ໃນໂອກາດທີ່ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະ ເດີນທາງຢ້ຽມຢາມ, ເຮັດວຽກຢູ່ແຂວງອຸດົມໄຊ ເມື່ອບໍ່ດົນມານີ້ ຊຶ່ງທ່ານໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳ 12 ບັນຫາ ໃຫ້ການນໍາແຂວງອຸດົມໄຊເອົາໃຈໃສ່ດັ່ງນີ້:
1. ສະເໜີໃຫ້ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ປົກປັກຮັກສາຄວາມສະຫງົບແຂວງຂອງຕົນ; ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງຖິ່ນຮາກຖານ ໃຫ້ເຂັ້ມແຂງ, ໜັກແໜ້ນ; ສະກັດກັ້ນອາຊະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ຄຸ້ມຄອງສໍາມະໂນຄົວ, ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດໝາຍ.
2. ໃຫ້ຄະນະພັກ, ສະພາປະຊາຊົນແຂວງ ແລະ ອົງການປົກຄອງແຂວງອຸດົມໄຊ ເອົາໃຈໃສ່ສຶກສາອົບຮົມ ໃຫ້ປະຊາຊົນບັນດາເຜົ່າ ມີຄວາມສາມັກຄີປອງດອງ, ມີນໍ້າໃຈຮັກຊາດ ແລະ ມີນໍ້າໃຈເສຍສະຫຼະ ເພື່ອຜົນປະໂຫຍດສ່ວນລວມ, ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ.
3. ສະເໜີໃຫ້ການນໍາແຂວງ ເພີ່ມທະວີການນໍາພາ ຂະແໜງການທີ່ກ່ຽວຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດກະສິກໍາເປັນສິນຄ້າ ໃຫ້ມີຄວາມເໝາະສົມ; ຄົ້ນຄວ້າກໍານົດທ່າແຮງບົ່ມຊ້ອນ ໃນການຜະລິດກະສິກໍາຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເປັນຕົ້ນການປູກເຂົ້າ, ການປູກໝາກໄມ້ກິນໝາກ, ການປູກໄມ້ອຸດສາຫະກໍາ, ການປູກຜັກປອດສານພິດ, ການປຸງແຕ່ງຜະລິດຕະພັນກະສິກໍາ, ການລ້ຽງສັດໃຫຍ່ເປັນສິນຄ້າ ກໍເປັນທ່າແຮງ ແລະ ມີຕະຫຼາດຕ່າງປະເທດຮອງຮັບ ຊຶ່ງຈະເປັນຖານລາຍຮັບສໍາຄັນຂອງແຂວງ ທັງເປັນການສ້າງອາຊີບ ແລະ ລາຍຮັບອັນໝັ້ນຄົງໃຫ້ປະຊາຊົນ; ເອົາໃຈໃສ່ການສ້າງຄອບຄົວຕົວແບບຂອງການຜະລິດໃຫ້ເພີ່ມຂຶ້ນ ເພື່ອເປັນແບບຢ່າງ ແລະ ຖ່າຍທອດບົດຮຽນໃຫ້ຄອບຄົວອື່ນຕໍ່ໆໄປ; ສົ່ງເສີມການຜະລິດກະສິກໍາເປັນກຸ່ມ, ເປັນຟາມ.
4. ແຂວງອຸດົມໄຊ ເປັນແຂວງທີ່ມີຊັບພະຍາກອນທໍາມະຊາດອັນມີຄ່າຫຼາຍຊະນິດ ເປັນຕົ້ນ ບໍ່ຄໍາ, ບໍ່ທອງແດງ, ບໍ່ເຫຼັກ, ຄໍາຕົກຂ້ອນ ແລະ ແຮ່ທີ່ມີຄຸນຄ່າປະເພດຕ່າງໆ ຊຶ່ງໂຄງການຈໍານວນໜຶ່ງກໍຢູ່ໃນໄລຍະການຂຸດຄົ້ນແລ້ວ ແລະ ຈະເປັນທ່າແຮງທາງດ້ານເສດຖະກິດຂອງແຂວງ. ສະນັ້ນ, ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເພີ່ມທະວີຄວາມເອົາໃຈໃສ່ໃນການຄຸ້ມຄອງ ເຮັດໃຫ້ການຈັດຕັ້ງປະຕິບັດໂຄງການ ມີຄວາມເຂັ້ມງວດຕາມກົດໝາຍ, ຕາມສັນຍາສໍາປະທານ, ນໍາຜົນປະໂຫຍດມາສູ່ປະເທດຊາດ ແລະ ປະຊາຊົນບັນດາເຜົ່າ.
5. ແຂວງອຸດົມໄຊ ເປັນແຂວງທີ່ມີແຫຼ່ງທ່ອງທ່ຽວທໍາມະຊາດຫຼາຍແຫ່ງ ທີ່ສວຍງາມ ແລະ ດຶງດູດຄວາມສົນໃຈຂອງນັກທ່ອງທ່ຽວພາຍໃນ ແລະ ຕ່າງປະເທດ ເປັນຕົ້ນ ແຫຼ່ງທ່ອງທ່ຽວທໍາມະຊາດນໍ້າກັດຢໍລະປາ, ແຫຼ່ງທ່ອງທ່ຽວທໍາມະຊາດນໍ້າພາກ, ແຫຼ່ງທ່ອງທ່ຽວທໍາມະຊາດເມືອງປາກແບງ ແລະ ແຫຼ່ງທ່ອງທ່ຽວນໍ້າຕົກຕາດຕ່າງໆ; ສະຖານທີ່ທ່ອງທ່ຽວວັດທະນະທໍາ ຕິດພັນກັບເອກະລັກ ແລະ ພູມປັນຍາຂອງຊົນເຜົ່າຕ່າງໆ ກໍມີຫຼາຍແຫ່ງ; ອາກາດໜາວເຢັນ, ສົດຊື່ນ, ປອດໂປ່ງ ຈຶ່ງເປັນສິ່ງດຶງດູດນັກທ່ອງທ່ຽວ. ສະນັ້ນ, ຄະນະພັກແຂວງ, ສະພາປະຊາຊົນແຂວງ, ອົງການປົກຄອງແຂວງ ເອົາໃຈໃສ່ນໍາພາ ໃນການປົກປັກຮັກສາແຫຼ່ງທ່ອງທ່ຽວໃຫ້ມີຄວາມຍືນຍົງ, ດຶງດູດການລົງທຶນເຂົ້າໃນການພັດທະນາແຫຼ່ງທ່ອງທ່ຽວດັ່ງກ່າວ ໃຫ້ເປັນຖານລາຍຮັບດ້ານງົບປະມານຂອງແຂວງ.
6. ໃຫ້ອົງການປົກຄອງແຂວງອຸດົມໄຊ ເອົາໃຈໃສ່ການພັດທະນາຊັບພະຍາກອນມະນຸດ ໃຫ້ສອດຄ່ອງກັບຄວາມຮຽກຮ້ອງຕ້ອງການ ຂອງການພັດທະນາເສດຖະກິດ-ສັງຄົມ, ສາມາດສະໜອງບຸກຄະລາກອນໃຫ້ແກ່ໂຄງການລົງທຶນຕ່າງໆ; ເອົາໃຈໃສ່ການສ້າງວິຊາຊີບໃຫ້ປະຊາຊົນບັນດາເຜົ່າ ໂດຍສະເພາະການຝຶກວິຊາຊີບໃຫ້ແກ່ຊາວໜຸ່ມທີ່ເປັນລູກຫຼານ ຫັນມາເປັນເຈົ້າຂອງກິດຈະການຂະໜາດນ້ອຍ, ຂະໜາດກາງ.
7. ປັບປຸງລະບົບກົງຈັກການຈັດຕັ້ງ ແລະ ການເຄື່ອນໄຫວຂອງອົງການອໍານາດລັດຢູ່ແຂວງ ໃຫ້ມີປະສິດທິພາບ, ເຮັດໃຫ້ກົງຈັກກະທັດຮັດເປັນລະບົບໂລ່ງລ່ຽນ; ສະກັດກັ້ນການນໍາໃຊ້ສິດ, ອໍານາດໃນທາງທີ່ບໍ່ຖືກຕ້ອງຕາມກົດໝາຍຂອງເຈົ້າໜ້າທີ່ຂອງລັດທຸກຂັ້ນ; ສ້າງເງື່ອນໄຂອໍານວຍຄວາມສະດວກໃຫ້ປະຊາຊົນ ສາມາດເຂົ້າເຖິງຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນຂອງປະຊາຊົນ ຕໍ່ພັກ-ລັດດີຂຶ້ນເລື້ອຍໆ.
8. ສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງອຸດົມໄຊ ເພີ່ມທະວີການໂຄສະນາເຜີຍແຜ່ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນຢ່າງກວ້າງຂວາງ ແລະ ຖືເອົາວາລະແຫ່ງຊາດ ເປັນພາລະກິດທົ່ວປວງຊົນ ຊຶ່ງສະມາຊິກພັກ, ພະນັກງານ-ລັດຖະກອນ ກໍຄືປະຊາຊົນບັນດາເຜົ່າ ຈະຕ້ອງໄດ້ຮ່ວມແຮງຮ່ວມໃຈກັນຈັດຕັ້ງປະຕິບັດ; ຄຸ້ມຄອງການເກັບລາຍຮັບງົບປະມານບໍ່ໃຫ້ຮົ່ວໄຫຼ ມີກົນໄກຕິດຕາມ, ກວດກາຢ່າງເຂັ້ມງວດ; ເອົາໃຈໃສ່ການຄຸ້ມຄອງລາຍຈ່າຍ ແລະ ຈັດຕັ້ງປະຕິບັດບັນດາມາດຕະການປະຢັດ, ເຂັ້ມງວດວິໄນລາຍຈ່າຍ, ປະຢັດລາຍຈ່າຍບໍລິຫານ ແລະ ການລົງທຶນຂອງລັດ.
9. ວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ຊຶ່ງເຫັນວ່າຢາເສບຕິດເປັນໄພອັນຕະລາຍຕໍ່ສັງຄົມ, ເປັນສາເຫດຂອງການເກີດອາຊະຍາກໍາປະເພດຕ່າງໆ. ສະນັ້ນ, ຄະນະພັກ, ສະພາປະຊາຊົນແຂວງ, ອົງການປົກຄອງແຂວງອຸດົມໄຊ ເອົາໃຈໃສ່ປຸກລະດົມຂົນຂວາຍໃຫ້ປະຊາຊົນບັນດາເຜົ່າ ເຫັນໄດ້ຜົນຮ້າຍຂອງບັນຫາຢາເສບຕິດ.
10. ເອົາໃຈໃສ່ຊີ້ນໍາອົງການປົກຄອງແຕ່ລະຂັ້ນ ຕິດຕາມ, ເກັບກໍາຂໍ້ມູນ ການລະບາດຂອງພະຍາດໂຄວິດ-19 ຢູ່ທ້ອງຖິ່ນຂອງຕົນ ເພື່ອສາມາດກໍາໄດ້ສະພາບ ແລະ ແກ້ໄຂບັນຫາໃຫ້ທັນເວລາ.
11. ສະເໜີໃຫ້ຄະນະພັກແຂວງອຸດົມໄຊ ເພີ່ມທະວີຄວາມເອົາໃຈໃສ່ນໍາພາການປະຕິບັດໜ້າທີ່ຂອງສະພາປະຊາຊົນແຂວງ ເຮັດໃຫ້ການເປັນອົງການຕົວແທນ ແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າພາຍໃນແຂວງ ມີຄຸນນະພາບ ແລະ ປະສິດທິຜົນສູງຂຶ້ນ.
12. ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ຕ້ອງໄດ້ເອົາໃຈໃສ່ເກັບກໍາ, ສັງລວມເອົາບັນຫາຕ່າງໆ ກ່ຽວກັບການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງທ້ອງຖິ່ນ ນໍາໄປສະເໜີຕໍ່ກອງປະຊຸມສະພາແຫ່ງຊາດ ເພື່ອພິຈາລະນາ, ຊອກຫາວິທີການແກ້ໄຂ.
ຂ່າວ: ສະພາ
#Medialaos MMD
