ໃນວັນທີ 5 ສິງຫາ 2022, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສືບຕໍ່ນໍາພາຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຕ່າງປະເທດພາຍໃຕ້ຂອບກອງປະຊຸມສຸດຍອດອາຊີຕາເວັນອອກ ຄັ້ງທີ 12 ແລະ ກອງປະຊຸມເວທີພາກພື້ນອາຊຽນ ຄັ້ງທີ 29 ທີ່ ພະນົມເປັນ ກໍາປູເຈຍ.
ກອງປະຊຸມລັດຖະມົນຕີຕ່າງປະເທດພາຍໃຕ້ຂອບກອງປະຊຸມສຸດຍອດອາຊີຕາເວັນອອກ ຄັ້ງທີ 12 ໄດ້ຢໍ້າຄືນຄວາມສໍາຄັນຂອງກົນໄກກອງປະຊຸມສຸດຍອດອາຊີຕາເວັນອອກ ໃນຖານະເປັນເວທີຂອງຜູ້ນໍາ ເພື່ອປຶກສາຫາລື ແລະ ສົ່ງເສີມການຮ່ວມມືໃນຂົງເຂດຍຸດທະສາດທາງດ້ານການເມືອງ ແລະ ເສດຖະກິດ ທີ່ມີຄວາມສົນໃຈ ແລະ ມີຜົນປະໂຫຍດຮ່ວມກັນ ໂດຍແນໃສ່ປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກໃນພາກພື້ນ ກໍຄື ໃນໂລກ.
ກອງປະຊຸມໄດ້ທົບທວນຄືນ ແລະ ຊົມເຊີຍຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານໄລຍະ 2018-2022 ໃນຂົງເຂດຕ່າງໆເຊັ່ນ: ສິ່ງແວດລ້ອມ ແລະ ພະລັງງານ, ການສຶກສາ, ການເງິນ, ວຽກງານສາທາລະນະສຸກ ແລະ ພະຍາດລະບາດ, ການຄຸ້ມຄອງໄພພິບັດ, ການເຊື່ອມຈອດ, ເສດຖະກິດ ແລະ ການຄ້າ, ຄວາມໝັ້ນຄົງດ້ານສະບຽງອາຫານ, ການຮ່ວມມືທາງທະເລ ແລະ ອື່ນໆ. ພ້ອມນີ້, ກອງປະຊຸມ ຍັງໄດ້ຢືນຢັນຄວາມໝາຍໝັ້ນ ເພື່ອຮັດແໜ້ນ ແລະ ເສີມຂະຫຍາຍການຮ່ວມມືໃນຂົງເຂດເຫຼົ່ານີ້, ລວມທັງຊຸກຍູ້ການຮ່ວມມືໃນຂົງເຂດໃໝ່ ເພື່ອຮັບມືກັບພະຍາດໂຄວິດ-19 ກໍຄື ພະຍາດລະບາດທີ່ຈະເກີດຂຶ້ນໃໝ່, ແລະ ຟື້ນຟູເສດຖະກິດຫຼັງໂຄວິດ-19 ເປັນຕົ້ນແມ່ນການຮັບປະກັນຄວາມໂລ່ງລ່ຽນຂອງຕ່ອງໂສ້ການຜະລິດ, ຄວາມໝັ້ນຄົງດ້ານພະລັງງານ ແລະ ສະບຽງອາຫານ, ການພັດທະນາແບບຍືນຍົງ, ການຫຼຸດຜ່ອນຄວາມທຸກຍາກ, ການທ່ອງທ່ຽວ, ຄວາມປອດໄພ ແລະ ຄວາມໝັ້ນຄົງທາງທະເລ ແລະ ອື່ນໆ.
ສໍາລັບກອງປະຊຸມເວທີພາກພື້ນອາຊຽນ ຄັ້ງທີ 29, ບັນດາລັດຖະມົນຕີໄດ້ທົບທວນຄືນການຮ່ວມມືໃນໄລຍະ ຜ່ານມາ ແລະ ສະແດງຄວາມຊົມເຊີຍຕໍ່ຄວາມຄືບໜ້າ ໃນການຈັດຕັ້ງປະຕິບັດຖະແຫຼງການວິໄສທັດເວທີພາກພື້ນອາຊຽນ ໂດຍສະເພາະແມ່ນການຈັດຕັ້ງປະຕິບັດບັນດາກິດຈະກໍາສົ່ງເສີມການສ້າງຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ ແລະ ການທູດປ້ອງກັນເຫດ.
ຕໍ່ສະພາບການພາກພື້ນທີ່ພວມຜັນແປ ຄວບຄູ່ກັບສິ່ງທ້າທາຍໃນພາກພື້ນອາຊີ-ປາຊີຟິກ, ກອງປະຊຸມ ໄດ້ຢໍ້າຄືນບົດບາດຂອງອາຊຽນທີ່ເປັນກໍາລັງຂັບເຄື່ອນສໍາຄັນຂອງເວທີພາກພື້ນອາຊຽນ ໃນການຮັບມືກັບບັນດາສິ່ງທ້າທາຍ ແລະ ໄດ້ຊຸກຍູ້ປະເທດເຂົ້າຮ່ວມເວທີພາກພື້ນອາຊຽນ ສືບຕໍ່ຈັດຕັ້ງປະຕິບັດກິດຈະກໍາການທູດປ້ອງກັນເຫດ ກໍຄື ການສົ່ງເສີມການສ້າງຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ທີ່ສອດຄ່ອງກັບບັນດາຫຼັກການຂອງກົນໄກເວທີພາກພື້ນອາຊຽນ ແລະ ຮັດແໜ້ນການຮ່ວມມືໃນການຕ້ານພະຍາດໂຄວິດ-19 ແລະ ການຟື້ນຟູຫຼັງໂຄວິດ-19.
ກອງປະຊຸມ ໄດ້ຮັບຮອງເອົາ 3 ເອກະສານສໍາຄັນ ຄື: ກິດຈະກໍາການຮ່ວມມືຂອງເວທີພາກພື້ນອາຊຽນ ສໍາລັບສົກປີ 2022-2023, ໃນນັ້ນ ສປປ ລາວ, ສປ ຈີນ ແລະ ການາດາ ໄດ້ສືບຕໍ່ເປັນປະທານຮ່ວມກອງປະຊຸມກາງສະໄໝເວທີພາກພື້ນອາຊຽນ ກ່ຽວກັບການບັນເທົາທຸກໄພພິບັດ ສໍາລັບປີ 2023; ຖະແຫຼງການເວທີພາກພື້ນອາຊຽນ ກ່ຽວກັບການສົ່ງເສີມສັນຕິພາບ, ສະຖຽນລະພາບ ແລະ ວັດທະນາຖາວອນ ຜ່ານບັນດາມາດຕະການການສ້າງຄວາມໄວ້ເນື້ອເຊື່ອໃຈ ແລະ ການທູດປ້ອງກັນເຫດ; ແລະ ຖະແຫຼງການເວທີພາກພື້ນອາຊຽນ ກ່ຽວກັບການຢໍ້າຄືນຄວາມໝາຍໝັ້ນເພື່ອຮັກສາອາຊີຕາເວັນອອກສ່ຽງໃຕ້ ເປັນເຂດປອດອາວຸດນິວເຄລຍ.
ໃນວັນດຽວກັນ ທ່ານ ສະເຫຼີມໄຊ ກົມມະສິດ ຍັງໄດ້ພົບປະສອງຝ່າຍກັບ ທ່ານ ປາກ ຈິນ (Park Jin) ລັດຖະມົນຕີຕ່າງປະເທດ ແຫ່ງ ສາທາລະນະລັດ ເກົາຫຼີ ຊຶ່ງສອງຝ່າຍໄດ້ ປຶກສາຫາລື ແລະ ແລກປ່ຽນຄຳຄິດເຫັນ ກ່ຽວກັບ ການຮ່ວມມືດ້ານເສດຖະກິດ, ການຄ້າ, ການລົງທຶນໃນຂະແໜງການຕ່າງໆ, ການສົ່ງເສີມການທ່ອງທ່ຽວ ພາຍຫຼັງເປີດປະເທດ ແລະ ການໄປມາຫາສູ່ແລກປ່ຽນ ການຢ້ຽມຢາມ ພາຍຫຼັງສະພາບການແຜ່ລະບາດຂອງພະຍາດໂຄວິດ-19 ໄດ້ຜ່ອນຄາຍລົງ, ໂດຍສະເພາະການປຶກສາຫາລືກ່ຽວກັບການແກ້ໄຂບັນຫາເສດຖະກິດ ແລະ ການເງິນ ໃນປັດຈຸບັນ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ບັນຫາດ້ານພະລັງງານ ລວມໄປເຖິງການປຶກສາຫາລືສະພາບການພາກພື້ນ ແລະ ສາກົນ ທີ່ພວມປະເຊີນໜ້າກັບສິ່ງທ້າທາຍຫຼາຍຢ່າງ ແລະ ອື່ນໆ.
ຂ່າວ: ກະຊວງ ການຕ່າງປະເທດ
#Medialaos MMD
