ຢ່ຽນທາຍ (Yantai) ແມ່ນໜຶ່ງໃນເກືອບ 20 ເມືອງພາຍ ໃນແຂວງຊານຕົງ, ມີທີ່ຕັ້ງຢູ່ທາງທິດຕາເວັນອອກຂອງແຫຼມຊານຕົງ, ມີຊາຍແດນຕິດກັບທະເລເຫລືອງ ແລະ ທະເລ Bohai, ເນື້ອທີ່ທັງໝົດ 13.900 ກິໂລຕາແມັດ ແລະ ເນື້ອທີ່ທະເລ 26.000 ກິໂລຕາແມັດ, ປະຊາກອນທັງໝົດ 7,1 ລ້ານຄົນ (ສະຖິຕິຮອດທ້າຍປີ 2021).
ເມື່ອບໍ່ດົນມານີ້, ສື່ມວນຊົນຕ່າງປະເທດຫລາຍກວ່າ 30 ຄົນ ຈາກຫລາຍກວ່າ 20 ປະເທດທີ່ເຂົ້າຮ່ວມໂຄງ ການສູນສື່ຂ່າວສາກົນ 2022 ຢູ່ນະຄອນຫລວງປັກກິ່ງຂອງຈີນ ໄດ້ເດີນທາງຢ້ຽມຊົມເມືອງ Yantai. ທ່ານ ນາງ ຫວັງ ສ່ຽວຈວນ (Wang Xiaojuan), ຫົວໜ້າພະແນກປະຊາສໍາພັນຂອງເມືອງດັ່ງກ່າວ ໄດ້ໃຫ້ຮູ້ວ່າ: Yantai ແມ່ນ 1 ໃນຈໍານວນ 14 ເມືອງເປີດກວ້າງທໍາອິດຂອງຈີນທີ່ໄດ້ສ້າງຕັ້ງສາຍພົວພັນມິດຕະພາບກັບ 45 ເມືອງໃນ 21 ປະເທດ, ເປັນເມືອງທີ່ມີຄຸນນະພາບອາກາດດີໃນລະດັບ 2 ຂອງຈີນທີ່ມີ 4 ລະດູການ, ຜ່ານມາເຄີຍໄດ້ຮັບລາງວັນກ່ຽວກັບການຕັ້ງຖິ່ນຖານຂອງມະນຸດແຫ່ງສະຫະປະຊາຊາດ (UN-Habitat Scroll of Honour Award), ລາງວັນມືອງສີວິໄລແຫ່ງຊາດ 6 ຄັ້ງ ແລະ ລາງວັນເມືອງຕົວແບບແຫ່ງຊາດໃນການຄຸ້ມຄອງຄວາມປອດໄພສາທາລະນະ 7 ຄັ້ງ ເຮັດໃຫ້ເປັນຫນຶ່ງບັນດາເມືອງທີ່ມີຄວາມປອດໄພ ແລະ ມີຊີວິດຊີວາທີ່ສຸດໃນປະເທດຈີນ.
ນອກຈາກນີ້ຍັງເປັນເມືອງທີ່ມີພື້ນຖານດ້ານອຸດສາຫະກໍາເຂັ້ມແຂງ ແລະ ເປັນຫນຶ່ງໃນສະຖານທີ່ໃຫ້ກໍາເນີດອຸດສາ ຫະກໍາແຫ່ງຊາດທີ່ທັນສະໄຫມຂອງຈີນ, ປະກອບມີປະ ເພດອຸດສາຫະກໍາທີ່ຫລາກຫລາຍ, ກວມເອົາ 37 ໃນ 41 ຂະແຫນງອຸດສາຫະກໍາສໍາຄັນໃນເສດຖະກິດແຫ່ງຊາດ ແລະ ວິສາຫະກິດຈໍານວນຫນຶ່ງ ເຊັ່ນ: Wanhua Chemical, Nanshan Aluminum, Linglong Tire, Jereh Group, ລວມເຖີງສິນຄ້າທີ່ມີຊື່ສຽງຈໍານວນຫນຶ່ງ ເຊັ່ນ: Changyu, Luhua, Longda, Lu Pharyema Group ແລະ RemeGen, ໃນນີ້ 2 ກຸ່ມອຸດສາຫະກໍາຂອງວັດສະດຸໂຄງສ້າງ ແລະ ການແພດ ຖືກຄັດເລືອກເປັນກຸ່ມອຸດສາຫະກໍາເກີດໃໝ່ທາງດ້ານຍຸດທະສາດໃນປະເທດຈີນ. ໃນ ປີ 2021, ມູນຄ່າອຸດສາຫະກໍາຂອງເມືອງດັ່ງກ່າວ ບັນລຸ 310,77 ຕື້ຢວນ, ເພີ່ມຂຶ້ນ 17.3% ເມື່ອທຽບໃສ່ ປີ 2020.
Yantai ແມ່ນເມືອງທີ່ມີຊັບພະຍາກອນຢ່າງຫຼວງຫຼາຍ ແລະ ອຸດົມສົມບູນໄປດ້ວຍຊັບພະຍາກອນການປະມົງໃນທະເລທີ່ມີຄ່າຢ່າງລົ້ນເຫຼືອ ແລະ ເປັນໜຶ່ງໃນຫລາຍສະ ຖານທີ່ສໍາຄັນໃນການປະມົງຂອງຈີນ ເຊີ່ງມີສັດທະເລຫຼາຍກວ່າ 1,37 ລ້ານຊະນິດ. ພ້ອມນີ້, ໝາກແອັປເປິ້ນ ແລະ ມາກເຊີຣີແຢ່ນທາຍ, ໝາກພິສໄລຢາງ ແລະ ວຸ້ນເສັ້ນລວງກູ ເປັນທີ່ຮູ້ຈັກກັນດີທັງພາຍໃນ ແລະ ຕ່າງປະເທດ, ໃນນີ້ ແອັປເປີ້ນຢ່ຽນທາຍເປັນອຸດສະຫະກໍາໝາກໄມ້ສົ່ງອອກອັນດັບໜຶ່ງຂອງຈີນເປັນເວລາ 13 ປີຕິດຕໍ່ກັນ, ມີມູນຄ່າຍີ່ຫໍ້ 15 ຕື້ຢວນ ແລະ ເປັນ 1 ໃນ 7 ສະຖານທີ່ທີ່ຜະລິດວາຍອາງຸ່ນໃຫຍ່ທີ່ສຸດໃນໂລກ, ທັງເປັນເມືອງເຫຼົ້າອາງຸ່ນສາກົນພຽງແຫ່ງດຽວໃນອາຊີ. ປັດຈຸບັນ, Yantai ໄດ້ເປີດກວ້າງຮັບການລົງທຶນ ເຮັດໃຫ້ກາຍເປັນເມືອງແຄມຝັ່ງທະເລສາກົນທີ່ມີການແຂ່ງຂັນກັນຫລາຍຂຶ້ນ, ມີຫຼາຍກວ່າ 90 ປະເທດເຂົ້າໄປລົງທຶນໃນ 15.000 ໂຄງການ, ມີມູນຄ່າການລົງທຶນຕ່າງປະເທດຕົວຈິງເກີນ 40 ຕື້ໂດລາສະຫະ ລັດ, ສະເພາະ 6 ເດືອນຕົ້ນປີ 2022 GDP ຂອງເມືອງບັນລຸ 434.991 ຕື້ຢວນ, ເພີ່ມຂຶ້ນ 4,5% ຖືເປັນ GDP ທີ່ຂະຫຍາຍຕົວທີ່ດີກວ່າໝູ່ໃນບັນດາເມືອງຂອງແຂວງຊານຕົງ.
ທາງດ້ານລະບົບການຂົນສົ່ງ, Yantai ມີລະບົບການຂົນສົ່ງທີ່ສະດວກສະບາຍ ດ້ວຍ 10 ເຂດທ່າເຮືອໃຫຍ່, ໃນນັ້ນ 8 ແຫ່ງແມ່ນທ່າເຮືອທີ່ເປີດບໍລິການໃນລະດັບ 1 ຂອງປະເທດທີ່ມີການພົວພັນໂດຍກົງກັບທ່າເຮືອຫຼາຍກວ່າ 100 ແຫ່ງໃນຫຼາຍກວ່າ 70 ປະເທດ ແລະ ພາກພື້ນ. ໃນຈໍານວນດັ່ງກ່າວ, ທ່າເຮືອ Yantai ມີປະລິມານການຂົນສົ່ງສິນຄ້າຫລາຍເປັນອັນດັບທີ 8 ຂອງປະເທດ, ຄຽງຄູ່ກັນນີ້ ຍັງມີສາຍການບິນ 141 ສາຍທີ່ມີສະຫນາມບິນສາກົນ Yantai Penglai ທີ່ເປັນສະຫນາມບິນແຫ່ງຊາດລະດັບຫນຶ່ງທີ່ຮອງຮັບ ແລະ ເຊື່ອມຕໍ່ກັບ 78 ປະເທດ (ພາກພື້ນ) ແລະ ຕົວເມືອງພາຍໃນປະເທດ, ເປັນສະຫນາມບິນທີ 39 ໃນຈີນແຜ່ນດິນໃຫຍ່ທີ່ມີຜູ້ໂດຍສານໃຊ້ບໍລິການເຖີງ 10 ລ້ານຄົນ.
Yantai ຍັງແມ່ນຫນຶ່ງໃນຈໍານວນ 14 ເມືອງແຄມຝັ່ງທະເລແຫ່ງທໍາອິດທີ່ເປີດສູ່ໂລກພາຍນອກຂອງຈີນ ແລະ ເປັນຈຸດເຊື່ອມຕໍ່ທີ່ສໍາຄັນຂອງຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”, ທັງແມ່ນ 1 ໃນ 3 ເຂດຫຼັກຂອງແຂວງຊານຕົງໃນການທົດລອງປ່ຽນແປງເພື່ອຂັບເຄື່ອນການຈະເລີນເຕີບໂຕ, ເປັນ 1 ໃນ 3 ຂອງເຂດການຄ້າເສລີຊານຕົງ ແລະ ເປັນ 1 ໃນ 3 ເຂດການລົງທຶນດ້ານອຸດສາຫະກໍາສາກົນຂອງແຂວງຊານຕົງ. ນອກຈາກນີ້ ຍັງເປັນເມືອງທີ່ມີວັດທະນະທໍາຫລາກຫລາຍ ເຊີ່ງເປັນການເຊື່ອມໂຍງວັດທະນະທໍາຕາເວັນຕົກ ແລະ ເປັນຈຸດເລີ່ມຕົ້ນຂອງເສັ້ນທາງສາຍໄໝທາງທະເລຕາເວັນອອກມາຫຼາຍກວ່າ 2.000 ປີແລ້ວ, ທັງເປັນຫນຶ່ງໃນບັນດາເມືອງທີ່ເກົ່າແກ່ທີ່ສຸດໃນພາກເຫນືອຂອງຈີນທີ່ເປີດເປັນທ່າເຮືອການຄ້າ, ສ່ວນສະຖານທີ່ທ່ອງທ່ຽວທີ່ສໍາຄັນພາຍໃນເມືອງທີ່ຄົນນິຍົມໄປທ່ອງທ່ຽວມີຫລາຍແຫ່ງ ເປັນຕົ້ນ: ສາລາ Penglai, ພູເຂົາແຢ່ນທາຍ, ພູກຸນຢູ, ຫາດຊາຍສີຄໍາແຢ່ນທາຍ, ເກາະຢາງມາ, ພະລາດຊະວັງຢ່ຽນທາຍທຽນຟູ, ພູເຂົາແຢ່ນທາຍທາ, ສວນສາທາລະນະແຢ່ນທາຍນານຊານ ແລະ ອື່ນໆ. ກ່ອນໜ້າເກີດການລະບາດຂອງພະຍາດໂຄວິດ-19 ມີນັກທ່ອງທ່ຽວຕ່າງປະເທດເຂົ້າໄປທ່ອງທ່ຽວຢ່າງຫລວງຫລາຍ, ແຕ່ພາຍຫລັງເກີດການລະບາດຂອງພະຍາດດັ່ງກ່າວເຮັດໃຫ້ນັກທ່ອງ ທ່ຽວຫລຸດລົງ ແລະ ສ່ວນໃຫຍ່ແມ່ນນັກທ່ອງທ່ຽວພາຍ ໃນປະເທດ.
ຢ່າງໃດກໍຕາມ, ໃນຕໍ່ໜ້າຖ້າຫາກການລະບາດຂອງພະຍາດໂຄວິດ-19 ໝົດໄປ ແລະ ລັດຖະບານຈີນເປີດປະເທດຕ້ອນຮັບນັກທ່ອງທ່ຽວອີກຄັ້ງ, ດ້ວຍມົນສະເໜ່ຂອງສະຖານທີ່ທ່ອງທ່ຽວທີ່ຫລາກຫລາຍ ເຊື່ອວ່າ Yantai ຈະເປັນອີກເມືອງໜຶ່ງໃນແຂວງຊານຕົງຂອງຈີນ ທີ່ເຕັມໄປດ້ວຍນັກທ່ອງທ່ຽວທັງພາຍໃນ ແລະ ຕ່າງປະເທດຢ່າງແນ່ນອນ.
Cr: BT
