ບໍລິສັດ ສະຕາ ໂທລະຄົມ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ກະຊວງສຶກສາທິການ ແລະ ກິລາ ແລະ ບໍລິສັດ ສະຕາ ໂທລະຄົມ ຈຳກັດ (ຢູນີເທວ). “ການຮ່ວມມືໃນການຈັດຕັ້ງຜັນຂະຫຍາຍ ນຳໃຊ້ລະບົບເຕັກໂນໂລຊີສື່ສານ ຂໍ້ມູນຂ່າວສານ ເພື່ອຫັນເປັນທັນສະໄໝ ຂອງຂະແໜງການສຶກສາທິການ ແລະ ກິລາ ໃນຍຸກປະຕິວັດອຸດສາຫະກຳ 4.0 ຢູ່ ສປປ ລາວ” ຂຶ້ນໃນວັນທີ 12 ສິງຫາ 2022 ທີ່ສໍານັກງານໃຫຍ່ບໍລິສັດດັ່ງກ່າວ ຊຶ່ງຮ່ວມລົງນາມໃນຄັ້ງນີ້ ລະຫວ່າງ ທ່ານ ບຸນມີ ມາລາວົງ ຮອງຜູ້ອຳນວຍການໃຫຍ່ ບໍລິສັດ ສະຕາ ໂທລະຄົມ ຈໍາກັດ ແລະ ທ່ານ ນາງ ດາລາວອນ ກິດຕິພັນ ຫົວໜ້າຫ້ອງການກະຊວງສຶກສາທິການ ແລະ ກິລາ. ໂດຍມີ ທ່ານ ສີລີອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ພົນຕີ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ ປະທານສະພາບໍລິຫານ ບໍລິສັດ ສະຕາໂທລະຄົມຈໍາກັດ ພ້ອມດ້ວຍຄະນະ ແລະ ທ່ານ ເຈີ່ນ ຈຸງ ຮືງ ຜູ້ອໍານວຍການໃຫຍ່ ບໍລິສັດ ສະຕາໂທລະຄົມຈໍາກັດເຂົ້າຮ່ວມເປັນສັກຂີພະຍານ.
ໃນການຮ່ວມມືຂອງສອງຝ່າຍຄັ້ງນີ້ແມ່ນ ການຮ່ວມມື ຂອງອົງການລັດ ກັບ ບໍລິສັດລັດວິສາຫະກິດ, ເຂົ້າໃນວຽກງານການຮ່ວມມື ໃນການຈັດຕັ້ງຜັນຂະຫຍາຍນໍາໃຊ້ລະບົບເຕັກໂນໂລຊີຂໍ້ມູນຂ່າວສານເພື່ອຫັນເປັນທັນສະໄໝຂະແໜງສຶກສາ, ໃນຍຸກປະຕິວັດອຸດສາຫະກໍາ 4.0 ຂອງໂລກ, ແນໃສ່ເຮັດໃຫ້ການພັດທະນາ, ບໍລິການລະບົບການສຶກສາເປັນດີຈີຕອນ ແລະທັນສະໄໝ, ເພື່ອເປັນການຊຸກຍູ້ ແລະ ສົ່ງເສີມ ການຄຸ້ມຄອງ, ການບໍລິຫານ ລວມທັງການບໍລິການ ໃຫ້ແກ່ ລັດຖະບານ ແລະ ສັງຄົມ, ຕອບສະໜອງໄດ້ກັບຄວາມຕ້ອງການ “ຫັນເປັນດີຈີຕອນ” ດ້ວຍລະບົບເຕັກໂນໂລຊີທີ່ທັນສະໄໝ ຕາມນະໂຍບາຍ ແລະ ແຜນພັດທະນາ ຂອງລັດຖະບານ, ຮັບປະກັນສິດຜົນປະໂຫຍດ ທັງສອງຝ່າຍ ຕາມຈຸດປະສົງຂອງໂຄງການຮ່ວມມື.
ທ່ານ ບຸນມີ ມາລາວົງ ກ່າວວ່າ: ບໍລິສັດ ສະຕາ ໂທລະຄົມ ໄດ້ສືບຕໍ່ພັດທະນາພື້ນຖານໂຄງລ່າງລະບົບເຄືອຂ່າຍ ໂທລະຄົມມະນາຄົມ ໃນຂອບເຂດທົ່ວປະເທດ ໄປຄຽງຄູ່ກັບເຕັກໂນໂລຊີທີ່ທັນສະໄໝ ທີ່ສຸດຂອງໂລກ, ໃນຍຸກປະຕິວັດອຸດສະຫະກໍາ 4.0 ຂອງໂລກ, ຢູນີເທວ ຕ້ອງໄດ້ກ້າວເຂົ້າສູ່ໄລຍະໃໝ່ຢ່າງເປັນທາງການ ແລະ ຈະໄດ້ກາຍເປັນບໍລິສັດ ເຕັກໂນໂລຊີຂໍ້ມູນຂ່າວສານ, ນໍາໜ້າໃນການປະຕິວັດ ຫັນເປັນດີຈີຕອນຂອງປະເທດ, ນໍາເອົາລະບົບດີຈີຕອນເຂົ້າສູ່ການດໍາລົງຊີວິດຂອງປະຊາຊົນ, ເພື່ອຮັບໃຊ້ໃຫ້ດີທີ່ສຸດຕໍ່ກັບສັງຄົມ ແລະ ປະຊາຊົນ, ໃຫ້ນໍາທັນກັບເຕັກໂນໂລຊີຂອງໂລກ.ດ້ວຍຄວາມເຊື່ອໝັ້ນ ແລະ ໄວ້ວາງໃຈຂອງກະຊວງສຶກສາທິການ ແລະ ກິລາ, ຕໍ່ກັບປະສົບການ ແລະ ທ່າແຮງຄວາມອາດສາມາດໃນການຈັດຕັ້ງຜັນຂະຫຍາຍ ບັນດາວິທີການ ທາງດ້ານເຕັກໂນໂລຊີຂໍ້ມູນຂ່າວສານ, ຍ້ອນແນວນັ້ນ ບໍລິສັດ ສະຕາ ໂທລະຄົມ ຈຶ່ງໄດ້ຄັດເລືອກເອົາເປັນຜູ້ຮ່ວມງານ, ຮ່ວມມື ກັບກະຊວງສຶກສາທິການ ແລະ ກິລາ,ໃນການປະຕິບັດແຜນການ ການຮ່ວມມືໃນການຈັດຕັ້ງຜັນຂະຫຍາຍນໍາໃຊ້ລະບົບເຕັກໂນໂລຊີຂໍ້ມູນຂ່າວສານເພື່ອຫັນເປັນທັນສະໄໝຂະແໜງສຶກສາໂດຍທັງສອງຝ່າຍຈະສຸມໃສ່ບັນດາເນື້ອໃນກິດຈະກໍາສຶກສາຄວາມເປັນໄປໄດ້ເພື່ອຈະນໍາໄປພັດທະນາ ບັນດາໂຄງການຮ່ວມມືໃນແຕ່ລະກິດຈະກໍາ ເຊັ່ນ: ສ້າງໂຮງຮຽນເປັນລະບົບດີຈີຕອນ ໃນຍຸກປະຕິວັດ ອຸດສາຫະກໍາ 4.0ຄື:ລະບົບຄຸ້ມຄອງໂຮງຮຽນສາມັນທີ່ທັນສະໄໝ (LAOS EDU);ລະບົບຄຸ້ມຄອງໂຮງຮຽນອະນຸບານທີ່ທັນສະໄໝ (KidsOnline);ລະບົບຄຸ້ມຄອງ ແລະ ສອບເສັງແບບອອນລາຍ(Elearning);ລະບົບປື້ມຕິດຕາມການຮຽນແບບເອເລັກໂຕນິກ(Sms edu);ໂມງຕິດຕາມເດັກນັກຮຽນແບບທັນສະໄໝ (S-Kid). ວິທີການທາງດ້ານທະນາຄານເອເລັກໂຕນິກ (UMoney) ເພື່ອສະດວກໃນການຊໍາລະເງິນເດືອນໃຫ້ກັບຄູອາຈານ, ຄ່າທໍານຽມຮຽນຂອງນັກຮຽນ, ນັກສຶກສາ; ລະບົບປະຕູຂໍ້ມູນເອເລັກໂຕນິກ (E Portal)ໃຫ້ກັບກະຊວງສຶກສາທິການ ແລະ ກິລາ ແລະ ພະແນກສຶກສາທິການ ແລະ ກິລາແຂວງ, ນະຄອນຫຼວງວຽງຈັນ ແລະ ບັນດາລະບົບ ຫຼື ຜະລິດຕະພັນອື່ນໆ ຕາມຄວາມຕ້ອງການຕົວຈິງຂອງກະຊວງສຶກສາທິການ ແລະ ກິລາ .ຂ່າວ: ຍຸພິນທອງ
