ກອງປະຊຸມ ສື່ມວນຊົນທົ່ວປະເທດ ກ່ຽວກັບການທົບທວນຄືນວຽກງານສົ່ງເສີມສິດທິເດັກ, ການມີສ່ວນຮ່ວມຂອງຊຸມຊົນໃນການຄວບຄຸມ ແລະ ປ້ອງກັນພະຍາດໂຄວິດ-19 ໄດ້ຈັດຂຶ້ນໃນລະຫວ່າງວັນທີ 21-26 ສິງຫາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງຫຼວງພະບາງ ໂດຍການເປັນປະທານຂອງທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ເຂົ້າຮ່ວມມີທ່ານ ຈັນສະໝອນ ທິບພາວັນ ຮອງຫົວໜ້າພະແນກ ຖວທ ແຂວງຫຼວງພະບາງ, ທ່ານ ຕະບອງເພັດ ພຸດທະວົງ ຜູ້ຊ່ຽວຊານດ້ານໂຄສະນາ ແລະ ສື່ສານມວນຊົນ ອົງການຢູນີເຊບ ປະຈຳ ສປປ ລາວ, ມີສື່ມວນຊົນຈາກສູນກາງ, ສື່ມວນຊົນຈາກ 17 ແຂວງ ທົ່ວປະເທດ, ມີພາກສ່ວນທີ່ກ່ຽວຂ້ອງຂັ້ນສູນກາງ ແລະ ທ້ອງຖິ່ນເຂົ້າຮ່ວມ.
ໃນກອງປະຊຸມທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ກ່າວວ່າ: ການຈັດກອງປະຊຸມໃນຄັ້ງນີ້ ເພື່ອເປັນການທົບທວນຄືນວຽກງານສົ່ງເສີມສິດທິເດັກ, ການມີສ່ວນຮ່ວມຂອງຊຸມຊົນໃນການຄວບຄຸມ ແລະ ປ້ອງກັນພະຍາດໂຄວິດ-19. ຕັ້ງແຕ່ເລີ່ມກວດພົບເຫັນກໍລະນີຜູ້ຕິດເຊື້ອຜູ້ທຳອິດໃນປະເທດລາວ ໃນເດືອນກຸມພາປີ 2020 ສື່ມວນຊົນເຮົາໄດ້ເຮັດບົດບາດຂອງຕົນ ຮ່ວມແຮງຮ່ວມໃຈກັນ ປະຕິບັດໜ້າທີ່ການໂຄສະນາຕິດຕາມສະພາບການການລະບາດຂອງພະຍາດໂຄວິດ-19 ທັງພາຍໃນ ແລະ ຕ່າງປະເທດ, ຕິດຕາມ ແລະ ເຄື່ອນໄຫວ ເອົາຂ່າວທຸກເຫດການ, ກິດຈະກຳຕ່າງໆ ຂອງຄະນະສະເພາະກິດຂັ້ນສູນກາງ ແລະທ້ອງຖິ່ນ ເປັນຕົ້ນແມ່ນ: ການຮັບເຄື່ອງຊ່ວຍເຫລືອທາງດ້ານການແພດ ແລະ ຮັບການຊ່ວຍເຫລືອວັກຊີນປ້ອງກັນໂຄວິດ-19 ຈາກພາກເອກກະຊົນ ແລະ ສາກົນ, ຕິດຕາມການຖະແຫລງຂ່າວຂອງຄະນະສະເພາະກິດທຸກມື້, ໂຄສະນາປຸກລະດົມໃຫ້ປະຊາຊົນປ້ອງກັນຕົນເອງ, ໂຄສະນາປຸກລະດົມໃຫ້ປະຊາຊົນເຂົ້າຮ່ວມຂະບວນການສັກວັກຊີນ ແລະ ອື່ນໆ ອອກທຸກຊ່ອງທາງຄື: ສື່ໂທລະພາບ, ວິທະຍຸ, ໜັງສືພິມ, ສື່ອອນລາຍ ຮອດໂທລະໂຄ່ງປະຈຳບ້ານ ເພື່ອໃຫ້ປະຊາຊົນບັນດາເຜົ່າ ຮັບຮູ້ເຖິງຜົນອັນຕະລາຍຂອງພະຍາດດັ່ງກ່າວ ແລະ ຮູ້ເຖິງວິທີປ້ອງກັນຕົນເອງ ແລະ ຄວບຄົວ.ໃນເວລາດຽວກັນສື່ມວນຊົນພວກເຮົາຍັງໄດ້ຮັບຜິດຊອບຕິດຕາມສື່ສັງຄົມຕ່າງໆ ທີ່ໂຄສະນາ, ເຜີຍແຜ່ ແລະ ສົ່ງຂໍ້ມູນຂ່າວສານ ທີ່ບິດເບືອນຄວາມເປັນຈິງ ເພື່ອແນະນຳໃຫ້ສັງຄົມມີສະຕິກວດສອບໃນການຮັບຂໍ້ມູນຂ່າວສານ.
ການແຜ່ລະບາດຂອງພະຍາດ ໂຄວິດ-19 ໄດ້ສົ່ງຜົນກະທົບອັນຮ້າຍແຮງໃນທົ່ວໂລກ, ມັນຍັງເຮັດໃຫ້ ຂະແຫນງການທ່ອງທ່ຽວ ແລະ ອຸດສາຫະກໍາ, ການບໍລິການໄດ້ຮັບຜົນກະທົບເນື່ອງຈາກນັກທ່ອງທ່ຽວຕັດສິນໃຈຍົກເລີກ ຫຼື ເລື່ອນການເດີນທາງຂອງພວກເຂົາເຂົ້າມາ ສປປ ລາວ. ການຟື້ນຕົວທາງດ້ານເສດຖະກິດຂອງ ສປປ ລາວ ແມ່ນຂຶ້ນກັບນະໂຍບາຍທີ່ສະໜັບສະໜູນ ພາກທຸລະກິດ ແລະ ຄົວເຮືອນ ເພື່ອປັບຕົວເຂົ້າກັບສະພາບການດຳລົງຊີວິດປົກກະຕິແບບໃໝ່, ພ້ອມນີ້ ລັດຖະບານຂອງ ສປປ ລາວ ໄດ້ໃຫ້ຄໍາແນະນໍາ ການເປີດປະເທດຈະຊ່ວຍໃຫ້ຂະແໜງການທ່ອງທ່ຽວ ແລະ ອຸດສາຫະກຳການບໍລິການກັບຄືນມາເປັນແຫຼ່ງລາຍຮັບຂອງ ສປປ ລາວ. ດັ່ງນັ້ນ ຈຶ່ງເກີດໂຄງການການສຳຫລວດພື້ນທີ່ທ່ອງທ່ຽວສີຂຽວ ການສຳຫຼວດ ແມ່ນກຳນົດເອົາ ໃນນະຄອນຫຼວງວຽງຈັນ, ແຂວງວຽງຈັນ, ແລະ ແຂວງຫຼວງພະບາງ ແມ່ນເລີ່ມແຕ່ ເດືອນ ກຸມພາ ເຖີງ ເມສາ 2022. ທີມງານເຮັດການສຳຫຼວດ ດັ່ງກ່າວແມ່ນພາຍໄຕ້ການ ຊີ້ນໍາ-ນໍາພາ ຈາກຄະນະນໍາຂອງກະຊວງສາທາລະນະສຸກ ແລະ ການນໍາຂອງ ກະຊວງຖະແຫຼ່ງຂ່າວ, ວັດຖະນະທຳ ແລະ ທ່ອງທ່ຽວ, ພາຍໃຕ້ການສະໜັບສະໜູນ ຂອງຄູ່ຮ່ວມພັດທະນາ ຢູນີເຊບ (UNICEF). ຄວາມສຳຄັນຂອງການສຳຫຼວດດັ່ງກ່າວ ແມ່ນເພື່ອການຄຸ້ມຄອງການໃຫ້ບໍລິການວັກຊີນ ແລະ ອັດຕາປົກຄຸມການສັກວັກຊີນເພື່ອປ້ອງກັນ ໂຄວິດ-19 ຕ້ອງໃຫ້ຮັບປະກັນໄດ້ 100%, ແລະ ຕ້ອງມີມາດຕະການປ້ອງກັນໃນລະດັບສູງສຸດ ໂດຍສະເພາະແມ່ນເຂດທ່ອງທ່ຽວສີຂຽວ. ນອກຈາກເຂດທ່ອງທ່ຽວສີຂຽວແລ້ວ ຕ້ອງໄດ້ເພີ່ມທະວີອັດຕາການປົກຄຸມການສັກວັກຊີນໃນຂອບເຂດທົ່ວປະເທດ ໃຫ້ບັນລຸເປົ້າໝາຍທີ່ລັດຖະບານວາງໄວ້ 80% ໃນທ້າຍປີ 2022. ສະນັ້ນ, ສື່ມວນຊົນ ພວກເຮົາຕ້ອງໄດ້ເຮັດໜ້າທີ່ການໂຄສະນາປຸກລະດົມປະຊາຊົນ ບັນດາເຜົ່າ ລວມທັງເດັກນ້ອຍ ໃນຂອບເຂດທົ່ວປະເທດ ໃຫ້ເຂົ້າມາຮັບວັກຊີນຕ້ານພະຍາດໂຄວິດ-19 ເຂັມ1-3, ວັກຊີຮອບປົກກະຕິ ເພື່ອເພີ່ມທະວີອັດຕາການປົກຄຸມການສັກວັກຊີນຂອງປະເທດ ໃຫ້ບັນລຸເປົ້າໝາຍທີ່ວາງໄວ້.
ຈຸດປະສົງ ເພື່ອສົ່ງເສີມການມີສ່ວນຮ່ວມຂອງຊູມຊົນໃນການຄວບຄຸມ ແລະ ປ້ອງກັນພະຍາດໂຄວິດ-19, ລາຍງານຫຍໍ້ຜົນການສຳຫລວດກ່ຽວກັບອັດຕາກວມການສັກວັກຊີນ ພື້ນທີ່ສີຂຽວ (green zones) ຢູ່ຫລວງພະບາງ ລວມທັງ ນະຄອນຫລວງວຽງຈັນ ແລະ ແຂວງວຽງຈັນ, ສະຫລຼຸບຫຍໍ້ ການສື່ສານປ່ຽນແປງພຶດຕິກຳທາງສັງຄົມ, ທົບທວນຄືນ ສິ່ງທ້າທາຍ ແລະ ສິ່ງຂີດຂວາງ ຕໍ່ການສື່ສານປ່ຽນແປງພຶດຕິກຳທາງສັງຄົມ, ເຜີຍແຜ່ຜົນຄວາມຄືບໜ້າ ການຊູກຍູ້ຂະບວນການສັກວັກຊີນປ້ອງກັນໂຄວິດ-19, ວັກຊີນຮອບປົກກະຕິ ໃຫ້ແກ່ສື່ມວນຊົນທົ່ວປະເທດ ໃຫ້ບັນລຸເປົ້າໝາຍຂອງລັດຖະບານວາງຄາດໝາຍໄວ້ 80% ໃນປີ2022, ທົບທວນຄືນ ການມີສ່ວນຮ່ວມສື່ມວນຊົນຕໍ່ການໂຄສະນາສົ່ງເສີມສິດທິເດັກ, ລວມທັງ ປື້ມແນະນຳ ສື່ມວນຊົນກັບສິດທິເດັກ, ຮັບປະກັນສື່ມວນຊົນມີຄວາມຮັບຜິດຊອບຕໍ່ການລາຍງານຂ່າວກ່ຽວກັບເດັກ ແລະ ໄວໝຸ່ມ ອີງຕາມສົນທິສັນຍາວ່າດ້ວຍສິດທິເດັກ, ກົດໝາຍ, ລະບຽບການປົກປ້ອງ, ສົ່ງເສີມ ສິດທິີເດັກ ແລະ ຊ່ວຍໃຫ້ເດັກມີສ່ວນຮ່ວມກັບສື່ມວນຊົນ ແລະ ເພື່ອສ້າງຄວາມອາດສາມາດໃຫ້ແກ່ສະມາຊີກ ມີເດຍລາວ ແລະ ປັບປຸງໜ້າເພສ ມີເດຍລາວ ໃຫ້ມີເຄືອຄ່າຍຂະຫຍາຍເພີ່ມຂື້ນ.
