ອົງຄະນະພັກຫ້ອງວ່າການສູນກາງພັກ ໄດ້ຈັດກອງປະຊຸມຄົບຄະນະບໍລິຫານງານພັກ ຫ້ອງວ່າສູນກາງພັກເປີດກວ້າງ ຄັ້ງທີ 4 ສະໄໝທີ VII ຂຶ້ນ ໃນວັນທີ 10 ສິງຫາ ນີ້ ໂດຍການເປັນປະທານຂອງ ສະຫາຍ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ ເລຂາຄະນະພັກ ຫົວໜ້າຫ້ອງວ່າການສູນກາງພັກ, ມີບັນດາ ສະຫາຍຄະນະບໍລິຫານງານພັກ, ເລຂາໜ່ວຍພັກ, ກົມ ແລະ ຫົວໜ້າສາມອົງການຈັດຕັ້ງມາຫາຊົນພາຍໃນຫ້ອງວ່າການສູນກາງພັກ ເຂົ້າຮ່ວມ.
ກອງປະຊຸມໄດ້ສະຫຼຸບຕີລາຄາການນຳພາ-ຊີ້ນຳ ການເຄື່ອນໄຫວວຽກງານຮອບດ້ານ 6 ເດືອນຕົ້ນປີ ແລະ ວາງທິດທາງແຜນວຽກຈຸດສຸມ 6 ເດືອນທ້າຍປີ 2022 ຂອງຄະນະບໍລິຫານງານພັກ ຫ້ອງວ່າການສູນກາງພັກ; ຮັບຟັງການລາຍງານຜົນການຕິດຕາມການດຳເນີນຊີວິດການເມືອງຂອງບັນດາໜ່ວຍພັກ ແລະ ຜົນການສ້າງແຜນກຳນົດພະນັກງານນຳພາ-ຄຸ້ມຄອງ ຂອງຫ້ອງວ່າການສູນກາງພັກ.
ໃນໂອກາດນີ້, ສະຫາຍ ທອງສະລິດ ມັງໜໍ່ເມກ ໄດ້ເນັ້ນໜັກໃຫ້ບັນດາ ສະຫາຍຄະນະປະຈຳພັກ, ຄະນະພັກ, ເລຂາໜ່ວຍພັກ ແລະ ສາມອົງການຈັດຕັ້ງມະຫາຊົນ ສືບຕໍ່ນຳພາ-ຊີ້ນຳບັນຫາສຳຄັນ ເປັນຕົ້ນ: ຍົກສູງຄວາມຮັບຜິດຊອບຕໍ່ວຽກງານສຶກສາອົບຮົມການເມືອງແນວຄິດ ໃຫ້ສະມາຊິກພັກ-ພະນັກງານ ມີຄວາມອຸ່ນອ່ຽນທຸ່ນທ່ຽງ, ມີຄວາມເຂົ້າໃຈເລິກເຊິ່ງ ແລະ ຢຶດໝັ້ນໃນແນວທາງການເມືອງ ແລະ ແນວທາງນະໂຍບາຍຂອງພັກ ແລະ ລັດ; ຕັ້ງໜ້າປະຕິບັດໜ້າທີ່ການເມືອງ ໃນແຕ່ລະໄລຍະດ້ວຍຄວາມເປັນເຈົ້າການກວ່າເກົ່າບຸກທະລຸຫຼາຍຂຶ້ນຕື່ມອີກ; ຖືເອົາການສ້າງໜ່ວຍພັກປອດໃສ, ເຂັ້ມ ແຂງ ແລະ ໜັກແໜ້ນ ເປັນການສ້າງຂະບວນການແຂ່ງຂັນ ແລະ ກະຕຸກຊຸກຍູ້ການປະຕິບັດໜ້າທີ່ການເມືອງຂອງບັນດາໜ່ວຍພັກ ໂດຍວາງແຜນວຽກຈຸດສຸມ ໃນແຕ່ລະໄລຍະໃຫ້ລະອຽດ, ຈະແຈ້ງ ສ້າງໃຫ້ມີຜະລິດຕະພັນໃໝ່; ເພື່ອເປັນການວັດແທກຜົນງານ. ພ້ອມດຽວກັນນັ້ນ ສະຫາຍ ທອງສະລິດ ມັງໜໍ່ເມກ ຍັງໄດ້ຮຽກຮ້ອງໃຫ້ບັນດາ ສະຫາຍຄະນະພັກ, ຈົ່ງພ້ອມກັນເຊີດຊູມານະຈິດປະຕິວັດ, ອົດທົນຜ່ານຜ່າຄວາມຫຍຸ້ງຍາກ ແລະ ພ້ອມກັນຕັ້ງໜ້າຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກຫ້ອງວ່າການສູນກາງພັກ ກໍຄືການຈັ້ດຕັ້ງປະຕິບັດມະຕິຂອງກອງປະຊຸມໃຫຍ່ຂອງບັນດາໜ່ວຍພັກວາງອອກໃຫ້ມີຜົນສຳເລັດຕາມຄາດໝາຍທີ່ວາງໄວ້.
(ຂ່າວ: ຫ້ອງວ່າການສູນກາງພັກ)
