ເຕັກນິກຂັບລົດລຸຍນໍ້າຖ້ວມໃຫ້ປອດໄພ
ລະດູຝົນ ເປັນບັນຫາໜື່ງທີ່ຄົນຂັບລົດຕ້ອງພົບອຸປະສັກ ໃນການຂັບລົດລຸຍນໍ້າຖ້ວມ ເຊີ່ງມີຄວາມສ່ຽງກັບລົດ ແລະ ການເກີດອຸບັດຕິເຫດໄດ້ ແຕ່ຖ້າຫຼີກລ້ຽງບໍ່ໄດ້ ເຮົາມີຄຳແນະນຳດີໆ ມາຝາກທ່ານ!.
ສັງເກດລະດັບນໍ້າ: ສີ່ງທຳອິດທີ່ຕັດສິນໃຈຈະຂັບລົດລຸຍນໍ້າ ຄວນສັງເກດເບີ່ງລະດັບນໍ້າສູງຊໍາໃດ ເຊີ່ງມີອົງປະກອບ 2 ຢ່າງທີ່ຕ້ອງພິຈາລະນາ ເຊັ່ນ: ຄວາມສູງລະດັບນໍ້າ ແລະ ຄວາມສູງຂອງລົດທີ່ຂັບຂີ່ ຄວນເບີ່ງລະດັບນໍ້າວ່າສາມາດຂັບໄປໄດ້ບໍ່? ລະດັບນໍ້າສູງບໍ່ເກີນ 30 ຊັງຕີແມັດ ໂດຍປຽບທຽບກັບຟຸດບາດຈາກປົກກະຕິມີຄວາມສູງປະມານ 10-20 ຊັງຕີແມັດ ຫາກລະດັບນໍ້າຖ້ວມສູງກ່ອນຟຸດບາດ ຫຼື ນໍ້າຖ້ວມເຖີງລະດັບຂອບປະຕູ ບໍ່ຄວນຈະຂັບລົດລຸຍຕໍ່ໄປໃນເສັ້ນທາງນັ້ນ ເພາະນໍ້າອາດຈະເຂົ້າຫ້ອງໂດຍສານ ສົ່ງຜົນກະທົບໃຫ້ໄຟຊ໊ອດ ແລະ ເຄື່ອງຈັກອາດຈະດັບກາງທາງໄດ້ ແລະ ຄວນຈະຂັບລົດເຂົ້າຫາເລນທີ່ມີລະດັບນໍ້າຕໍ່າ ຫຼີກລ້ຽງເລນທີ່ມີນໍ້າສູງ ເຊີ່ງສາມາດຊ່ວຍຫຼຸດຄວາມສ່ຽງນໍ້າເຂົ້າເຄື່ອງຈັກໄດ້ຫຼາຍຂື້ນ.
- ລະດັບນໍ້າຖ້ວມບໍ່ເກີນ 20 ຊັງຕີແມັດ ລະດັບນໍ້າຈະຢູ່ບໍລິເວນເຄີ່ງລໍ້ຂອງລົດທີ່ມີຂະໜາດນ້ອຍ ແລະ ລົດຂະໜາດກະບະທີ່ບໍ່ໄດ້ຍົກສູງ ແລະ ສາມາດຂັບລົດລຸຍນໍ້າຖ້ວມໄປໄດ້ຢ່າງປອດໄພ ບໍ່ມີອັນຕະລາຍກັບລົດ ແລະ ເຄື່ອງຈັກ.
- ລະດັບນໍ້າ 20-40 ຊັງຕີແມັດ ລະດັບນໍ້າໃນລະດັບນີ້ຈະຢູ່ສູງກ່ວາເຄີ່ງຢາງລົດຂະໜາດນ້ອຍ ແລະ ລົດຂະໜາດກາງ ຫຼື ສູງຈາກພື້ນປະມານ 15-18 ຊັງຕີແມັດ ຖ້າຂັບລົດລຸຍນໍ້າຕໍ່ໄປ ທໍ່ໄອເສຍອາດຈະຈົມຢູ່ໃນລະດັບດຽວກັບນໍ້າທີ່ຖ້ວມພໍດີ ສາມາດຂັບລົດລຸຍໄປໄດ້ໃນໄລຍະສັ້ນໆ ແຕ່ໃນກໍລະນີໄລຍະໄກໆ ບໍ່ຄວນຂັບລົດລຸຍຕໍ່ໄປເດັດຂາດ.
- ລະດັບນໍ້າ 40-60 ຊັງຕີແມັດ ລົດຂະໜາດນ້ອຍ ແລະ ລົດຂະໜາດກາງທຸກຊະນິດ ບໍ່ຄວນຂັບຜ່ານ ແຕ່ລົດກະບະຍົກສູງ ອ໊ອບໂຣດ ຫຼື ໂຟວິນ ສາມາດຂັບຜ່ານໄປໄດ້ສະບາຍ ແຕ່ກໍ່ຕ້ອງລະມັດລະວັງ.
- ລະດັບນໍ້າ 60-80 ຊັງຕີແມັດ ລົດທຸກຊະນິດບໍ່ຄວນຂັບລຸຍນໍ້າຢ່າງເດັດຂາດ ເພາະນໍ້າທີ່ຖ້ວມສູງຮອດກະໂປງລົດອາດຈະໄຫຼເຂົ້າຊ່ອງກອງອາກາດ ເຮັດໃຫ້ເຄື່ອງຈັກດັບກາງທາງໄດ້ ສ່ວນກະບະທີ່ຍົກສູງ ອ໊ອບໂຣດ ຫຼື ໂຟວິນ ສາມາດຂັບລຸຍໄປໄດ້ ແຕ່ກໍ່ອາດຈະເກີດອັນຕະລາຍຂື້ນໄດ້ ດັ່ງນັ້ນຈີ່ງຄວນຫຼີກລ້ຽງການຂັບລົດລຸຍນໍ້າຕໍ່ໄປໃນເສັ້ນທາງນັ້ນ.
ບໍ່ຄວນເລັ່ງຄວາມໄວ: ໃນໄລຍະລະດູຝົນ ຫຼື ຕ້ອງຂັບລົດລຸຍນໍ້າຖ້ວມ ລົດອາດຈະເສຍການຊົງໂຕ ແລະ ເກີດອຸບັດຕິເຫດໄດ້ງ່າຍ ດັ່ງນັ້ນ ການຮັກສາຄວາມໄວໃຫ້ສະໝໍ່າສະເໝີ ຈີ່ງເປັນສີ່ງສຳຄັນຫຼາຍ ຄວນຈະຫຼຸດຄວາມໄວລົງ ບໍ່ເລັ່ງເຄື່ອງຈັກ ຫຼື ປ່ຽນຄວາມໄວກະທັນຫັນ ຄວນໃຊ້ຄວາມໄວຕໍ່າ ແລະ ໃຫ້ຢຽບເບກລົດຄ່ອຍໆ ຢໍ້າໆ ຕະຫຼອດເວລາທີ່ຂັບລົດດ້ວຍຄວາມໄວຕໍ່າ ເຊີ່ງສາມາດຊ່ວຍໄລ່ນໍ້າ ແລະ ຄວາມຊຸ່ມຈາກເຄື່ອງຈັກໄດ້.
ໃຊ້ເກຍຕໍ່າ: ຂັບລົດລຸຍນໍ້າໂດຍການໃຊ້ເກຍຕໍ່າ ເປັນພາວະທີ່ເຄື່ອງຈັກດັບໄດ້ຍາກທີ່ສຸດ ເນື່ອງຈາກໃນຮອບເຄື່ອງຈັກ 1,500-2,000 ຮອບຕໍ່ນາທີ ສຳລັບລົດທຳມະດາ ເປັນຕົ້ນການໃສ່ເກຍ 1 ຫຼື 2 ເທົ່ານັ້ນ. ສ່ວນລົດເກຍອໍໂຕ້ຄວນໃຊ້ເກຍ L ຊື່ງຕໍ່າກ່ອນນີ້ເຄື່ອງຈັກອາດຈະດັບກາງທາງ ຫຼື ຖ້າສູງກ່ວານີ້ກໍ່ອາດຈະດູດອາກາດ ແລະ ເຮັດໃຫ້ນໍ້າເຂົ້າເຄື່ອງຈັກໄດ້.
ປິດລະບົບເຄື່ອງດັບອາກາດ: ໃນກໍລະນີທີ່ນໍ້າຖ້ວມສູງຫຼາຍ ຫຼື ສູງບໍ່ເກີນ 10 ຊັງຕີແມັດ ສາມາດໃຊ້ແອໄດ້ຕາມປົກກະຕິ ແຕ່ຖ້າລະດັບນໍ້າຖ້ວມສູງເກີນ 10 ຊັງຕີແມັດຂື້ນໄປ ຄວນຈະປິດແອທັນທີ ແລະ ເປີດແວ່ນລະບາຍອາກາດ ເນື່ອງຈາກໃບພັດອາດຈະພັດນໍ້າເຂົ້າເຄື່ອງຈັກ ຫຼື ເຂົ້າໄປໃນລະບົບໄຟຟ້າໄດ້ ເພາະຖ້າເປີດແອຕໍ່ໄປຈະເຮັດໃຫ້ພັດລົມລະບາຍຄວາມຮ້ອນຂອງໝໍ້ນໍ້າເຮັດວຽກ ເມື່ອນໍ້າຖ້ວມຮອດພັດລົມ ກໍ່ຈະເຮັດໃຫ້ພັດລົມຕີນໍ້າກະຈາຍໄປທົ່ວເຄື່ອງຈັກໄດ້ ເປັນສາເຫດທີ່ເຮັດໃຫ້ລົດດັບ ຫຼື ເກີດໄຟຟ້າຊ໊ອດນຳອີກ.
ຮັກສາໄລຍະຫ່າງລົດທາງໜ້າໃຫ້ຫຼາຍ: ໃນຂະນະຂັບລົດລຸຍນໍ້າຖ້ວມ ຄວນຈະຮັກສາໄລຍະຫ່າງລົດທາງໜ້າໃຫ້ຫຼາຍໆ ປະມານ 50 ແມັດ ເນື່ອງຈາກວ່າລະບົບເບກທີ່ແຊ່ນໍ້າຢູ່ຈະມີປະສິດທິພາບຫຼຸດລົງ ແລະ ຈະໄດ້ເບີ່ງທັດສະນະວິໄສໄດ້ດີຂື້ນ ສັງເກດຈາກລົດທາງໜ້າວ່າສາມາດແລ່ນໄດ້ປອດໄພ ຫຼື ບໍ່ມີຂຸມ ຫຼື ມີສີ່ງກີດຂວາງ ຫຼື ບໍ່? ເພື່ອຈະໄດ້ຫຼີກລ້ຽງໄດ້ທັນເວລາ ແລະ ບໍ່ໃຫ້ເກີດອຸບັດຕິເຫດ.
ຖ້າມອດຈັກ ຫ້າມສະຕາດລົດ: ຖ້າຕັດສິນໃຈຂັບລົດລຸຍນໍ້າຖ້ວມແລ້ວ ແຕ່ລົດພັດເກີດດັບກາງທາງສີ່ງທີ່ຕ້ອງເຮັດແມ່ນຍູ້ລົດໄປແຄມໆ ໄປບ່ອນທີ່ສູງ ເພື່ອບໍ່ໃຫ້ນໍ້າໄຫຼເຂົ້າລົດ ຫ້າມສະຕາດລົດ ເພາະຖ້າສະຕາດລົດນໍ້າກໍ່ຈະແຮງໄຫຼເຂົ້າຈັກລົດ ແລະ ເຮັດໃຫ້ເກີດຄວາມເສຍຫາຍຫຼາຍຂື້ນ.
ວິທີຮັດລົດຫຼັງລຸຍນໍ້າຖ້ວມ
ບໍ່ມອດເຄື່ອງທັນທີ: ຫຼັງຈາກຂັບລົດລຸຍນໍ້າຖ້ວມຈົນມາຮອດຈຸດໝາຍແລ້ວ ບໍ່ຄວນມອດເຄື່ອງບາດດຽວ ເພາະຈະເຮັດໃຫ້ນໍ້າທີ່ຄ້າງຢູ່ບ່ອນທໍ່ໄອເສຍຍ້ອນກັບເຂົ້າໄປໄດ້ ແລະ ຄວາມຊຸ່ມກໍ່ຍັງມີຢູ່ ອາດເຮັດໃຫ້ເຄື່ອງຈັກເກີດຄວາມເສຍຫາຍໄດ້ ຄວນຈອດປະໄວ້ຈັກໜ້ອຍ ເພື່ອໃຫ້ນໍ້າທີ່ຕົກຄ້າງຢູ່ໃນໝໍ້ພັກທໍ່ໄອເສຍໄດ້ລະເຫີຍອອກມາໃຫ້ໝົດເສຍກ່ອນ.
ກວດສອບລະບົບເລກ: ການຢຽບເບກ 2-3 ເທື່ອກ່ອນຈະຂັບລົດອອກໄປ ສາມາດຊ່ວຍໃຫ້ຜ້າເບກ ກັບຈານເບກ ຢູ່ໃນສະພາບປົກກະຕິ ສ່ວນລົດເກຍອໍໂຕ້ ຄວນຢໍ້າເບກເພື່ອໃຫ້ໄລ່ນໍ້າອອກຈາກລະບົບເບກ ສ່ວນລົດເກຍກະປຸກ ຫຼື ເກຍທຳມະດາ ຄວນຢໍ້າຄາດ ເພື່ອປ້ອງກັນຄາດມື່ນ ແລະ ບໍ່ຄວນຂັບລົດໄວເກີນໄປ ເພື່ອຄວາມປອດໄພຂອງຕົວທ່ານເອງ.
ກວດເບີ່ງຈັກລົດ: ຖ້າພົບວ່າເຄື່ອງຈັກມີອາການຜິດປົກກະຕິ ເຊັ່ນ: ກະຕຸກ ເລັ່ງລົດບໍ່ໄປ ຫຼື ສຽງດັງກ່ວາປົກກະຕິ ຄວນຈອດລົດແລ້ວກວດເບີ່ງທັນທີ ແລະ ໃຫ້ເບີ່ງວ່າກ້ານວັດລະດັບນໍ້າມັນເຄື່ອງ ຖ້າພົບວ່າມີສີເຂັ້ມຜິດປົກກະຕິຄືກັບສີກາເຟນົມເຢັນ ສະແດງວ່າມີນໍ້າເຂົ້າໄປໃນເຄື່ອງຈັກ ຫຼັງຈາກນັ້ນໃຫ້ກວດເບີ່ງເຄື່ອງກອງອາກາດ ຖ້ານໍ້າເຂົ້າໄປເຄື່ອງກອງອາກາດທໍ່ໄອດີຈະປຽກ ຄວນຈະເອົາລົດໄປເຂົ້າສູນສ້ອມແປງ ເພື່ອໃຫ້ຊ່າງກວດ ແລະ ແກ້ໄຂໃຫ້ໄວທີ່ສຸດ ເພື່ອປ້ອງກັນບໍ່ໃຫ້ເກີດຄວາມເສຍຫາຍຫຼາຍຂື້ນ.
ກວດເບີ່ງລະບົບອີເລັກໂຕຼນິກ ແລະ ໄຟຟ້າ: ກວດເບີ່ງພາຍໃນກ່ອງຟິວ ວ່າມີຄວາມເສຍຫາຍ ຫຼື ບໍ່? ຫາກມີຄວາມເສຍຫາຍຂອງຟິວໂຕໃດກໍ່ຄວນປ່ຽນທັນທີ ໂດຍອີງໃສ່ຈາກທີ່ຝາກກ່ອງຟິວລົດ ແລະ ເບີ່ງກ່ອງອີຊີຢູຖ້າພົບວ່າປຽກນໍ້າ ໃຫ້ຟ້າວເຊັດໃຫ້ແຫ້ງ ແລະ ຄວນກວດເບີ່ງໄຟຕ່າງໆ ພາຍນອກລົດ ຖ້າຢູ່ໃນສະພາບທີ່ບໍ່ສົມບູນ ຄວນຖອດຂົ້ວຕໍ່ແບັດເຕີລີ້ອອກ ເພື່ອໃຫ້ຊ່າງໄດ້ກວດເບີ່ງ ແລະ ປະເມີນຄວາມເສຍຫາຍ.
ກວດເບີ່ງພາຍໃນຫ້ອງໂດຍສານ: ໃຫ້ສັງເກດບ່ອນພົມປູພື້ນ ຖ້າພົບວ່າທາງໃຕ້ພົມມີນໍ້າ ໃຫ້ຟ້າວເອົາພົມອອກຕາກແດດ ຄວນດູດ ຫຼື ເຊັດອອກໃຫ້ແຫ້ງທັນທີ ບໍ່ຄວນຖີ້ມນໍ້າຂັງປະໄວ້ພາຍໃນລົດ ເປີດປະຕູລົດທັງ 4 ດ້ານ ເພື່ອລະບາຍອາກາດ ໄລ່ຄວາມຊຸ່ມໃນຫ້ອງໂດຍສານ ລົດບາງລຸ້ນຈະມີໂມດູນຄວບຄຸມຖົງລົມນິລະໄພຢູ່ລຸ່ມເບາະຄົນຂັບ ຄວນເບີ່ງແຍງຮັກສາບໍ່ໃຫ້ມີຄວາມຊຸ່ມເຊັ່ນກັນ.
