ໃນວັນທີ 8 ສິງຫາ 2022 ນີ້ ຄະນະກຳມະການຈັດການແຂ່ງຂັນ ກິລາການທະຫານສາກົນ ຂອງເຫຼົ່າຮົບຊ່າງແສງ ໄດ້ຈັດພິທີເປີດການແຂ່ງຂັນ ກິລາ (ARMY GAMES 2022) ຢູ່ທີ່ກອງພົນນ້ອຍຊ່າງແສງ 73420 ຂອງເມືອງໂວນກາກຼາດ, ແຫ່ງສະຫະພັນລັດເຊຍ (ໃນຮູບແບບຊ່າງແສງ ) ເຂົ້າຮ່ວມໃນພິທີມີ ທ່ານ ພັນເອກ ເຈຍເຣດນີເຈັນໂກ ຢູຣີ ອາເລັກເຊຍວິດ ຫົວໜ້າຄະນະຊີ້ນຳກຳມະການກິລາການທະຫານສະຫະພັນລັດເຊຍ ເຂົ້າຮ່ວມເປັນປະທານ, ສວນທິມນັກກິລາເຫຼົ່າຮົບຊ່າງແສງກອງທັບປະຊາຊົນລາວ ມີສະຫາຍ ພັນເອກ ບຸນທະວີ ໂພໄຊ ຫົວໜ້າ ຄະນະຊີ້ນຳທິມນັກກິລາ ເຫຼົ່າຮົບຊ່າງແສງ ກອງທັບປະຊາຊົນລາວ. ມີບັນດາ ຄະນະຮັບຜິດຊອບຊີ້ນຳທິມນັກກິລາ, ອານຸກຳມການ ພ້ອມດ້ວຍນັກກິລາແຕ່ລະປະເທດເຂົ້າຮ່ວມ.
ໃນພິທີປະເທດເຈົ້າພາບກໍ່ໄດ້ຂື້ນກ່າວເປີດພິທີຢ່າງເປັນທາງການ ແລະ ຜ່ານຂໍ້ກຳນົດກະຕິກາ ກ່ຽວກັບການແຂ່ງຂັນກິລາ, ຫຼັງຈາກນັ້ນຫົວໜ້າຄະນະຊີ້ນຳນັກກິລາແຕ່ລະປະເທດ ກໍ່ໄດ້ຜັດປ່ຽນກັນຂື້ນຈົກສະຫຼາກເພື່ອແບ່ງສາຍການແຂ່ງຂັນ, ການເຂົ້າຮ່ວມແຂ່ງຂັນກິລາການທະຫານສາກົນ (ARMY GAME 2022 ) (ໃນຮູບແບບຊ່າງແສງ ) ຂອງເຫຼົ່າຮົບຊ່າງແສງ ໃນຄັ້ງນີ້ປະກອບມີ 5 ປະເທດ ເຂົ້າຮ່ວມຄື: ຣັດເຊຍ, ລາວ, ອຸສເບກີສະຖານ, ເບລາຣຸດ ແລະ ອາຣເມເນຍ.
ສຳລັບທິມນັກກິລາເຫຼົ່າຊ່າງແສງກອງທັບປະຊາຊົນລາວເຮົາແມ່ນຈົກສະຫຼາກໄດ້ ເບີ 2 ປະກອບມີ: ລົດດຸດ, ລົດຂຸດຂຸມຄອງ, ລົດສ້າງສີ່ງກີດຂວາງແຕກ, ລົດສ້າງສີ່ງກີດຂວາງບໍ່ແຕກ, ລົດທຳລາຍສະໜາມມີນ, ລົດລອຍນ້ຳ ແລະ ລົດສ້າງສະໜາມມີນ ມີຈຳນວນພົນນັກກກິລາເຂົ້າຮ່ວມຈຳນວນ 21 ສະຫາຍ.
ສຳລັບການແຂ່ງຂັນແມ່ນຈະໄດ້ຈັດຂື້ນໃນກາງເດືອນສິງຫາ 2022 ນີ້ ການເຂົ້າຮ່ວມແຂ່ງຂັນກິລາການທະຫານສາກົນ (ARMY GAME 2022) ແມ່ນມີຄວາມໝາຍ-ຄວາມສຳຄັນທີ່ສຸດ ທັງເປັນການສ້າງສາຍພົວພັນມິດຕະພາບຮັດແໜ້ນຄວາມສາມັກຄີກັບບັນດາປະເທດ ທີ່ເຂົ້າຮ່ວມໂດຍສະເພາະແມ່ນເພື່ອຍົກສູງສາຍພົວພັນມິດຕະພາບ ລະຫວ່າງກອງທັບ ປະຊາຊົນລາວ ກັບກອງທັບ ສ.ລັດເຊຍ ແລະ ປະເທດເພື່ອນມິດ ທັງເປັນການຖອດຖອນບົດຮຽນໃນວຽກງານວີຊາສະເພາະ ເຫຼົ່າຮົບຊ່າງແສງໃຫ້ນັບມື້ເຕີບໃຫ່ຍ, ເຂັ້ມແຂງ ທັນສະໄໝເທື້ອລະກ້າວ.
ໂດຍ: ເກນ ວິໄລສານ
