ພິທີໂຮມຊຸມນຸມ ສະເຫຼີມສະຫຼອງ ວັນສ້າງຕັ້ງສານປະຊາຊົນ ຄົບຮອບ 40 ປີ (15 ສິງຫາ 1982 – 15 ສິງຫາ 2022) ໄດ້ຈັດຂຶ້ນໃນວັນທີ 12 ສິງຫາ 2022 ທີ່ນະຄອນຫຼວງວຽງຈັນ ພາຍໃຕ້ການເປັນປະທານກ່າວເປີດງານດັ່ງກ່າວໂດຍ ທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ເລຂາຄະນະບໍລິຫານງານພັກ ປະທານສານປະຊາຊົນສູງສຸດ ແຫ່ງ ສປປ ລາວ, ເປັນກຽດເຂົ້າຮ່ວມໂດຍມີ ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ, ທ່ານ ຫວງຽນ ຮວ່າ ບິ່ງ ກໍາມະການກົມການເມືອງສູນກາງພັກ ເລຂາທິການສູນກາງພັກ ປະທານສານປະຊາຊົນສູງສຸດ ແຫ່ງ ສສ ຫວຽດນາມ ພ້ອມດ້ວຍ ການນໍາພັກ-ລັດ, ພະນັກງານອາວຸໂສບໍານານ, ສະມາຊິກພັກ-ພະນັກງານ ຂອງສານປະຊາຊົນ ໃນຂອບເຂດທົ່ວປະເທດເຂົ້າຮ່ວມ.
ທ່ານ ນາງ ວຽງທອງ ສີພັນດອນ ກ່າວວ່າ: ຕະຫຼອດໄລຍະ 40 ປີ ແຫ່ງການສ້າງຕັ້ງ, ເຕີບໃຫຍ່ຂະຫຍາຍຕົວ ຂອງສານປະຊາຊົນ, ພາຍໃຕ້ການນຳພາຂອງພັກປະຊາຊົນ ປະຕິວັດລາວ ແລະ ດ້ວຍຄວາມສາມັກຄີເປັນປຶກແຜ່ນແໜ້ນໜາ, ຜ່ານຜ່າທຸກຂໍ້ຫຍຸ້ງຍາກນາໆປະການ ແລະ ດ້ວຍຄວາມຮັບຜິດຊອບສູງ ຂອງຄະນະພັກ-ຄະນະນຳ ສານປະຊາຊົນແຕ່ລະຮຸ່ນ, ແຕ່ລະໄລຍະນັບແຕ່ສານປະຊາຊົນສູງສຸດ ຮອດສານປະຊາຊົນທ້ອງຖິ່ນທຸກຂັ້ນ ທີ່ໄດ້ປະກອບສ່ວນສຳຄັນ ໃນການຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໝາຍ, ປົກປັກຮັກສາຜົນປະໂຫຍດຂອງລັດ, ສິດ ແລະ ຜົນປະໂຫຍດອັນຊອບທຳ ຂອງພົນລະເມືອງ, ຮັບປະກັນຄວາມເປັນລະບຽບຮຽບຮ້ອຍ ແລະ ຄວາມຍຸຕິທຳ ໃນສັງຄົມ ໂດຍໄດ້ເຄື່ອນໄຫວຢ່າງຕັ້ງໜ້າ ເພື່ອເຮັດສຳເລັດໜ້າທີ່ຕາມທີ່ລັດຖະທຳມະນູນ ແລະ ກົດໝາຍ ກຳນົດໄວ້ ຊຶ່ງໄດ້ຮັບຄວາມໄວ້ວາງໃຈຈາກພັກ-ລັດ, ມີຄວາມເຊື່ອຖືສັດທາຈາກປະຊາຊົນ, ເຮັດໃຫ້ການຈັດຕັ້ງຂອງສານປະຊາຊົນແຫ່ງ ສປປ ລາວ ມີການປ່ຽນແປງ, ເຕີບໃຫຍ່ຂະຫຍາຍຕົວ ແລະ ພັດທະນາສືບຕໍ່ເນື່ອງມາຢ່າງບໍ່ຢຸດຢັ້ງ.
ປັດຈຸບັນ ການຈັດຕັ້ງຂອງສານປະຊາຊົນທົ່ວປະເທດ ປະກອບດ້ວຍ: ສານປະຊາຊົນສູງສຸດ 1 ແຫ່ງ, ສານປະຊາຊົນພາກ 3 ແຫ່ງ, ສານປະຊາຊົນແຂວງ-ນະຄອນຫຼວງ 18 ແຫ່ງ ແລະ ສານປະຊາຊົນເຂດ 45 ແຫ່ງ, ສານທະຫານ 4 ແຫ່ງ; ໂຄງປະກອບກົງຈັກ ສານປະຊາຊົນສູງສຸດ ມີ 14 ໜ່ວຍງານ, ມີຫ້ອງການ, ບັນດາກົມ, ບັນດາຄະນະສານ ແລະ ສະຖາບັນ; ໂຄງປະກອບການຈັດຕັ້ງສານປະຊາຊົນພາກ, ແຂວງ-ນະຄອນ ມີ 9 ໜ່ວຍງານ, ມີກົງຈັກບໍລິຫານ ແລະ ບັນດາຄະນະສານ; ໂຄງປະກອບການຈັດຕັ້ງສານປະຊາຊົນເຂດ ມີ 6 ໜ່ວຍງານ, ມີກົງຈັກບໍລິຫານ ແລະ ບັນດາຄະນະສານ; ພະນັກງານສານປະຊາຊົນທັງໝົດມີ 1.919 ຄົນ, ໃນນີ້ມີຜູ້ພິພາກສາ 560 ຄົນ, ຜູ້ຊ່ວຍຜູ້ພິພາກສາ 516 ຄົນ, ຈ່າສານ 151 ຄົນ ແລະ ພະນັກງານບໍລິຫານ-ວິຊາການ ຈໍານວນໜຶ່ງ ແລະ ອັນທີ່ພົ້ນເດັ່ນ ແມ່ນພວກເຮົາ ໄດ້ສ້າງຕັ້ງ ຄະນະສານປົກຄອງ ຂອງ ສປປ ລາວ ຂຶ້ນ ຕາມມະຕິຕົກລົງ ຂອງຄະນະປະຈໍາສະພາແຫ່ງຊາດ ສະບັບເລກທີ 15/ຄປຈ, ລົງວັນທີ 7 ກຸມພາ 2019 ຊຶ່ງໄດ້ສ້າງຕັ້ງຂຶ້ນຢູ່ສານປະຊາຊົນສູງສຸດ, ສານປະຊາຊົນພາກກາງ ແລະ ສານປະຊາຊົນນະຄອນຫຼວງວຽງຈັນ ພ້ອມກັບເປີດໃຫ້ບໍລິການ ຮັບຄໍາຮ້ອງຟ້ອງຄະດີ ຕາມລັດຖະບັນຍັດ ຂອງປະທານປະເທດ ແຫ່ງ ສປປ ລາວ ວ່າດ້ວຍ ການດໍາເນີນຄະດີປົກຄອງ ສະບັບເລກທີ 001/ປທ, ລົງວັນທີ 19 ມີນາ 2021.
ຕະຫຼອດໄລຍະຜ່ານມາ ໄປຄ່ຽງຄູ່ກັບການປັບປຸງລະບົບການຈັດຕັ້ງ ຂອງສານປະຊາຊົນສູງສຸດ ພ້ອມດ້ວຍສານປະຊາຊົນທ້ອງຖິ່ນ ກໍໄດ້ເປີດກວ້າງການພົວພັນຮ່ວມມື ກັບບັນດາປະເທດ ໃນພາກພື້ນ ແລະ ສາກົນ ຫຼາຫຫຼາຍຮູບແບບ ແລະ ຫຼາຍລະດັບ ບົນພື້ນຖານຢຶດໝັ້ນແນວທາງການຕ່າງປະເທດຂອງພັກ ໂດຍສະເພາະ ສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ.
ໃນພິທີທີ່ມີຄວາມໝາຍສຳຄັນນີ້ ທ່ານ ບຸນທອງ ຈິດມະນີ ກໍໄດ້ ມີຄຳເຫັນວ່າ:
ຜົນສໍາເລັດທີ່ສານປະຊາຊົນຍາດມາໄດ້ຕະຫຼອດໄລຍະ 40 ປີຜ່ານມານັ້ນ ແມ່ນໃຫຍ່ຫຼວງ, ເປັນພື້ນຖານໃຫ້ແກ່ການປັບປຸງ ແລະ ພັດທະນາລະບົບສານປະຊາຊົນ ກໍຄືອົງການຕຸລາການ ໃຫ້ເປັນທີ່ເຄົາລົບ, ເຊື່ອຖືຂອງປະຊາຊົນໃນຕໍ່ໜ້າ. ເຖິງຢ່າງໃດກໍຕາມ ຖ້າທຽບໃສ່ໜ້າທີ່ການເມືອງ ຂອງສານປະຊາຊົນໃນເງື່ອນໄຂໃໝ່ ກໍຄືຢືນຢູ່ຕໍ່ໜ້າສະພາບແວດລ້ອມທີ່ຜັນແປຢ່າງວ່ອງໄວ ແລະ ການເຊື່ອມໂຍງສາກົນ ຊຶ່ງມີທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍທົດສອບຫຼາຍປະການນັ້ນ, ເຫັນວ່າສານປະຊາຊົນ ແລະ ສານທະຫານທຸກຂັ້ນ ຍັງຈະຕ້ອງໄດ້ເອົາໃຈໃສ່ບຸກບືນ, ສູ້ຊົນ ແລະ ຮັກສາມູນເຊື້ອອັນດີງາມຂອງສານປະຊາຊົນ ເພື່ອບັນລຸຈຸດໝາຍແຫ່ງການສ້າງລັດ ທີ່ປົກຄອງດ້ວຍກົດໝາຍຢູ່ປະເທດເຮົາຕາມຫຼັກການທີ່ວ່າ “ພັກນໍາພາ ແລະ ກໍາອໍານາດຕາມກົດໝາຍ, ລັດຄຸ້ມຄອງສັງຄົມ ດ້ວຍກົດໝາຍ, ປະຊາຊົນເປັນເຈົ້າສະເໝີພາບຕາມກົດໝາຍ”.
ບົນຈິດໃຈດັ່ງກ່າວນັ້ນ, ຮຽກຮ້ອງມາຍັງຄະນະພັກ, ຄະນະນໍາ ກໍຄືການຈັດຕັ້ງຂອງສານປະຊາຊົນ ແລະ ສານທະທະຫານ ທຸກຂັ້ນ ເອົາໃຈໃສ່ຕື່ມບາງບັນຫາດັ່ງນີ້:
ບັນດາສະຫາຍສະມາຊິກພັກ, ພະນັກງານ ຂອງສານປະຊາຊົນ ຕ້ອງສືບຕໍ່ເສີມຂະຫຍາຍມູນເຊື້ອ 40 ປີຂອງຕົນ,
ສືບຕໍ່ເອົາໃຈໃສ່ປັບປຸງກົງຈັກການຈັດຕັ້ງທີ່ມີແລ້ວ ໃຫ້ມີຄວາມໜັກແໜ້ນເຂັ້ມແຂງ ພ້ອມທັງບັນຈຸສັບຊ້ອນ, ຈັດວາງບຸກຄະລາກອນ ທີ່ມີຄຸນນະພາບເຂົ້າໃນຕໍາແໜ່ງງານຢ່າງເໝາະສົມ.
ສືບຕໍ່ປັບປຸງລະບອບແບບແຜນວິທີເຮັດວຽກ, ກົນໄກ ແລະ ລະບຽບການຄຸ້ມຄອງບໍລິຫານ ສານ, ບໍລິຫານຄະດີ, ການຄົ້ນຄວ້າພິຈາລະນາແກ້ໄຂຄະດີ ໃຫ້ມີຄວາມຮັດກຸມ, ວ່ອງໄວ, ໂປ່ງໃສ, ຍຸຕິທຳ, ສ້າງເງື່ອນໄຂອໍານວຍຄວາມສະດວກ ໃຫ້ປະຊາຊົນເຂົ້າເຖິງການບໍລິການຮັບໃຊ້ທີ່ວ່ອງໄວ, ທັນການ ແລະ ແທດເຖິງຕົວຈິງ.
ເພີ່ມທະວີຄວາມເອົາໃຈໃສ່ຕໍ່ການກໍ່ສ້າງ ແລະ ຍົກລະດັບຄວາມຮູ້ ຄວາມສາມາດທາງດ້ານວິຊາສະເພາະ, ວິຊາການ, ພາສາຕ່າງປະເທດ, ໃຫ້ແກ່ສະມາຊິກພັກ, ພະນັກງານ ເພື່ອຕອບສະໜອງຄວາມຕ້ອງການຂອງໜ້າທີ່ການເມືອງໃນສະເພາະໜ້າ ແລະ ຍາວນານ.
ເອົາໃຈໃສ່ຂອດປະສານສົມທົບ ໃນການດໍາເນີນຄະດີຕາມຂະບວນຍຸຕິທໍາ ເພື່ອເຮັດໃຫ້ການດໍາເນີນຄະດີ ມີຄວາມຄົບຖ້ວນ, ຮອບດ້ານ, ພາວະວິໄສ ແລະ ເປັນທໍາ ຕ້ອງມີການປະສານສົມທົບກັບທຸກພາກສ່ວນທີ່ກ່ຽວຂ້ອງ ນັບແຕ່ເຈົ້າໜ້າທີ່ຕໍາຫຼວດ, ໄອຍະການປະຊາຊົນ, ພະນັກງານປະຕິບັດຄໍາຕັດສິນຂອງສານ ລວມທັງຄະນະພັກ ແລະ ອໍານາດການປົກຄອງທຸກຂັ້ນ.
ສືບຕໍ່ກໍ່ສ້າງ ແລະ ພັດທະນາພື້ນຖານໂຄງລ່າງ ເຊັ່ນ: ຫ້ອງການເຮັດວຽກ, ບັນລັງຕັດສິນຄະ ດີ, ສາລາຮັບຕ້ອນປະຊາຊົນ ຢູ່ສານປະຊາຊົນແຕ່ລະຂັ້ນໃຫ້ດີຂຶ້ນ.
ເອົາໃຈໃສ່ເຊື່ອມຊຶມກໍາແໜ້ນ ແລະ ຈັດຕັ້ງປະຕິບັດແນວທາງການຕ່າງປະເທດຂອງພັກ, ເພີ່ມທະວີການພົວພັນຮ່ວມມືກັບສານບັນດາປະເທດເພື່ອນມິດຍຸດທະສາດ, ການພົວພັນກັບບັນດາສານປະເທດໃນກຸ່ມອາຊຽນ, ພາກພື້ນ ແລະ ສາກົນ.
ສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ ແລະ ການພົວພັນຮ່ວມມື ລະຫວ່າງສານປະຊາຊົນ ຂອງສອງປະເທດ ລາວ-ຫວຽດນາມ, ຫວຽດນາມ-ລາວ ໃຫ້ເຂົ້າສູ່ລວງເລິກ.
(ຂ່າວ: ຕຸໄລເພັດ)
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
