ມະຫາວິທະຍາໄລແຫ່ງຊາດ (ມຊ) ສອບເສັງຄັດເລືອກເອົານັກສຶກສາເພື່ອເຂົ້າສຶກສາຕໍ່ໃນລະດັບປະລິນຍາຕີ ສົກສຶກສາ 2022-2023, ໃນວັນທີ 13 ສິງຫານີ້ ທີ່ນະຄອນຫຼວງວຽງຈັນ. ໂດຍມີທ່ານ ພຸດ ສິມມາລາວົງ ລັດຖະມົນຕີ ກະຊວງ ສຶກສາທິການ ແລະ ກິລາ, ທ່ານຮຸ່ງເພັດ ຈັນທະວົງ ຮອງອະທິການບໍດີ ຜູ້ຊີ້ນໍາວຽກງານວິຊາການ ມຊ ພ້ອມດ້ວຍຄະນະນໍາ ມຊ ພ້ອມດ້ວຍຄະນະ ຄູ-ອາຈານ ເຂົ້າຮ່ວມ ຕິດຕາມການສອບເສັງ.
ທ່ານ ຮຸ່ງເພັດ ຈັນທະວົງ ໃຫ້ສໍາພາດ ວ່າ: ເພື່ອຄວາມເປັນລະບຽບຮຽບຮ້ອຍໃນການສອບເສັງຄັດເລືອກເອົານັກຮຽນ ເຂົ້າສຶກສາຕໍ່ ມຊ ໃນສົກສຶກສານີ້, ແມ່ນໄດ້ມີການກະກຽມຄວາມພ້ອມຕ່າງໆມາຕັ້ງແຕ່ເດືອນມິຖຸນາ 2022 ຊຶ່ງໄດ້ແຕ່ງຕັ້ງບັນດາຄະນະກໍາການຮັບຜິດຊອບຝ່າຍຕ່າງໆ ເຊັ່ນ: ຄະນະກໍາມະການຊີ້ນໍາ, ຄະນະກໍາມະການຍ່ອຍເພື່ອລົງເລິກແຕ່ລະໜ້າວຽກຂອງການສອບເສັງ, ຜ່ານການກະກຽມມາຮອດມື້ນີ້ ວັນທີ 13 ສິງຫາ 2022 ເປັນມື້ສອບເສັງຕົວຈິງ, ເຫັນວ່າແຕ່ລະໜ້າວຽກແມ່ນມີຄວາມພ້ອມ 100%.
ພາຍຫຼັງເປີດໃຫ້ລົງທະບຽນສະໝັກສອບເສັງ ແຕ່ວັນທີ 18 ກໍລະກົດ ຈົນຮອດມື້ປິດຮັບ ວັນທີ 10 ສິງຫາ 2022, ມີຜູ້ສະໝັກລົງທະບຽນເຂົ້າຮຽນທັງໝົດແມ່ນ 11.976 ຄົນ; ຈໍານວນຜູ້ທີ່ໄດ້ມາເອົາບັດເຂົ້າຫ້ອງສອບເສັງ ຫຼື ມີໜ້າສອບເສັງຕົວຈິງ ແມ່ນ 10.103 ຄົນ ຊຶ່ງແບ່ງອອກເປັນ 3 ເຂດການສອບເສັງ ຄື: ວິທະຍາເຂດດົງໂດກ, ວິທະຍາເຂດດອນນົກຂຸ້ມ ແລະ ວິທະຍາເຂດໂສກປ່າຫຼວງ; ປະກອບມີ 15 ຈຸດການສອບເສັງ. ລວມມີ 459 ຫ້ອງສອບເສັງ, ມີກໍາມະການຍາມຫ້ອງເສັງ 983 ທ່ານ, 1 ຫ້ອງບັນຈຸນັກສອບເສັງ 20 ຄົນ ຫາ 30 ຄົນ ຕໍ່ກໍາມະການ ຍາມຫ້ອງເສັງ 2 ທ່ານ; ສໍາລັບຕາຕະລາງການສອບເສັງແມ່ນໄດ້ແບ່ງອອກເປັນ 2 ກຸ່ມ ຄື: ກຸ່ມ A ແລະ B ; ກຸ່ມ A ກຸ່ມວິຊາທໍາມະຊາດ STEM ມີ 61 ສາຂາວິຊາ ແລະ ກຸ່ມ B ກຸ່ມວິຊາສັງຄົມສາດ NON STEM ມີ 52 ສາຂາວິຊາ ຊຶ່ງໄດ້ຈັດການສອບເສັງໃນມື້ດຽວກັນ ກໍຄືວັນທີ 13 ສິງຫາ 2022 ຊຶ່ງເປັນການສອບເສັງແບບເຊິ່ງໜ້າຄື ໃຫ້ນັກຮຽນມານັ່ງສອບເສັງຢູ່ຫ້ອງ ແລະ ປະຕິບັດຕາມມາດຕະການ ປ້ອງກັນໂຄວິດ-19 ຢ່າງເຂັ້ມງວດ. ສຳລັບກຸ່ມ A ແມ່ນສອບເສັງວິຊາຄະນິດສາດ A ແລະ ວິຊາ ຟີຊິກສາດ, ວິຊາພາສາລາວ-ວັນນະຄະດີ, ພາສາອັງກິດ, ເຄມີສາດ, ຊີວະສາດ, ກຸ່ມ B ສອບເສັງວິຊາຄະນິດສາດ B, ວິຊາພາສາລາວ-ວັນນະຄະດີ, ພາສາອັງກິດ, ພູມີສາດ, ປະຫວັດສາດ.
ໃນສົກສຶກສາ 2022-2023 ນີ້, ມຊ ມີແຜນຮັບເອົານັກສຶກສາ ເຂົ້າຮຽນທັງໝົດ 6.990 ຄົນ ໃນນີ້ປະລິນຍາຕີ 5.150 ຄົນ, ປະລິນຍາຕີຕໍ່ເນື່ອງ 1.480 ຄົນ, ຫຼັກສູດ ນາໆຊາດ+ຫຼັກສູດ ຄູພາສາຈີນ 210 ຄົນ, ອະນຸປະລິນຍາ 150 ຄົນ. ມຊ ເປັນສະຖາບັນການສຶກສາທີ່ມີຫຼາກຫຼາຍສາຂາວິຊາຮຽນ ແຫ່ງທໍາອິດຂອງລາວ ປະກອບມີ 13 ຄະນະວິຊາ, ມີຫຼັກສູດລະດັບປະລິນຍາຕີ 118 ສາຂາວິຊາ, ຫຼັກສູດຕໍ່ເນື່ອງປະລິນຍາຕີ 42 ສາຂາວິຊາ ແລະ ຫຼັກສູດລະດັບອະນຸປະລິນຍາ 4 ສາຂາວິຊາ, ນອກຈາກນີ້, ຍັງມີຫຼັກສູດປະລິນຍາເອກ 6 ຫຼັກສູດ, ຫຼັກສູດປະລິນຍາໂທ 63 ຫຼັກສູດ; ໃນແຕ່ລະສາຂາວິຊາແມ່ນລ້ວນແຕ່ມີຄວາມສໍາຄັນເທົ່າກັນ.
ພາຍຫຼັງການສອບເສັງຄາດວ່າ ຈະປະກາດຜົນການສອບເສັງ ໃຫ້ສັງຄົມຮັບຊາບກ່ອນ ວັນທີ 12 ກັນຍາ 2022 ແລະ ເປີດໃຫ້ນັກສຶກສາຜູ້ເສັງໄດ້ລົງທະບຽນ ແລະ ໃນວັນທີ 10 ຕຸລາ 2022 ນັກສຶກສາປີທີ 1 ເລີ່ມເຂົ້າຮຽນພາກຮຽນທີ 1 ຂອງສົກສຶກສາ 2022-2023.
