ອົງການສະຫະປະຊາຊາດ ກອງທຶນສໍາລັບປະຊາກອນ (UNFPA) ຮ່ວມກັບ ກະຊວງສາທາລະນະສຸກ ແລະ ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ເດັກ (ຄຊກມດ) ໂດຍໄດ້ຮັບການສະໜັບສະໜູນດ້ານທຶນຈາກອົງການຮ່ວມມືສາກົນ ສ ເກົາຫຼີ ປະຈໍາ ສປປ ລາວ (KOICA) ໄດ້ຈັດກອງປະຊຸມເພື່ອຮັບຮອງມາດຕະຖານການດໍາເນີນງານວຽກງານຕອບສະໜອງການບໍລິການແກ່ຜູ້ທີ່ຖືກຄວາມຮຸນເເຮງ ສໍາລັບສະຖານທີ່ບໍລິການສຸຂະພາບ (The Health SOP) ໃນວັນທີ 19 ສິງຫາ ຜ່ານມານີ້.
ເຂົ້າຮ່ວມກອງປະຊຸມມີ ທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ປະທານ ຄຊກມດ, ທ່ານນາງ ມາຣຽມ ຄານ ຜູ້ຕາງໜ້າອົງການ UNFPA ປະຈຳ ສປປ ລາວ, ມີບັນດາຜູ້ຊ່ຽວຊານ, ພາກສ່ວນກ່ຽວຂ້ອງຈາກຂະແໜງສາທາລະນະສຸກ, ບັນດາກະຊວງກ່ຽວຂ້ອງ ແລະ ຄູ່ຮ່ວມພັດທະນາ. SOP ສະບັບນີ້ ໄດ້ຖືກພັດທະນາຂຶ້ນໂດຍຜ່ານການປຶກສາຫາລືດ້ານວິຊາການລະຫວ່າງຂະແໜງການສາທາລະນະສຸກ, ສັງຄົມ ແລະ ຍຸຕິທໍາ ພ້ອມທັງຄູ່ຮ່ວມພັດທະນາທີ່ສໍາຄັນພາຍໃຕ້ການນໍາພາຂອງກະຊວງສາທາລະນະສຸກ ແລະ ຄຊກມດ. SOP (Standard Operating Procedure)ແນວທາງການດໍາເນີນງານທີ່ມີມາດຕະຖານ, ຂອງຂະແໜງສາທາລະນະສຸກ ແມ່ນສອດຄ່ອງກັບຊຸດບໍລິການທີ່ຈໍາເປັນສໍາລັບແມ່ຍິງ ແລະ ເດັກຍິງທີ່ຖືກຄວາມຮຸນແຮງ ທີ່ໄດ້ຮັບການຍອມຮັບໃນລະດັບສາກົນ (the ESP), ນໍາໃຊ້ສໍາລັບການກວດຮ່າງກາຍ, ການປິ່ນປົວ ແລະ ການສົ່ງຕໍ່ຜູ້ລອດຊີວິດຈາກຄວາມຮຸນແຮງໃນສະຖານທີ່ໃຫ້ບໍລິການສຸຂະພາບ.
ທ່ານ ໄພວັນ ແກ້ວປະເສີດ ໄດ້ກ່າວເຖິງຄວາມສໍາຄັນຂອງ SOPs (Standard Operating Procedurs) ແນວທາງການດໍາເນີນງານທີ່ມີມາດຕະຖານຫຼາຍແນວທາງ, ໃນການປິດຊ່ອງຫວ່າງໃນການຈັດຕັ້ງປະຕິບັດແຜນດໍາເນີນງານແຫ່ງຊາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກ (2021-2025) ວ່າ: “ເມື່ອມີມາດຖານການດໍາເນີນງານ ການສະໜັບສະໜູນຜູ້ລອດຊີວິດຈາກຄວາມຮຸນແຮງໃນສະຖານທີ່ບໍລິການສຸຂະພາບກໍຈະເປັນລະບົບຂຶ້ນ. ຜູ້ລອດຊີວິດຈາກຄວາມຮຸນແຮງບົນພື້ນຖານທາງເພດ ຈະໄດ້ຮັບການບໍລິການດ້ານສຸຂະພາບທີ່ມີຄຸນນະພາບ ແລະ ຖືກສົ່ງຕໍ່ໄປຫາຜູ້ສະໜອງການບໍລິການຈາກຂະແໜງການອື່ນໆຕາມຄວາມຕ້ອງການ. ບໍ່ວ່າຜູ້ລອດຊີວິດໄປຊອກຫາການບໍລິການຢູ່ໃສ ກໍຈະໄດ້ຮັບການຕອບສະໜອງທີ່ມີການປະສານສົມທົບກັນ ຊຶ່ງເປັນການຕອບສະໜອງທີ່ແທດເໝາະກັບສະພາບຂອງ ສປປ ລາວ ແລະ ໄດ້ຕາມມາດຕະຖານສາກົນ.”
ການສະກັດກັ້ນຄວາມຮຸນແຮງບົນພື້ນຖານທາງເພດ/ຄວາມຮຸນແຮງຕໍ່ແມ່ຍິງ ແມ່ນຄວາມໝາຍໝັ້ນຂອງ ສປປ ລາວ ຕໍ່ກອງປະຊຸມສາກົນກ່ຽວກັບປະຊາກອນ ແລະ ການພັດທະນາ “ICPD25” ທີ່ນະຄອນໃນໂຣບີ ແລະ ສາມາດສະໜັບສະໜູນການຈັດຕັ້ງປະຕິບັດຄໍາໝາຍໝັ້ນຂອງລາວຕໍ່ກັບສົນທິສັນຍາ ຊີດໍ, ເວທີການປະຕິບັດງານປັກກິ່ງ ແລະ ເປົ້າໝາຍການພັດທະນາແບບຍືນຍົງ. SOP ແມ່ນເຄື່ອງມືສໍາລັບການຈັດຕັ້ງປະຕິບັດຊຸດບໍລິການທີ່ຈໍາເປັນ: ການບໍລິການຜ່ານການປະສານງານຈາກຫຼາຍຂະແໜງການທີ່ມີຄຸນະພາບ ສໍາລັບແມ່ຍິງ ແລະ ເດັກຍິງທີ່ປະສົບກັບຄວາມຮຸນແຮງ. ການຈັດຕັ້ງປະຕິບັດຊຸດບໍລິການທີ່ຈໍາເປັນ ສາມາດຫຼຸດຜ່ອນຜົນກະທົບຂອງຄວາມຮຸນແຮງຕໍ່ສຸຂະພາບ, ຄວາມປອດໄພ ແລະ ຊີວິດຂອງແມ່ຍິງ ແລະ ເດັກຍິງ; ຊ່ວຍເຫຼືອໃນການຟື້ນຟູ ແລະ ສ້າງຄວາມເຂັ້ມແຂງໃຫ້ແມ່ຍິງ, ພ້ອມທັງປ້ອງກັນບໍ່ໃຫ້ຄວາມຮຸນແຮງເກີດຂຶ້ນໃໝ່ອີກ.
ທ່ານນາງ ມາຣຽມ ຄານ ກ່າວວ່າ: “UNFPA ສະໜັບສະໜູນ ສປປ ລາວ ໃນການຈັດຕັ້ງປະຕິບັດຄຳໝາຍໝັ້ນດ້ານສິດທິມະນຸດໃນເວທີສາກົນທີ່ກ່ຽວຂ້ອງກັບຄວາມສະເໝີພາບລະຫວ່າງ ຍິງ-ຊາຍ. SOP ວຽກງານຕອບສະໜອງການບໍລິການແກ່ຜູ້ທີ່ຖືກຄວາມຮຸນແຮງ ສໍາລັບສະຖານທີ່ບໍລິການສຸຂະພາບສະບັບນີ້ ເປັນເຄື່ອງມືສໍາລັບການປະຕິບັດ, ນໍາໃຊ້ໂດຍພະນັກງານແພດເພື່ອກວດຮ່າງກາຍ ແລະ ລະບຸຜູ້ລອດຊີວິດຈາກຄວາມຮຸນແຮງ, ສະເໜີວິທີການປິ່ນປົວ ພ້ອມທັງສະໜັບສະໜູນບັນຫາຕ່າງໆທາງດ້ານຮ່າງກາຍ, ຈິດໃຈ ແລະ ຄວາມຮູ້ສຶກຂອງຜູ້ລອດຊີວິດ. SOP ສະໜອງກອບການດໍາເນີນງານ ແລະ ຄໍາແນະນໍາທາງດ້ານການແພດສໍາລັບໂຮງໝໍ ແລະ ສະຖານທີ່ໃຫ້ບໍລິການສຸຂະພາບທັງໝົດໃນປະເທດ”. ຜູ້ໃຫ້ບໍລິການດ້ານສຸຂະພາບມັກຈະເປັນຜູ້ທໍາອິດທີ່ຜູ້ລອດຊີວິດຈາກຄວາມຮຸນແຮງຕິດຕໍ່ຫາ ເພື່ອຂໍຮັບການປິ່ນປົວຫຼັງຈາກໄດ້ຮັບຄວາມຮຸນແຮງ, ໂດຍສະເພາະຄວາມຮຸນແຮງທາງດ້ານຮ່າງກາຍ ຫຼື ທາງເພດ. ຜູ້ໃຫ້ບໍລິການດ້ານສຸຂະພາບຕ້ອງໃຫ້ການດູແລທີ່ຈໍາເປັນຢ່າງເປັນມືອາຊີບ, ເກັບກໍາຫຼັກຖານທາງດ້ານນິຕິວິທະຍາໃຫ້ທັນເວລາ, ແລະ ສົ່ງຕໍ່ຜູ້ລອດຊີວິດໃຫ້ການບໍລິການອຶ່ນໆທີ່ຈໍາເປັນ ເຊັ່ນ: ການບໍລິການທາງສັງຄົມ, ຕໍາຫຼວດ, ແລະ ຍຸຕິທໍາ. ທັງໝົດເພື່ອປົກປ້ອງຄວາມປອດໄພ ແລະ ສະຫວັດດີການຂອງຜູ້ລອດຊີວິດ.
ພາຍຫຼັງການຮັບຮອງຄັ້ງນີ້, ພະນັກງານແພດໃນ 6 ແຂວງເປົ້າໝາຍຈະໄດ້ຮັບການຝຶກອົບຮົມກ່ຽວກັບການນໍາໃຊ້ SOP ສະບັບນີ້. SOP ນີ້ ແມ່ນສ່ວນໜຶ່ງຂອງຊຸດບໍລິການທີ່ຈໍາເປັນ ແລະ ມັນໄດ້ເຊື່ອມຕໍ່ກັບມາດຖານການດໍາເນີນງານຂອງຂະແໜງສັງຄົມ (The Social Sector SOP) ແລະ ມາດຖານການດໍາເນີນງານຂອງການປະສານງານ (The Coordination SOP) ຊຶ່ງລ້ວນແລ້ວແຕ່ໄດ້ຮັບການສະໜັບສະໜູນຈາກ UNFPA ແລະ ຈະຖືກຮັບຮອງໃນອາທິດຕໍ່ໜ້ານີ້.
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
