ໃນຕອນເຊົ້າຂອງວັນທີ 16 ສິງຫາ 2022 ນີ້ ຢູ່ທີ່ໂຮງຮຽນປະຖົມບ້ານປະລ໋ອຍ ເມືອງນອງ ແຂວງສະຫວັນນະເຂດທ່ານ ສຸກສາຄອນ ໂພທິລາດ ຮອງເລຂາພັກເມືອງ ທັງເປັນຜູ້ຊີ້ນຳວຽກງານການເມືອງ-ແນວຄິດ ໄດ້ພົບປະໂອ້ລົມອຳ ນາດການປົກຄອງ,ພໍ່ແມ່ປະຊາຊົນບ້ານປະລ໋ອຍໂດຍມີບັນດາຫ້ອງການທີ່ກ່ຽວຂ້ອງຮ່ວມຕິດຕາມ.
ໃນພິທີ ທ່ານ ພິມໄຊ ເກພະຈັນ ຮອງຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງນອງ ໄດ້ຕາງໜ້າໃຫ້ການຈັດຕັ້ງບ້ານ ລາຍງານສະພາບລວມຂອງບ້ານໃຫ້ຮູ້ວ່າ: ບ້ານປະລ໋ອຍເປັນບ້ານໜຶ່ງທີ່ຂຶ້ນກັບ ກຸ່ມບ້ານທີ 5 ເຂດຊວງ, ມີປະຊາກອນທັງໝົດ 389 ຄົນ, ຍິງ 181 ຄົນ, ເປັນຊົນເຜົ່າມັງກອນ, ມີ 72 ຄອບຄົວ, 59ຫຼັງຄາເຮືອນ, ນັບຖືຜີ , ດ້ານວຽກງານກະສິກຳ: ປະຈຸບັນບ້ານມີເນື້ອທີ່ດິນກະສິກຳ 255ເຮັກຕາ, ດິນປຸກສ້າງ 4 ເຮັກຕາ, ດິນສຳປະທານບໍລິສັດກວາຊາ ປູກຢາງພາລາ 153 ເຮັກຕາ, ເນື້ອທີ່ດິນຂອງປະຊາຊົນປູກພືດທັງໝົດ 118ເຮັກຕາ, ໃນນັ້ນມີເນື້ອທີ່ນາ 6 ເຮັກຕາ, ສວນປູກເຂົ້າ 50 ເຮັກຕາ, ຢາງໂບງ 7ເຮັກຕາ, ມັນຕົ້ນ 51 ເຮັກຕາ, ກ້ວຍ 4ເຮັກຕາ ແລະສັດລ້ຽງອີກຈຳນວນໜຶ່ງ.
ຈາກນັ້ນອຳນາດການປົກຄອງບ້ານກໍ່ໄດ້ມີຄຳເຫັນສະເໜີສິ່ງທີ່ຈຳເປັນອັນລວມຂອງບ້ານເຊິ່ງໄດ້ສະເໜີໃຫ້ຂັ້ນເທິງຊ່ວຍເຈາະນ້ຳບາດານໃຫ້ເພື່ອຊົມໃຊ້ພາຍໃນບ້ານ, ຊ່ວຍປັບປຸງສ້ອມແປງຫຼັງຄາໂຮງຮຽນ, ປ່ອງຢ້ຽມປະຕູ ທີ່ເຫັນວ່າມີການເປ້ເພ. ຈາກນັ້ນບັນດາພາກສ່ວນກ່ຽວຂ້ອງກໍ່ໄດ້ນຳສະເໜີບັນດາໜ້າວຽກແຕ່ລະຫ້ອງການ ເພື່ອໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈເຖິງຄວາມໝາຍຄວາມສຳຄັນໃນແຕ່ລະວຽກ.
ໂອກດນີ້ ທ່ານ ສຸກສາຄອນ ໂພທິລາດ ຮອງເລຂາພັກເມືອງ ຜູ້ຊີ້ນຳວຽກງານການເມືອງແນວຄິດກໍ່ໄດ້ມີຄຳເຫັນບາງບັນຫາທີ່ສຳຄັນໃຫ້ກັບອຳນາດການປົກຄອງບ້ານຈົ່ງຊ່ວຍກັນເອົາໃຈໃສ່ຊຸກຍູ້ສົ່ງເສີມລູກຫຼານໃຫ້ປະຕິບັດຕາມແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ທຸກຄົນຕ້ອງປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດນຳເອົາເນື້ອໃນຈິດໃຈທີ່ໄດ້ສະເໜີມານັ້ນໄປຈັດຕັ້ງປະຕິບັດໃຫ້ເກີດດອກອອກຜົນ ເພື່ອເຮັດໃຫ້ບ້ານ ຂອງຕົນໄດ້ຮັບການຫຼຸດພົ້ນອອກຈາກຄວາມທຸກຍາກເທື່ອລະກ້າວ.
#Medialaos MMD
