ບາເຊໂລນາ, ຣິວ ເບຕິສ, ເຄຕາເຟ ແລະ ອັນເມເຣຍ ເປັນ 4 ສະໂມສອນຂອງ ລາ ລີກາ ທີ່ຍັງຕ້ອງພະຍາຍາມເພື່ອລົງທະບຽນນັກເຕະຈົນເຖິງປັດຈຸບັນ.
ເຕະບານ ລາ ລີກາ ລະດູການນີ້ ກໍາລັງກ້າວເຂົ້າສູ່ການແຂ່ງຂັນອາທິດທີ 2 ໄລຍະທ້າຍອາທິດນີ້ ແຕ່ຍັງມີ 4 ສະໂມສອນຄື ບາເຊໂລນາ, ຣິວ ເບຕິສ, ເຄຕາເຟ ແລະ ອັນເມເຣຍ ທີ່ຍັງຕ້ອງດີ້ນຮົນເພື່ອລົງທະບຽນນັກເຕະ ແລະ ຫາກບັນຫາດັ່ງກ່າວບໍ່ໄດ້ຮັບການແກ້ໄຂ ກໍອາດຖືກບັງຄັບໃຫ້ຂາຍນັກເຕະກ່ອນຕະຫຼາດລະດູຮ້ອນນີ້ປິດດໍາເນີນການ ອີງຕາມການລາຍງານຈາກ Deario As ເມື່ອວັນສຸກທີ່ຜ່ານມາ.
ບາເຊໂລນາ ສາມາດລົງທະບຽນນັກເຕະທັງ ໂຣເບີດ ເລວານດອຟສະກີ, ຣາຟິນຢ່າ, ຟຣອງ ເກສຊິເຢ ແລະ ອັນເດຣຍ ຄຣິສເຕນເຊ່ນ ລວມເຖິງ ອຸສມານ ເດມເບເລ່ ແລະ ເຊຈີ ໂຣເບໂຕ ທີ່ເຊັນສັນຍາສະບັບໃໝ່ກັບສະໂມສອນ ຍົກເວັ້ນ ຈູນ ກຸນເດ້ ກອງຫຼັງຊາວຝຣັ່ງທີ່ຍ້າຍມາຈາກ ເຊບີຢ່າ ເນື່ອງຈາກ ບາເຂໂລນາຍັງຕ້ອງສະສາງເພດານເງິນເດືອນອີກປະມານ 20 ລ້ານເອີໂຣ ແຕ່ການເຮັດວຽກຂອງທີມຍິ່ງໃຫຍ່ແຄວ້ນກາຕາລຸນຢ່າ ຍັງບໍ່ປະສົບຄວາມສໍາເລັດ ນັ້ນເຮັດໃຫ້ກອງຫຼັງອາຍຸ 23 ປີ ຍັງບໍ່ສາມາດລົງຫຼີ້ນເກມໄປຢາມ ຣິວ ໂຊເຊຍດາດ ໃນວັນອາທິດນີ້.
ຂະນະທີ່ ເຄຕາເຟ ດຶງນັກເຕະໃໝ່ມາເສີມທັບຫຼາຍຄົນໃນລະດູຮ້ອນນີ້ ທັງ ຫຼຸຍ ມີຍ່າ, ໂດມິງໄກສ ດູອາເຕ, ຄຣິສຕຽນ ປໍຕູເກສ, ປໍຕູ ແລະ ບໍລາ ມາໂຢຣານ ແຕ່ທີມ ເຄຕາເຟ ຍັງບໍ່ສາມາດລົງທະບຽນ ຟຣານຊິສໂກ ກາຊິຢ່າ ຜູ້ຮັກສາປະຕູຄົນໃໝ່.
ດ້ານ ຣີວ ເບຕິສ ຍັງບໍ່ທັນລົງທະບຽນນັກເຕະໃໝ່ ທັງ ຊົວກິນ ຊານເຊສ ໂຈເຊ ອັນເດຣສ ກວາດິໂອ ແລະ ເຄລາດິໂອ ບຣາໂວ່ ທີ່ເຊັນສັນຍາໃໝ່ໃນລະດູຮ້ອນນີ້ ຂະນະທີ່ ວິນລຽນ ໂຈເຊ ທີ່ເຊັນສັນຍາຖາວອນກັບທີມ ຣິວ ເບຕິສ ຫຼັງຍ້າຍຈາກ ຣີວ ໂຊເຊຍດາດ ດ້ວຍສັນຍາແບບຢືມຕົວເມື່ອລະດູການທີ່ຜ່ານມາ ລວມເຖິງສອງສະມາຊິກໃໝ່ ລຸຍ ເອັນຣິເກ ແລະ ລຸຍ ເຟລິເປ ຍັງບໍ່ໄດ້ລົງທະບຽນກັບ ລາ ລີກາ ເຊັ່ນດຽວກັນ.
ດ້ານ ອັນເມເຣຍ ຍັງບໍ່ສາມາດລົງທະບຽນນັກເຕະທັງ ເລໂອນາໂດ ບັບຕິສະເຕ, ເຟນານໂດ ປາເຊໂກ ແລະ ອູບູລັງ ເມນເດສ ເຊິ່ງທີມນ້ອງໃໝ່ຂອງລີກແອັດສະປາຍ ກໍາລັງຈະປ່ອຍຕົວ ອູມາ ຊາຕິກ ກອງໜ້າທີມຊາດໄນຈີເຣຍ ອອກຈາກທີມເພື່ອແກ້ໄຂບັນຫາດັ່ງກ່າວ.
