ໃນໂອກາດທີ່ເດີນທາງຢ້ຽມຢາມ ແລະ ເຮັດວຽກຮ່ວມກັບ ຄະນະພັກ, ອໍານາດການປົກຄອງເມືອງສິງ ແຂວງຫຼວງນໍ້າທາ ໃນວັນທີ 17 ສິງຫາ 2022 ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ແລະ ເນັ້ນຕໍ່ອໍານາດການປົກຄອງເມືອງສິງ 10 ບັນຫາສໍາຄັນດັ່ງນີ້:
1. ເມືອງສິງ ເປັນເມືອງທີ່ມີຊາຍແດນທາງບົກ ຕິດຈອດກັບຕ່າງປະເທດ ຄື ສປ ຈີນ ທີ່ມີຄວາມຍາວ 75 ກິໂລແມັດ ແລະ ຕິດຈອດກັບມຽນມາ ມີຄວາມຍາວ 49 ກິໂລແມັດ ຊຶ່ງເປັນເງື່ອນໄຂອັນດີໃຫ້ແກ່ການຄ້າຂາຍ, ແລກປ່ຽນສິນຄ້າ. ຄຽງຄູ່ກັນນັ້ນ ວຽກງານປ້ອງກັນຊາດ-ປ້ອງກັນຄວາມສະຫງົບ ກໍຈະຕ້ອງໄດ້ເພີ່ມທະວີຄວາມເອົາໃຈໃສ່ ເພື່ອສະກັດກັ້ນຄົນບໍ່ດີນໍາໃຊ້ເຂດຊາຍແດນດັ່ງກ່າວ. ສະນັ້ນ, ຈຶ່ງສະເໜີໃຫ້ຄະນະພັກ, ອົງການປົກຄອງເມືອງສິງ ເພີ່ມທະວີຄວາມເອົາໃຈໃສ່ ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຂອງພັກ, ນໍາພາວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ໜັກແໜ້ນ, ເຂັ້ມແຂງ ສາມາດຕອບໂຕ້ ແລະ ແກ້ໄຂອາຊະຍາກໍາປະເພດຕ່າງໆຢ່າງວ່ອງໄວ, ທັນເວລາ ແລະ ເດັດຂາດ; ເອົາໃຈໃສ່ປັບປຸງສອງກໍາລັງໃຫ້ມີຄວາມເຂັ້ມແຂງ, ມີຄວາມຈົງຮັກພັກດີຕໍ່ປະຊາຊົນ, ຕໍ່ລະບອບໃໝ່.
2. ເມືອງສິງ ມີເນື້ອທີ່ດິນກວ້າງຂວາງ, ດິນມີຄວາມອຸດົມສົມບູນ, ມີແມ່ນໍ້າຫຼາຍສາຍທີ່ສາມາດສະໜອງນໍ້າໃຫ້ແກ່ການຜະລິດກະສິກໍາ, ການລ້ຽງສັດ; ເປັນເມືອງທີ່ມີທີວທັດທໍາມະຊາດສວຍ ງາມ, ເໝາະກັບການທ່ອງທ່ຽວຊົມທໍາມະຊາດ ແລະ ທ່ອງທ່ຽວດ້ານວັດທະນະທໍາ, ຈຶ່ງສະເໜີໃຫ້ ຄະນະພັກ, ອົງການປົກຄອງເມືອງ ເອົາໃຈໃສ່ຊຸກຍູ້ສົົ່ງເສີມ ແລະ ສ້າງເງື່ອນໄຂ ໃຫ້ປະຊາຊົນເຮັດການຜະລິດກະສິກໍາ, ການລ້ຽງສັດ ເປັນສິນຄ້າ, ມີມາດຕະຖານ, ມີຄຸນນະພາບ ເພື່ອສະໜອງໃຫ້ບັນດາໂຮງແຮມ, ຮ້ານອາຫານ, ຕະຫຼາດຕ່າງໆ ຊຶ່ງເປັນບ່ອນຮອງຮັບຜົນຜະລິິດຂອງປະຊາຊົນ, ເປັນການສ້າງວຽກເຮັດງານທໍາ, ສ້າງລາຍຮັບທີ່ໝັ້ນຄົງ ໃຫ້ແກ່ປະຊາຊົນບັນດາເຜົ່າ.
3. ສະເໜີໃຫ້ຄະນະພັກ, ອົງການປົກຄອງເມືອງ ເອົາໃຈໃສ່ຄົ້ນຄວ້າວາງແຜນພັດທະນາເສດຖະກິດ-ສັງຄົມຂອງເມືອງ ໃຫ້ສອດຄ່ອງກັບທ່າແຮງບົ່ມຊ້ອນ, ຄົ້ນຄວ້າຈັດແບ່ງເຂດການຜະລິດ, ການລົງທຶຶນໃຫ້ລະອຽດ ເພື່ອສຸມທຶນຮອນ, ເຕັກນິກ, ວິຊາການ ເຂົ້າໃສ່ການລົງທຶນດັ່ງກ່າວ ໃຫ້ບັນລຸຜົນສໍາເລັດ.
4. ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດ ເປັນວຽກງານທີີ່ຮີບດ່ວນ ທີ່ອົງຄະນະພັກ, ອົງການປົກຄອງທຸກຂັ້ນ ຕະຫຼອດຮອດພະນັກງານ, ທະຫານ, ຕໍາຫຼວດ ກໍຄືປະຊາຊົນບັນດາເຜົ່າ ຕ້ອງໄດ້ພ້ອມກັນຈັດຕັ້ງປະຕິບັດດ້ວຍຄວາມຮັບຜິດຊອບສູງ ແລະ ເປັນວິທີທາງດຽວ ທີ່ຈະນໍາພາປະເທດຊາດ ໃຫ້ຫຼຸດພົ້ນຈາກວິກິດການທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ໃຫ້ບັນລຸຜົນສໍາເລັດ ຈຶ່ງສະເໜີມາຍັງຄະນະພັກ, ອົງການປົກຄອງເມືອງສິງ ຈົ່ງໄດ້ເພີ່ມທະວີການນໍາພາ-ຊີ້ນໍາ ຈັດຕັ້ງປະຕິບັດວາລະແຫ່ງຊາດຢ່າງຕັ້ງໜ້າ ແລະ ຖືເປັນພັນທະຂອງພົນລະເມືອງທຸກຄົນ ເປັນຕົ້ນການປະຕິບັດນະໂຍບາຍປະຢັດມັດທະຍັດງົບປະມານຂອງລັດ, ຫຼີກລ່ຽງການສ້າງແຜນການລົງທຶນຂອງລັດ ເກີນຄວາມສາມາດໃນການຊໍາລະສະສາງ ຊຶ່ງຈະເກີດໜີ້ສິນໃນອະນາຄົດ; ການຂຸດຄົ້ນແຫຼ່ງລາຍຮັບ ແລະ ຊຸກຍູ້ສົ່ງເສີມປະຊາຊົນເຮັດການຜະລິດ ເພື່ອສ້າງຖານລາຍຮັບໃໝ່, ການແກ້ໄຂບັນຫາຮົ່ວໄຫຼຂອງງົບປະມານ ແລະ ອື່ນໆ. ການສະກັດກັ້ນ ແລະ ແກ້ໄຂບັນຫາຢາເສບຕິດ ກໍເປັນວຽກງານທີ່ສໍາຄັນ ຊຶ່ງບັນຫາດັ່ງກ່າວ ເປັນໄພອັນຕະລາຍຕໍ່ປະເທດຊາດ, ເປັນປະກົດການຫຍໍ້ທໍ້ຂອງສັງຄົມ ຈຶ່ງສະເໜີໃຫ້ເອົາໃຈໃສ່ສະກັດກັ້ນບັນຫາຢາເສບຕິດ ຊຶ່ງຈະສົ່ງຜົນກະທົບຕໍ່ລູກຫຼານ ທີ່ເປັນອະນາຄົດຂອງປະເທດຊາດພວກເຮົາ.
5. ເອົາໃຈໃສ່ພັດທະນາຊັບພະຍາກອນມະນຸດ ໃຫ້ສອດຄ່ອງກັບຄວາມຮຽກຮ້ອງຕ້ອງການ ຂອງການສ້າງສາພັດທະນາ ເປັນຕົ້ນການສ້າງນັກວິຊາການດ້ານການປູກຝັງ-ລ້ຽງສັດ ເພື່ອເຮັດໃຫ້ການຜະລິດກະສິກໍາຢູ່ພາຍໃນເມືອງ ຂະຫຍາຍຕົວ ແລະ ມີຄວາມເຂັ້ມແຂງ.
6. ສະເໜີໃຫ້ຄະນະພັກ, ອົງການປົກຄອງເມືອງ ເພີ່ມທະວີຄວາມເອົາໃຈໃສ່ ສຶກສາອົບຮົມໃຫ້ລູກຫຼານ ເຫັນໄດ້ທ່າແຮງບົ່ມຊ້ອນທາງດ້ານເສດຖະກິດຂອງປະເທດເຮົາ ເປັນຕົ້ນເຮົາມີທີ່ດິິນອັນອຸດົມສົມບູນ, ເໝາະກັບການຜະລິດກະສິກໍາເປັນສິນຄ້າ, ເຮົາມີຕະຫຼາດພາຍໃນ ແລະ ຕ່າງປະເທດຮອງຮັບ. ສະນັ້ນ, ລູກຫຼານເຮົາ ຄວນຫັນແນວຄິດການໄປອອກແຮງງານຢູ່ຕ່າງປະເທດ ມາເປັນເຈົ້າຂອງວິສາຫະກິດຂະໜາດນ້ອຍ ແລະ ກາງ ຢູ່ປະເທດເຮົາ.
7. ເພີ່ມທະວີຄວາມເອົາໃຈໃສ່ ໃນການສ້າງເງື່ອນໄຂໃຫ້ປະຊາຊົນ ສາມາດເຂົ້າເຖິງການປິ່ນປົວຢ່າງກວ້າງຂວາງ, ສະດວກ ແລະ ມີປະສິດທິພາບ; ເອົາໃຈໃສ່ປັບປຸງໂຮງໝໍເມືອງ, ໂຮງໝໍນ້ອຍ ດ້ວຍການປະກອບອຸປະກອນ, ເຄື່ອງມືດ້ານການແພດ ທີ່ສາມາດຍົກສູງປະສິດທິພາບໃນການປິ່ນປົວໃຫ້ສູງຂຶ້ນ; ເພີ່ມຄວາມສາມາດໃນການເຝົ້າລະວັງຕິດຕາມ, ບົ່ງມະຕິ, ຊອກຄົ້ນຫາ ແລະ ໂຕ້ຕອບກໍລະນີພະຍາດລະບາດໃຫ້ໄດ້ໄວ.
8. ເອົາໃຈໃສ່ຊຸກຍູ້ການຮຽນຂອງລູກຫຼານ, ປັບປຸງຄຸນນະພາບການສຶກສາໃຫ້ສູງຂຶ້ນ, ເອົາ ໃຈໃສ່ການສ້າງ ແລະ ສ້ອມແປງໂຮງຮຽນ ເພື່ອອໍານວຍຄວາມສະດວກໃຫ້ແກ່ລູກຫຼານໄດ້ເຂົ້າຮຽນ, ປະກອບປຶ້ມແບບຮຽນ, ອຸປະກອນການຮຽນ ພ້ອມທັງສ້າງເງື່ອນໄຂການເຂົ້າເຖິງການສຶກສາ ແລະ ຂະຫຍາຍຕາໜ່າງການສຶກສາໃຫ້ມີຄຸນນະພາບນັບມື້ສູງຂຶ້ນ ແລະ ທົ່ວເຖິງຢູ່ເຂດຫ່າງໄກສອກຫຼີກ.
9. ໃຫ້ຄະນະພັກ, ອົງການປົກຄອງເມືອງສິງ ເອົາໃຈໃສ່ການຄົ້ນຄວ້າປັບປຸງກົງຈັກການຈັດຕັ້ງໃຫ້ມີປະສິດທິພາບ, ເຮັດໃຫ້ກົງຈັກກະທັດຮັດເປັນລະບົບໂລ່ງລ່ຽນ, ຮັບປະກັນການປະຕິບັດໜ້າທີ່ວຽກງານ.
10. ເພີ່ມທະວີການຊີ້ນໍາ-ນໍາພາຂອງອົງຄະນະພັກເມືອງ ຕໍ່ການເຄື່ອນໄຫວວຽກງານຂອງສະມາຊິກສະພາປະຊາຊົນແຂວງຫຼວງນໍ້າທາ ທີ່ປະຈໍາຢູ່ເມືອງສິງ ໃຫ້ສາມາດເຄື່ອນໄຫວປະຕິບັດໜ້າທີ່ເປັນຕົວແທນຂອງປະຊາຊົນ ຕາມກົດໝາຍກໍານົດ, ຄົ້ນຄວ້າປະກອບບຸກຄະລາກອນຊ່ວຍວຽກ ລວມທັງສະຖານທີ່ເຮັດວຽກ ໃຫ້ມີຄວາມເໝາະສົມ ແນໃສ່ເຮັດໃຫ້ການປະຕິບັດໜ້າທີ່ວຽກງານ ເຂົ້າສູ່ລະບົບ ແລະ ມີປະສິດທິຜົນນັບມື້ສູງຂຶ້ນ.
ຂ່າວ: ສະພາແຫ່ງຊາດ
