ໃນວັນທີ 11 ສີງຫາ 2022 ມານີ້ ມີຝົນຕົກໜັກຕໍ່ເນື່ອງຢູ່ທີ່ເມືອງໄຊຍະບູລີ ແຂວງໄຊຍະບູລີ, ອັນໄດ້ເຮັດໃຫ້ມີນ້ຳປ່າໄຫຼຊຸແຮງເຂົ້າຖ້ວມເຂດບ້ານເຮືອນປະຊາຊົນທີ່ຕິດແຄມນ້ຳ 2 ບ້ານຄື: ບ້ານທ່າ ແລະ ບ້ານນາມອນ ຈຶ່ງເຮັດໃຫ້ປະຊາຊົນທີ່ຢູ່ຕິດແຄມນ້ຳດັ່ງກ່າວ ໄດ້ຮັບຜົນກະທົບ ແລະ ໄດ້ສ້າງຄວາມເສຍຫາຍຫຼາຍສົມຄວນ ໂດຍສະເພາະ ບ້ານທ່າ ແມ່ນຂົວຂ້າມນ້ຳຂາດ ແລະ ເຮືອນຂອງປະຊາຊົນເປ່ເພຈຳນວນ 1 ຫຼັງ.
ປັດຈຸບັນບໍ່ສາມາດປະເມີນຄວາມເສຍຫາຍໄດ້ເທື່ອ, ສ່ວນຂົວດັ່ງກ່າວທາງພາກສ່ວນທີ່ກ່ຽວຂ້ອງກຳລັງເລັ່ງສ້ອມແປງເພື່ອໃຫ້ນຳໃຊ້ໄດ້ປົກກະຕິ ເພື່ອເປັນການບັນເທົາທຸກເບື້ອງຕົ້ນ. ໃນວັນທີ 12 ສິງຫາ 2022 ມານີ້, ທ່ານ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງໄຊຍະບູລີ ພ້ອມດ້ວຍຄະນະກຳມະການຄ້ມຄອງໄພພິບັດ ຂັ້ນເມືອງກໍໄດ້ນຳເອົາເຄື່ອງໃຊ້ທີ່ຈຳເປັນມອບໃຫ້ຄອບຄົວທີ່ໄດຮັບຜົນກະທົບດັ່ງກ່າວ ຊຶ່ງເຄື່ອງທີ່ນຳມາມອບໃນຄັ້ງນີ້ ປະກອບມີ ເຂົ້າສານ, ເຄື່ອງໃຊ້ໃນຄົວເຮືອນ ແລະ ເຄື່ອງນຸ່ງຫົ່ມ ລວມມູນຄ່າ 2 ລ້ານ 5 ແສນກວ່າກີບ, ກ່າວມອບໂດຍທ່ານ ເຈົ້າເມືອງໄຊຍະບູລີ ແລະ ກ່າວຮັບໂດຍແມ່ນຄອບຄົວທີ່ຖືກຜົນກະທົບໃນໂອກາດດຽວກັນນີ້ຄະນະກຳມະການຄຸ້ມຄອງໄພພິບັດ ຂັ້ນເມືອງ ຂໍແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງທຸກພາກສ່ວນ ພາຍໃນເມືອງ ໂດຍສະເພາະຜູ້ທີ່ອາໄສ ຢູ່ລຽບຕາມ ແຄມແມ່ນໍ້າ ຈົ່ງມີສະຕິລະມັດລະວັງຕໍ່ສະພາບຝົນຕົກໜັກໃຫ້ຕິດຕາມການລາຍງານຂ່າວພະຍາກອນອາກາດຈາກ ກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.
ຂ່າວ: ສົມພົງ ສີສະຫວັດ
