ໃນວັນທີ 21 ສິງຫາ 2022 ຜ່ານມານີ້ ຄະນະກຳມະການຈັດການແຂ່ງຂັນ ກິລາການທະຫານສາກົນ ຂອງເຫຼົ່າຮົບຊ່າງແສງ ໄດ້ຈັດພິທີສະຫຼຸບການແຂ່ງຂັນກິລາການທະຫານສາກົນ (ARMY GAMES 2022) ຢູ່ທີ່ກອງພົນນ້ອຍຊ່າງແສງ 73420 ຂອງເມືອງໂວນກາກຼາດ, ສະຫະພັນຣັດເຊຍ (ໃນຮູບແບບຊ່າງແສງ), ເຊິ່ງທັບນັກກິລາເຫຼົ່າຮົບຊ່າງແສງກອງທັບປະຊາຊົນລາວ ສາມາດຍາດອັນດັບທີ 3 ໂດຍມີ 5 ປະເທດ ເຂົ້າຮ່ວມແຂ່ງຂັນຄື: ຣັດເຊຍ, ສປປ ລາວ, ອຸສເບກີສະຖານ, ເບລາຣຸດ ແລະ ອານເມເນຍ, ເຂົ້າຮ່ວມ. ໃນພິທີປິດການແຂ່ງຂັນດັ່ງກ່າວ ມີສະຫາຍ ພັນເອກ ກຮູກະລົບ ອັນເດຮ ອາເລັກເຊວິດ ຮອງຫົວໜ້າກົມຊ່າງແສງ ສະຫະພັນຮັດເຊຍ, ສ່ວນທັບນັກກິລາເຫຼົ່າຮົບຊ່າງແສງກອງທັບປະຊາຊົນລາວ ນຳໂດຍສະຫາຍ ພັນເອກ ບຸນທະວີ ໂພໄຊ ຮອງຫົວໜ້າກົມຊ່າງແສງ ຫົວໜ້າຄະນະຊີ້ນຳທີມນັກກິລາ ເຫຼົ່າຮົບຊ່າງແສງ ກອງທັບປະຊາຊົນລາວ.
ສະຫາຍ ພັນໂທ ອານຸສັກ ພົມວົງສາ ຮອງຫົວໜ້າຄະນະຊີ້ນຳທີມນັກກິລາ ເຫຼົ່າຮົບຊ່າງແສງ ກອງທັບປະຊາຊົນລາວໄດ້ລາຍງານໃຫ້ຮູ້ວ່າ: ການເຂົ້າຮ່ວມແຂ່ງຂັນກິລາການທະຫານສາກົນຄັ້ງນີ້, ແມ່ນມີຄວາມໝາຍ-ຄວາມສຳຄັນທີ່ສຸດ ທັງເປັນການສ້າງສາຍພົວພັນ ມິດຕະພາບ ຮັດແໜ້ນຄວາມສາມັກຄີກັບບັນດາປະເທດ ທີ່ເຂົ້າຮ່ວມ, ທັງເປັນການເພີ່ມທະວີຮັດແໜ້ນ ສາຍພົວພັນ ມິດຕະພາບ ລະຫວ່າງ ກອງທັບປະຊາຊົນລາວ ກັບ ກອງທັບ ສ.ຣັດເຊຍ ແລະ ບັນດາປະເທດເພື່ອນມິດ, ພ້ອມທັງເປັນການຖອດຖອນບົດຮຽນ ວຽກງານວິຊາສະເພາະເຫຼົ່າຮົບຊ່າງແສງ ໃຫ້ນັບມື້ເຕີບໃຫ່ຍເຂັ້ມແຂງທັນສະໄໝເທື້ອລະກ້າວ.
ສຳລັບການເຂົ້າຮ່ວມແຂ່ງຂັນໃນຄັ້ງນີ້ ທີມນັກກິລາເຫຼົ່າຮົບຊ່າງແສງ ກອງທັບປະຊາຊົນລາວ ແມ່ນຈົກສະຫຼາກໄດ້ ເບີ 2 ປະກອບມີ: ລົດດຸດ, ລົດຂຸດຂຸມຄອງ, ລົດສ້າງສິ່ງກີດຂວາງແຕກ, ລົດສ້າງສິ່ງກີດຂວາງບໍ່ແຕກ, ລົດທຳລາຍສະໜາມມິນ, ລົດລອຍນ້ຳ ແລະ ລົດສ້າງສະໜາມມິນ, ເຊິ່ງມີນັກກິລາເຂົ້າຮ່ວມທັງໝົດ 21 ສະຫາຍ, ໄດ້ເລີ່ມການຝຶກຊ້ອມ ແລະ ແຂ່ງຂັນມາແຕ່ວັນ 8 – 21 ສິງຫາ 2022, ຜົນການແຂ່ງຂັນປະກົດວ່າ: ທີມກິລາເຫຼົ່າຮົບຊ່າງແສງກອງທັບປະຊາຊົນລາວ ສາມາດຍາດອັນດັບທີ 3, ສ່ວນອັນດັບທີ l ແມ່ນເຈົ້າພາບ ສ.ຣັດເຊຍ ແລະ ອັນດັບທີ ll ແມ່ນ ສ.ເບຣາຣຸດ.
ຂ່າວ: ເກນ ວິໄລສານ
