ສຳນັກຂ່າວ ຣອຍເຕີ, ວັນທີ14ສິງຫານີ້, ຫລາຍປະເທດໃນເອີຣົບຍັງຄົງປະເຊີນຜົນກະທົບຈາກສະພາວະໂລກຮ້ອນ ແລະ ການປ່ຽນແປງຂອງດິນຟ້າອາກາດຢ່າງຕໍ່ເນື່ອງ ໃນປີນີ້ຫລ້າສຸດໄພແຫ້ງແລ້ງທີ່ຍາວນານ ແລະ ຮ້າຍແຮງ ໄດ້ບັງຄັບໃຫ້ ອັງກິດກໍານົດຂໍ້ຈໍາກັດການນຳໃຊ້ນ້ຳໃນບາງພື້ນທີ່ ແລະ ກະກຽມຮັບມືກັບການຂາດແຄນໄຟຟ້າຍ້ອນວິກິດການ ໄພແຫ້ງແລ້ງ ສົ່ງຜົນກະທົບຕໍ່ ການຜະລິດ ຂອງໂຮງງານໄຟຟ້າພະລັງງານນ້ຳ ຊຶ່ງເປັນແຫລ່ງຜະລິດໄຟຟ້າທີ່ສຳຄັນຂອງເອີຣົບ ຫລຸດລົງ20% ເນື່ອງຈາກ ປະລິມານນ້ຳໃນອ່າງເກັບນ້ຳ ແລະ ແມ່ນ້ຳຫລຸດລົງຈົນເຖິງລະດັບບໍ່ພຽງພໍ ຕໍ່ການຜະລິດໄຟຟ້າ.
ຂະນະ ທີ່ໂຮງໄຟຟ້າ ນີວເຄຣຍ ບາງແຫ່ງຕ້ອງຢຸດແລ່ນເຄື່ອງຈັກຍ້ອນຂາດແຄນນ້ຳເພື່ອເຮັດໃຫ້ເຕົາປະຕິກອນເຮັດຄວາມເຢັນ. ປະຈຸບັນ, ຫລາຍແຫ່ງຂອງອັງກິດພວມຜະເຊີນໜ້າກັບໄພແຫ້ງແລ້ງ ແລະ ວິກິດການຄວາມຮ້ອນທີ່ຮ້າຍແຮງ. ຂະນະນີ້ ເຈົ້າໜ້າທີ່ທາງການໄດ້ປະກາດໃຫ້ 8 ພື້ນທີ່ ລວມທັງ ນະຄອນຫລວງລອນດອນເປັນເຂດປະເຊີນໄພແຫ້ງແລ້ງ.
ບໍລິສັດ ນ້ຳປະປາ ຢ່າງນ້ອຍ 3ແຫ່ງ ອອກຄໍາສັ່ງຫ້າມໃຊ້ນ້ຳ ສໍາລັບກິດຈະກໍາທີ່ໃຊ້ນ້ຳຫລາຍເກີດໄປ ເປັນຕົ້ນ ການຕື່ມນ້ຳ ໃນສະລອຍນ້ໍາ. ໜອງ ຫລື ນ້ຳພຸ ຢູ່ໃນພື້ນທີ່ສ່ວນຕົວ ການໃຊ້ສາຍຢາງຫົດນ້ຳຕົ້ນໄມ້ ລວມທັງລ້າງຍານພາຫະນະອື່ນໆ.
ຮຽບຮຽງຂ່າວໂດຍ: ສະໄຫວ ລາດປາກດີ
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
