ແມນເຊັສເຕີ ຢູໄນເຕັດ ໃຫ້ການໜຸນຫຼັງ ເອຣິກ ເທນ ຮາກ ຢ່າງເຕັມທີ່ ໂດຍມີລາຍງານເປີດເຜີຍວ່າສະໂມສອນກຽມລ່າຕົວນັກເຕະຄົນສຳຄັນ 3 ຄົນກ່ອນຕະຫຼາດຊື້ຂາຍນັກເຕະປິດລົງ.
ແມນເຊັສເຕີ ຢູໄນເຕັດ ຫາກໍຢືນຢັນການຕົກລົງກັບ ຣີວ ມາດຣິດ ໃນການຄວ້າຕົວ ຄາເຊມີໂຣ ຮ່ວມທີມໂດຍຕອນນີ້ເຫຼືອແຕ່ການກວດຮ່າງກາຍ ແລະ ສັນຍາສ່ວນຕົວຂອງກອງກາງຊາວບຣາຊິນເທົ່ານັ້ນ.
ແຕ່ທາງ The Mirror ເປີດເຜີຍວ່າ ຕະກູນ ເກລເຊີ ໄດ້ເຫັນພ້ອມກັບຄໍາຮ້ອງຂອງ ເທນ ຮາກ ໃນການຂໍງົບປະມານເສີມທີມກ່ອນຕະຫຼາດລະດູຮ້ອນປິດລົງ ໂດຍສື່ດັງຂອງອັງກິດ ລະບຸວ່າ ແມນເຊັສເຕີ ຢູໄນເຕັດ ກຽມລ່ານັກເຕະໃໝ່ອີກ 3 ຄົນ.
ນັກເຕະທີ່ວ່າ ປະກອບໄປດ້ວຍ ແຟຣງກີ ເດິ ຢອງ ເຊິ່ງທາງ ເທນ ຮາກ ຍັງຄົງບໍ່ຍອມພ່າຍແພ້ໃນການລ່າຕົວຮ່ວມທີມ ລວມໄປເຖິງສອງກອງໜ້າຢ່າງ ແອນໂທນີ ແລະ ໂຄດີ ກັກໂປ.
ໄລຍະທີ່ຜ່ານມາ ແມນເຊັສເຕີ ຢູໄນເຕັດ ຈັດການຄວ້າ ໄທເຣວ ມາລາເຊຍ, ຄຣິສຕຽນ ເອຣິກເຊນ ແລະ ລິຊານໂດຣ ມາຕິເນສ ຮ່ວມທີມ ແຕ່ເບິ່ງຄືວ່າຍັງບໍ່ສາມາດຍົກລະດັບສະໂມສອນໄດ້ຕາມຄວາມຕ້ອງການ.
The Mirror ອ້າງເຖິງການສອບຖາມຈາກແຫຼ່ງຂ່າວທີ່ໃກ້ຊິດກັບ ເທນ ຮາກ ກ່າວວ່າ ຕອນນີ້ ແມນເຊັສເຕີ ຢູໄນເຕັດ ຈະເອົາເງິນກ້ອນໃຫຍ່ເພື່ອໃຫ້ທີມງານລ່າຕົວນັກເຕະກ່ອນຕະຫຼາດປິດຕົວລົງ ເຊິ່ງເປົ້າໝາຍອັນດັບ 1 ຍັງຄົງເປັນ ແຟຣງກີ ເດິ ຢອງ ອາຍຸ 25 ປີຂອງ ບາເຊໂລນາ.
ກໍລະນີຂອງ ເດິ ຢອງ ຍັງຄົງເປັນບັນຫາສໍາຄັນ ເພາະວ່ານອກຈາກນັກເຕະບໍ່ສົນໃຈທີ່ຈະຍ້າຍໄປຫຼິນໃນຖິ່ນໂອລ ແທຣບຟອດ ສື່ຍັງລະບຸວ່າ ສາເຫດສໍາຄັນທີ່ນັກເຕະບໍ່ຢາກຍ້າຍທີມ ເພາະຕ້ອງການເງິນຄ່າຈ້າງທີ່ ບາເຊໂລນາ ຄ້າງຈ່າຍເປັນຈໍານວນຫຼາຍ.
ທາງ ແມນເຊັສເຕີ ຢູໄນເຕັດ ບໍ່ມີບັນຫາໃນການຈ່າຍຄ່າຕົວ ຫຼືຄ່າຈ້າງ ເດິ ຢອງ ແຕ່ຕອນນີ້ຕ້ອງພະຍາຍາມຊັກຊວນນັກເຕະອາຍຸ 25 ປີໃຫ້ປ່ຽນໃຈຍ້າຍມາຮ່ວມງານໃຫ້ໄດ້ເສຍກ່ອນ.
ນອກຈາກນັ້ນ ກໍລະນີຂອງ ອັນໂຕນີ ກໍຖືເປັນກະແສແຮງຂຶ້ນໃນຮອບ 2-3 ມື້ກ່ອນໜ້ານີ້ ຫຼັງຈາກມີລາຍງານວ່າ ຂໍ້ສະເໜີຫຼ້າສຸດຂອງ ແມນເຊັສເຕີ ຢູໄນເຕັດ ຖືກ ອາແຈກ ອໍາສະເຕີດໍາ ປະຕິເສດ ເຊິ່ງທາງນັກເຕະສະແດງທ່າທີຢາກຈະຍ້າຍສັງກັດ ຈົນບໍ່ມີສ່ວນຮ່ວມໃນການຊ້ອມຕະຫຼອດວັນສຸກ ແລະ ວັນເສົາທີ່ຜ່ານມາ.
ເຊື່ອວ່າກໍລະນີ ອັນໂຕນີ່ ຈະມີຄວາມຊັດເຈນໃນໄວໆນີ້ ໂດຍ ແມນເຊັສເຕີ ຢູໄນເຕັດ ຍັງຄົງໃຫ້ຄວາມສົນໃຈກັບ ກ໊ອບໂປ ກອງໜ້າຂອງ PSV ເຊັ່ນດຽວກັນ ແຕ່ການດຶງຕົວກອງໜ້າຊາວໂຮນລັງ ຍັງຄົງຂຶ້ນຢູ່ກັບວ່າ PSV ຈະເຂົ້າຮອບແບ່ງກຸ່ມ ແຊັມປຽນລີກ ໄດ້ຫຼືບໍ່ ?
