ໃນວັນທີ 10 ກໍລະກົດ 2025 ກົງກັບມື້ຂຶ້ນ 15 ຄ່ຳເດືອນ 8 ພສ 2568, ເປັນມື້ບຸນເຂົ້າພັນສາ ພຸດທະສາສະນິກະຊົນ ໄດ້ພ້ອມພຽງກັນ ໃສ່ບາດຖະຫວາຍສັງຄະທານ ແດ່ພະສົງສາມະ ເນນ ຢູ່ຕາມວັດວາອາຮາມຕ່າງໆ ໃນຂອບເຂດທົ່ວປະເທດ ຕາມຮີດຄອງປະເພນີທີ່ສືບທອດກັນມາ.
ສະເພາະຢູ່ ນະຄອນຫລວງວຽງຈັນ ພຸດທະສາສະນິກະຊົນ ກໍໄດ້ຮ່ວມກັນໃສ່ບາດ ຢູ່ຕາມວັດແຫ່ງຕ່າງໆ ຢ່າງຄຶກຄື້ນຖືກຕ້ອງຕາມຮີດຄອງປະເພນີ, ວັດທະນະທຳ ອັນດີງາມທີ່ເຄີຍສືບທອດກັນມາແຕ່ບູຮານນະການ, ຮັກສາໄດ້ຄວາມເປັນລະບຽບຮຽບຮ້ອຍ, ສະຫງົບ ແລະ ປອດໄພ ເຊິ່ງກ່ອນຈະໃສ່ບາດ ກໍໄດ້ມີພິທີກຳທາງສາດສະໜາ ເປັນຕົ້ນ ຟັງທຳມະເທດສະໜາ ແລະ ອື່ນໆ. ນອກນັ້ນ, ຢູ່ບາງວັດ ຍັງມີຜູ້ໃຈບຸນ ນຳເອົານ້ຳຫວານ, ນ້ຳດື່ມ ແລະ ອາຫານປະເພດຕ່າງໆ ມາຕັ້ງເປັນໂຮງທານ ເພື່ອໃຫ້ມວນຊົນ ຜູ້ມາໃສ່ບາດ ໄດ້ຮັບປະທານ.
ວັນບຸນເຂົ້າພັນສາ ເປັນວັນທີ່ພະພິກຂຸສົງຈຳພັນສາ ກົງກັບວັນແຮມ 1 ຄໍ່າ ເດືອນ 8 ຈົນເຖີງວັນຂຶ້ນ 15 ຄໍ່າ ເດືອນ 11 ວັນເຂົ້າພັນສາ, ເປັນວັນສຳຄັນທີ່ພະສົງຈະຕ້ອງອະທິຖານເຂົ້າພັນສາ ຕະ ຫລອດໄລຍະໄຕມາດ 3 ເດືອນ ຕາມທີ່ພະທຳວິໄນບັນຍັດໄວ້ ໂດຍບໍ່ໃຫ້ໄປນອນຄ້າງຄືນບ່ອນອື່ນ ໂດຍ ເອີ້ນວ່າ: ຈຳພັນສາ ເຊິ່ງສາເຫດທີ່ມີບັນຍັດຈຳພັນສາ ເນື່ອງດ້ວຍພະສົງໃນສະໄໜພຸດທະການ ໄດ້ເດີນທາງໄປສະແດງທຳ ໂປດສັດ ໃຫ້ແກ່ປະຊາຊົນໃນທີ່ຕ່າງໆ ຊາວບ້ານຈຶ່ງໄດ້ຕຳນິວ່າ ພະສົງເຫລົ່ານັ້ນໄດ້ໄປຫຍຽບເຂົ້າກ້າເຄື່ອງປູກຂອງຝັງຊາວບ້ານ ຈົນເສຍຫາຍ ພະພຸດທະເຈົ້າ ຈຶ່ງວາງລະບຽບການຈຳພັນສາ ໃຫ້ພິກຂຸ ຢູ່ໃນສະຖານທີ່ຂອງສົງຕະຫລອດໄລຍະ 3 ເດືອນ (ເວັ້ນເສຍແຕ່ມີທຸລະຈຳເປັນ ແຕ່ຕ້ອງໄດ້ລາພັນສາ) ການຈຳພັນສາອີກປະການໜຶ່ງ ກໍເພື່ອໃຫ້ພະພິກຂຸສົງໄດ້ສຶກສາຫລັກທຳທາງສາສະໜາ ເພື່ອກະກຽມໄປເຜີຍແຜ່ໃຫ້ແກ່ຍາດໂຍມອີກດ້ວຍ
