ຕາມຂ່າວຈາກ ຊິນຮວາ,ວັນທີ1 ສິງຫານີ້, ທ່ານຈັນທິຣາວັດ (Chan Thirawat) ລັດຖະ ມົນຕີວ່າການ ກະຊວງພັດທະນາ ຊົນນະບົດ ກຳປູເຈຍ ເປີດເຜີຍວ່າ: ປັດຈຸບັນປະຊາກອນ ຊົນນະບົດ ໃນປະເທດ ຫລາຍກວ່າ 80% ສາມາດ ເຂົ້າເຖິງ ລະບົບ ນ້ຳສະອາດ ແລະ ສຸກຂະອານາໄມ ເພີ່ມຂຶ້ນຈາກ 70% ເມື່ອ 5 ປີກ່ອນ ຫລັງຈາກເຈາະນ້ຳບາດານ 11.741ບໍ່, ສະນ້ຳຊຸມຊົນ 1.271 ແຫ່ງ, ຖັງເກັບ ນ້ຳຝົນ 2.440 ຖັງ ແລະ ລະບົບຈ່າຍນ້ຳ 200 ແຫ່ງ ລວມທັງແຈກຢາຍຖັງເກັບນ້ຳຂະໜາດໃຫຍ່ໃຫ້ແກ່ຄອບຄົວ 145.865 ໜ່ວຍ ນັບຕັ້ງແຕ່ມີ 2018 ເປັນຕົ້ນມາ. ນອກນີ້ ຍັງກໍ່ສ້າງຫ້ອງນ້ຳສຳລັບປະຊາຊົນ 433.014 ຫ້ອງ ແລະ ອ່າງລ້າງມື ໃນໂຮງຮຽນລັດ 11.198 ແຫ່ງ ເພື່ອສະໜັບສະໜູນສຸກຂະອານາໄມໃນຊົນນະບົດ ພ້ອມທັງວາງແຜນສູ້ຊົນ ໃຫ້ບັນລຸເປົ້າໝາຍລະບົບນ້ຳສະອາດ ແລະ ສຸກຂະອານາໄມໃຫ້ໄດ້ 100% ພາຍໃນປີ2025 ເນື່ອງຈາກປະຊາກອນກຳປູເຈຍ ປະມານ 77% ຈາກທັງໝົດ 16 ລ້ານຄົນ ອາໄສຢູ່ໃນພື້ນທີ່ຊົນນະບົດ.
(ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
