ໃນຕອນເຊົ້າຂອງ ວັນທີ 11 ສິງຫາ 2022 ຢູ່ທີ່ ກະຊວງການຕ່າງປະເທດ ໄດ້ຈັດພິທີປາຖະກະຖາ ເນື່ອງໃນໂອກາດວັນຄ້າຍວັນເກີດຂອງປະທານ ສຸພານຸວົງ ຄົບຮອບ 113 ປີ ແລະ ສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມຂຶ້ນ ໃຫ້ກຽດບັນຍາຍໂດຍ ທ່ານ ສົມສະຫວາດ ເລັ່ງສະຫວັດ, ອະດີດກໍາມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ອະດີດລັດຖະມົນຕີກະຊວງການຕ່າງປະເທດ ເຊຶ່ງມີບັນດາ ສະຫາຍ ຄະນະພັກ-ຄະນະນຳກະຊວງ, ພະນັກງານນໍາພາ-ຄຸ້ມຄອງຫຼັກແຫຼ່ງ, ບັນດາສະຫາຍສະມາຊິກພັກ ແລະ ພະນັກງານລັດຖະກອນ ຂອງກະຊວງການຕ່າງປະເທດ ເຂົ້າຮ່ວມທັງໝົດ ຫຼາຍກວ່າ 600 ສະຫາຍ.
ໃນພິທີ ທ່ານ ສົມສະຫວາດ ເລັ່ງສະຫວັດ ໄດ້ເລົ່າຄືນຜົນງານການເຄື່ອນໄຫວປະຕິວັດ ແລະ ຄຸນງາມ ຄວາມດີ ຕະຫຼອດຮອດແບບແຜນການດຳລົງຊີວິດຂອງ ປະທານ ສຸພານຸວົງ ເຊີ່ງປະຊາຊົນລາວທັງປວງໄດ້ຈົດຈຳ ຖືວ່າຢາມໃດເພີ່ນກໍເປັນຜູ້ນຳທີ່ເປັນແບບຢ່າງ, ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງສຸດກົກສຸດປາຍ, ສາ ມາດເຕົ້າໂຮມ ແລະ ນໍາພາປະຊາຊົນຕໍ່ສູ້ຕ້ານຈັກກະພັດຜູ້ຮຸກຮານຢ່າງອົງອາດກ້າຫານ, ເປັນຜູ້ທີ່ມີລະບຽບວິໄນຕໍ່ການຈັດຕັ້ງ, ມີຄວາມສາມັກຄີຮັກແພງມິດສະຫາຍ, ດຳລົງຊີວິດຢ່າງປອດໃສຂາວສະອາດ, ທ່ານແມ່ນປັນຍາຊົນຜູ້ຍິ່ງໃຫຍ່ມີນໍ້າໃຈຮັກຊາດອັນດູດດື່ມ, ມີທັດສະນະຫຼັກໝັ້ນອັນໜັກແໜ້ນ, ມີນໍ້າໃຈເສຍສະຫຼະອັນສູງສົ່ງເພື່ອຊາດ, ມີຈິດໃຈໂອບອ້ອມອາລີຊ່ວຍເຫຼືອ ແລະ ເພື່ອຜົນປະໂຫຍດຂອງປະຊາຊົນ..ຕະຫຼອດໄລຍະຊີວິດການປະຕິວັດຂອງເພີ່ນ ທຸກພາລະກິດປະຕິວັດທີ່ການຈັດຕັ້ງມອບໝາຍໃຫ້.ເພີ່ນກໍ່ລ້ວນແລ້ວແຕ່ໄດ້ອຸທິດຕົນຢ່າງໝົດຈິດໝົດໃຈ, ໃຊ້ຫົວຄິດປະດິດສ້າງ, ຄວາມຮູ້ຄວາມສາມາດ, ຄວາມເສຍສະຫຼະຂອງຕົນ ເພື່ອຄວາມເປັນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ ແລະ ຄວາມຜາສຸກຂອງປະຊາຊົນ. ຄຸນງາມຄວາມດີ ແລະ ຄວາມເປັນແບບຢ່າງຂອງເພີ່ນໄດ້ກາຍເປັນສິ່ງລ້ຳເລີດ, ເປັນບົດຮຽນອັນມີຄ່າ ທີ່ປະໄວ້ໃຫ້ຄົນຮຸ້ນຫຼັງ, ພະນັກງານ-ລັດຖະ ກອນທຸກຄົນຕ້ອງໄດ້ຈາລຶກບຸນຄຸນ ແລະ ຮໍ່າຮຽນເອົາເປັນແບບຢ່າງ ເພື່ອປະຕິບັດໜ້າທີ່ປະກອບສ່ວນເຂົ້າໃນພາ ລະກິດປົກປັກຮັກສາ ແລະ ສ້າງສາປະເທດຊາດໃນໄລຍະໃໝ່.
ນອກຈາກນີ້, ທ່ານ ສົມສະຫວາດ ເລັ່ງສະຫວັດ ໄດ້ບັນຍາຍໃຫ້ເຫັນຄວາມໝາຍ ແລະ ຄວາມສຳຄັນ ຂອງສອງວັນປະຫວັດສາດ ແຫ່ງການພົວພັນຮ່ວມມື ລາວ-ຫວຽດນາມ ທີ່ທັງສອງປະເທດກໍາລັງສະຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ (18/07/ 1977-18/07/2022) ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ (05/ 09/1962-05/ 09/2022) ເຊີ່ງໄດ້ຫວນຄືນ ແລະ ສະແດງໃຫ້ເຫັນເຖິງມູນເຊື້ອປະຫວັດສາດ ຂອງການພົວພັນຮ່ວມມືທີ່ມີມາແຕ່ດົນນານຂອງສອງພັກສອງລັດ ແລະ ປະຊາຊົນສອງຊາດ ລາວ-ຫວຽດນາມ ໄດ້ເປັນຈິດໜຶ່ງໃຈດຽວກັນ ພ້ອມກັນຕໍ່ສູ້ເພື່ອປົດປ່ອຍປະເທດຊາດຈາກພວກຈັກກະພັດຜູ້ຮຸກຮານ ຈົນສາມາດຍາດໄດ້ໄຊຊະນະ ແລະ ສະຖາປະນາປະ ເທດທີ່ປັນເອກະລາດຂອງພວກຕົນຂຶ້ນ. ການພົວພັນຮ່ວມມືລາວ-ຫວຽດນາມ ເປັນແບບຢ່າງແຫ່ງການພົວພັນທີ່ບໍລິສຸດ ແລະ ຫາຍາກຢູ່ໃນໂລກ ເຊີ່ງຜູ້ນຳພັກ-ລັດ ແລະ ປະຊາຊົນສອງຊາດ ກໍ່ໄດ້ຖະນຸຖະໜອມເພີ່ມພູນນໍ້າໃຈສາມັກຄີມິດຕະພາບ ແລະ ການພົວພັນຮ່ວມມືແບບພິເສດຢ່າງສະເໝີຕົ້ນສະເໝີປາຍ ເຊີ່ງພະນັກງານລັດຖະກອນ ແລະ ສະມາຊິກພັກ ຕ້ອງໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງ, ເລິກເຊິ່ງ, ໜັກແໜ້ນ ແລະ ພ້ອມກັນສືບຕໍ່ເສີມຂະ ຫຍາຍມູນເຊື້ອອັນດີງາມດັ່ງກ່າວນັ້ນໄວ້ໃຫ້ໝັ້ນຄົງ ເພື່ອສ້າງຄວາມເຊື່ອໝັ້ນເຊື່ງກັນ ແລະ ກັນ ແລະ ພ້ອມກັນປົກປັກຮັກສາ ແລະ ສ້າງສາພັດທະນາປະເທດຊາດ ຕາມເສັ້ນທາງສັງຄົມນິຍົມ.
ໃນຕອນທ້າຍ ທ່ານ ສົມສະຫວາດ ເລັ່ງສະຫວັດ ໄດ້ຮຽກຮ້ອງມາຍັງສະມາຊິກພັກ ແລະ ພະນັກງານລັດ ຖະກອນ ຂອງກະຊວງການຕ່າງະເທດ ຈົ່ງຮໍ່າຮຽນເອົາບົດຮຽນອັນລໍ້າຄ່າໃນການນຳພາຕໍ່ສູ້ກູ້ຊາດ ແລະ ພັດທະນາປະເທດຊາດ ຂອງ ປະທານ ສຸພານຸວົງ ແລະ ມູນເຊື້ອສາຍພົວພັນຮ່ວມມືແບບພິເສດ ລາວ-ຫວຽດນາມ ເຂົ້າໃນວຽກງານການພົວພັນຕ່າງປະເທດ ແລະ ພາລະກິດປົກປັກຮັກສາ ແລະ ສ້າງສາປະເທດຊາດໃຫ້ຈະເລີນຮຸ່ງເຮືອງ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
