ຕອນບ່າຍຂອງວັນທີ 22 ເມສາ 2025 ນີ້, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ໂຢເກສ໌ວາ ສັງວານ ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສາທາລະນະລັດ ອິນເດຍ ປະຈຳລາວ ພ້ອມດ້ວຍຄະນະ ເພື່ອປຶກສາຫາລືກ່ຽວກັບວຽກງານການພົວພັນຮ່ວມມືສອງຝ່າຍ ລະຫວ່າງ ສປປ ລາວ ແລະ ສ ອິນເດຍ ໃນໄລຍະຜ່ານມາ.
ໃນໂອກາດນີ້, ທ່ານ ນາງ ສວນສະຫວັນ ວິຍະເກດ ໄດ້ສະແດງຄວາມຍິນດີຕ້ອນຮັບ ທ່ານ ໂຢເກສ໌ວາ ສັງວານ, ພ້ອມທັງຕີລາຄາສູງຕໍ່ສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມື ລະຫວ່າງ ສປປ ລາວ ແລະ ສ ອິນເດຍ ຕະຫລອດ 69 ປີ ແຫ່ງການສ້າງສາຍພົວພັນການທູດຮ່ວມກັນ ຜ່ານມາ, ສະແດງຄວາມຂອບໃຈຢ່າງຈິງໃຈ ຕໍ່ການຊ່ວຍເຫລືອຂອງ ລັດຖະບານອິນເດຍ ໃຫ້ແກ່ ສປປ ລາວ ໂດຍສະເພາະ ໂຄງການຮ່ວມມືລາວ-ອິນເດຍ ໃນການປົກປັກຮັກສາ ແລະ ບູລະນະສ້ອມແປງກຸ່ມຜາສາດຫີນວັດພູຈຳປາສັກ, ໂຄງການປົກປັກຮັກສາຕົ້ນໂພ, ປັບປຸງ ແລະ ພັດທະນາບໍລິເວນແທນໂພ ຢູ່ສະຖານທີ່ທ່ອງທ່ຽວພູສີ ແຂວງຫລວງພະບາງ, ການພັດທະນາຊັບພະຍາກອນມະນຸດ, ດ້ານການສຶກສາ, ສາທາລະນະສຸກ, ການສົ່ງເສີມການຄ້າ-ການລົງທຶນ, ການພັດທະນາຊົນນະບົດ ແລະ ຂະແໜງ ການອື່ນໆ ອັນເປັນການປະກອບສ່ວນອັນສໍາຄັນ ເຂົ້າໃນການສ້າງສາພັດທະນາ ເສດຖະກິດ-ສັງຄົມ ຂອງ ສປປ ລາວ.
ທ່ານ ໂຢເກສ໌ວາ ສັງວານ ກໍໄດ້ສະແດງຄວາມຂອບໃຈ ມາຍັງ ທ່ານ ນາງ ສວນສະຫວັນ ວິຍະເກດ ທີ່ໃຫ້ການຕ້ອນຮັບຢ່າງອົບອຸ່ນ, ທັງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສ ອິນເດຍ ແລະ ສປປ ລາວ ແລະ ໃຫ້ຄໍາໝັ້ນສັນຍາ ທີ່ຈະສືບຕໍ່ພົວພັນຮ່ວມມື ລະຫວ່າງ ສອງ ປະເທດ ໃຫ້ໄດ້ຮັບການຂະຫຍາຍຕົວຢ່າງຕໍ່ເນື່ອງ, ສ້າງຄວາມສາມັກຄີມິດຕະພາບ ແລະ ຄວາມເຂົ້າອົກເຂົ້າໃຈ ເຊິ່ງກັນ ແລະ ກັນ ເພື່ອນໍາເອົາຜົນປະໂຫຍດຕົວຈິງມາສູ່ ປະຊາຊົນສອງຊາດ ອິນເດຍ-ລາວ.
