ກົມຮູບເງົາ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມເຜີຍແຜ່ກົດໝາຍວ່າດ້ວຍຮູບເງົາ ຂຶ້ນຫວ່າງແລ້ວນີ້ ທີ່ຫ້ອງປະຊຸມພະແນກກະສິກໍາ ແລະ ປ່າໄມ້ ແຂວງຫຼວງພະບາງ ໂດຍມີທ່ານ ຄໍາເພົ້າ ວັນນະວົງ ຫົວໜ້າກົມຮູບເງົາ ກະຊວງ ຖວທ, ທ່ານ ຈັນສະໝອນ ທິບພາວັນ ຮອງຫົວໜ້າພະແນກ ຖວທ ແຂວງຫຼວງພະບາງ ພ້ອມດ້ວຍຕາງໜ້າບັນດາພະແນກ ຖວທ 8 ແຂວງພາກເໜືອ, ເມືອງ-ນະຄອນ ແລະ ວິຊາການເຂົ້າຮ່ວມຮັບຟັງ.
ທ່ານ ຄໍາເພົ້າ ວັນນະວົງ ໄດ້ກ່າວວ່າ: ການເຜີຍແຜ່ກົດໝາຍຄັ້ງນີ້, ເພື່ອໃຫ້ບັນດາພະແນກການກ່ຽວຂ້ອງ ຢູ່ 8 ແຂວງພາກເໜືອ ໄດ້ຮັບຮູ້, ກໍາແໜ້ນບັນດານິຕິກໍາຂອງກົດໝາຍດັ່ງກ່າວ ຊຶ່ງຈະເປັນປະໂຫຍດໃນການຄຸ້ມຄອງຕໍ່ວຽກງານຕ່າງໆ ເປັນຕົ້ນແມ່ນບັນດາສື່ໂຊຊ່ຽວມີເດຍ, ອຸປະກອນຂອງສື່ ລວມໄປເຖິງສື່ມວນຊົນ ແລະ ພາກສ່ວນອື່ນໆ ຊຶ່ງໃນເມື່ອກ່ອນການສ້າງຮູບເງົາ ຫຼື ຜະລິດຕະພັນ ທີ່ສັງລວມດ້ານສິລະປະ ແລະ ເປັນສື່ໂຄສະນາ ແມ່ນໃຫ້ເຫັນເປັນພາບເຄື່ອນໄຫວທີ່ມີສຽງ ຫຼື ບໍ່ມີສຽງ ໂດຍບັນທຶກໃສ່ຟີມ, ກາແຊັດວິດີໂອ, ແຜ່ນວີຊີດີ ຫຼື ວັດຖຸແບບອື່ນ, ປັດຈຸບັນ ເຕັກໂນໂລຊີດີຈີຕອນ ຫຼື ໄອຊີທີ ໄດ້ມີການພັດທະນາຢ່າງຕໍ່ເນື່ອງ ແລະ ໄວທີ່ສຸດ ເກີດມີເຕັກໂນໂລຊີຕ່າງໆຂຶ້ນ. ທັງໝົດນັ້ນລ້ວນແລ້ວແຕ່ ເປັນການປະກອບເຂົ້າໃນການສ້າງສາລະຄະດີ, ເລື້ອງສັ້ນ, ບົດເພງປະກອບພາບຕ່າງໆ ແລະ ສ້າງເປັນຮູບເງົາ ຕາມແຕ່ໄລຍະເວລາ ຍາວ ຫຼື ສັ້ນ. ສະນັ້ນ, ເພື່ອເປັນການຄຸ້ມຄອງຕໍ່ບັນດາສື່ເຫຼົ່ານັ້ນຈຶ່ງໄດ້ຈໍາເປັນຕ້ອງມີນິຕິກໍາດັ່ງກ່າວນີ້ຂຶ້ນ, ເພື່ອສະດວກໃນການຕິດຕາມຄຸ້ມຄອງ ຢູ່ໃນແຕ່ລະຂົງເຂດ.
ສໍາລັບກົດໝາຍວ່າດ້ວຍຮູບເງົາ ປະກອບມີ 10 ພາກ 12 ໝວດ ແລະ 71 ມາດຕາ. ກົດໝາຍດັ່ງກ່າວນີ້, ແມ່ນໄດ້ຜ່ານການປັບປຸງແຕ່ປີ 2015 ໂດຍການຮັບຮອງຈາກສະພາແຫ່ງຊາດ ໃນປີ 2019 ແລະ ມີລັດຖະດໍາລັດຂອງປະທານປະເທດ ກ່ຽວກັບການປະກາດໃຊ້ໃນວັນທີ 8 ມັງກອນ 2020.
(ຂ່າວ-ພາບ: ເພັດສາຄອນ ສິມມະວົງ)
