູ້ຈັດການທີມຊາວເຢຍລະມັນ ມື້ນີ້ສົ່ງ ໂຣແບໂຕ ຟິມິໂນ ທີ່ຫາກໍ່ດີຈາກການບາດເຈັບ ລົງຫຼິ້ນເປັນ 3 ກອງໜ້າຮ່ວມກັບ ໂມຮາເໝັດ ຊາລາ ແລະ ຫຼຸຍ ດິອາຊ ໂດຍມີ ຈໍແດນ ເຮນເດີສັນ, ເຈມ ມິນເນີ ແລະ ຮາເວຍ ເອວລຽດ ຄຸມແດນກາງ.
ເລີ່ມເກມ ລິເວີພູລ ເປັນຝ່າຍທີ່ເປີດເກມບຸກເຂົ້າໃສ່ເຈົ້າຖິ່ນຢ່າງຕໍ່ເນື່ອງ ແຕ່ກາຍເປັນ ແມນເຊັສເຕີ ຢູໄນເຕັດ ທີ່ໄດ້ປະຕູຂຶ້ນນຳ 1-0 ໃນນາທີ 16 ຈາກຈັງຫວະທີ່ ເທເຣວ ມາລາເຊຍ ຫຼຸດເຂົ້າມາຂອບເຂດໂທດຝັ່ງຊ້າຍ. ກ່ອນທີ່ຈະປາດບານເຂົ້າກາງໃຫ້ ຈາດອອນ ຊານໂຊ່ ຫຼອກໜຶ່ງຈັງຫວະ ກ່ອນຍິງຫຼິ້ນທາງເຂົ້າໄປງ່າຍໆ..
ເຄິ່ງເວລາທີ 2 ແມນຢູ ມາໄດ້ປະຕູຫຍັບເປັນ 2-0 ໃນນາທີ 53 ຈາກຈັງຫວະສວນກັບ ອອງໂຕນີ ມາຊິຢາວ ແທງທະລຸຊ່ອງໃຫ້ ມາຄັສ ແຣຊຟອດ ຫຼຸດເຂົ້າໄປຍິງໜີມື ອະລິສຊອນ ເບເກີ ເຂົ້າໄປ.
ນາທີທີ 81 ລີເວີພູລ ທີ່ເດີນເກມບຸກຢູ່ນານ ກໍມາໄດ້ປະຕູຕີໄຂ່ແຕກໄລ່ເປັນ 1-2 ຈາກຈັງຫວະລູກເຕະມຸມ ຟາບີໂອ ຄາວັນໂຢ ຍິງໄປຕິດການປ້ອງກັນຂອງ ດາວິດ ເດ ເກອາ ກ່ອນເດັ້ງມາເຂົ້າທາງ ໂມຮາເໝັດ ຊາລາ ຊ້ຳເຂົ້າໄປ.
ໄລຍະເວລາທີ່ເຫຼືອ ລີເວີພູລ ພະຍາຍາມຫາຊ່ອງເຈາະເຂົ້າໄປເພື່ອຍິງປະຕູ ແຕ່ກອງຫຼັງຂອງເຈົ້າຖິ່ນຍັງ ປະສານງານກັນໄດ້ຢ່າງຍອດຢ່ຽມ ສຸດທ້າຍ ບໍ່ມີໃຜຍິງປະຕູໄດ້ອີກ ແມນເຊັສເຕີ ຢູໄນເຕັດ ເປີດບ້ານເອົາຊະນະ ລິເວີພູລ 2-1.
ຈາກໄຊຊະນະດັ່ງກ່າວ ສົ່ງຜົນໃຫ້ ແມນເຊັສເຕີ ຢູໄນເຕັດ ເກັບ 3 ຄະແນນທຳອິດໃນເວທີ ພຣີເມຍລີກ ອັງກິດ ລະດູການ 2022/23 ສໍາເລັດ ມີ 3 ຄະແນນຈາກ 3 ນັດ ໂດດຈາກອັນດັບ 19 ຂຶ້ນມາຢູ່ອັນດັບ 14, ສ່ວນ ລິເວີພູລ ມີ 2 ຄະແນນ ຈາກ 3 ນັດ ຢືນຢູ່ອັນດັບທີ 16.ຂອງຕາຕະລາງ.
