ຫວຽດນາມ ແລະ ລາວ ແມ່ນສອງປະເທດບ້ານໃກ້ເຮືອນຄຽງ, ມີສາຍພູຫລວງເປັນຊາຍແດນຮ່ວມຂອງສອງປະເທດ, ຮ່ວມໃຊ້ແມ່ນ້ຳຂອງ, ມີປະຫວັດສາດ ແລະ ວັດທະນະທຳທີ່ຕິດພັນສະໜິດຕິດແທດກັນມາແຕ່ເດິກດຳບັນ. ຕະຫລອດໄລຍະຜ່ານມາສອງປະເທດໄດ້ຮ່ວມມື, ພົວພັນອັນໄດ້ມີຜົນງານພົ້ນເດັ່ນຫລາຍດ້ານ ເປັນຕົ້ນການພົວພັນທາງດ້ານການເມືອງ, ການຕ່າງປະເທດ, ດ້ານປ້ອງກັນຊາດ-ປ້ອງກັນຄວາມສະຫງົບ, ການຮ່ວມມືດ້ານເສດຖະກິດ, ການຄ້າ ແລະ ການລົງທຶນ, ການຮ່ວມມືດ້ານວັດທະນະທຳ, ການສຶກສາ-ບຳລຸງສ້າງ ແລະ ພັດທະນາຊັບພະຍາກອນມະນຸດ, ການຮ່ວມມື, ການຊ່ວຍເຫລືອເຊິ່ງກັນ ແລະ ກັນລະຫວ່າງບັນດາກະຊວງ, ຂະແໜງການ, ຄະນະກຳມາທິການຂອງສະພາແຫ່ງຊາດ, ແນວໂຮມ, ອົງການຈັດຕັ້ງມະຫາຊົນ ແລະ ທ້ອງຖິ່ນ.
ທ່ານ ຫງວຽນ ມິງ ເຕີມ ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາລາວ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວໃນວັນທີ 21 ເມສາ 2025 ນີ້ວ່າ: ພາຍໃຕ້ການນໍາພາ-ຊີ້ນຳຂອງສອງພັກ, ຊີ້ນຳໂດຍກົງຂອງກົມການເມືອງ ແລະ ຄະນະເລຂາທິການ, ລັດຖະບານ ແລະ ສະພາແຫ່ງຊາດ ໃນໄລຍະຜ່ານມາ, ບັນດາຄະນະພັກ, ກະຊວງ, ຂະແໜງການຂອງລັດຖະບານ, ບັນດາຄະນະກຳມະການສະພາແຫ່ງຊາດ, ແນວລາວສ້າງຊາດ, ອົງການຈັດຕັ້ງ, ທ້ອງຖິ່ນ ແລະ ວິສາຫະກິດຂອງສອງປະເທດ ເປັນເຈົ້າການປະສານສົມທົບກັນຢ່າງຕັ້ງໜ້າ ແລະ ຈັດຕັ້ງປະຕິບັດບັນດາສັນຍາຮ່ວມມືຫວຽດນາມ-ລາວຂອງການນຳຂັ້ນສູງຂອງສອງພັກ. ບັນດາສັນຍາຮ່ວມມືລະຫວ່າງສອງລັດຖະບານ, ສັນຍາການຮ່ວມມືລະຫວ່າງກະຊວງ, ຂະແໜງການ ແລະ ທ້ອງຖິ່ນ ບັນລຸໄດ້ບັນດາໝາກຜົນທີ່ພົ້ນເດັ່ນໃນດ້ານຕ່າງໆ, ປະກອບສ່ວນສຳຄັນເຂົ້າໃນການຮັກສາສະຖຽນລະພາບທາງດ້ານການເມືອງ, ພັດທະນາເສດຖະກິດ-ສັງຄົມ, ຮັບປະກັນວຽກງານປ້ອງກັນຊາດ, ຮັກສາຄວາມສະຫງົບຂອງແຕ່ລະປະເທດ; ສືບຕໍ່ຮັດແໜ້ນສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ-ລາວເຂົ້າສູ່ລວງເລິກ ແທດເຖິງຕົວຈິງ ແລະ ມີປະສິດທິຜົນ. ພ້ອມກັນນັ້ນ, ຍັງໄດ້ປະກອບສ່ວນຍົກສູງບົດບາດຂອງສອງພັກ, ປະກອບສ່ວນຢ່າງຕັ້ງໜ້າແກ່ສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ ແລະ ໃນໂລກ.
ທ່ານ ຫງວຽນ ມິງ ເຕີມ ໄດ້ກ່າວຕື່ມວ່າ: ໃນໂອກາດທີ່ ທ່ານ ເລືອງ ເກືອງ ປະທານປະເທດແຫ່ງ ສສ ຫວຽດນາມ ຈະເດີນທາງມາຢ້ຽມຢາມທາງລັດຖະກິດຢູ່ ສປປ ລາວ ລະຫວ່າງວັນທີ 24–25 ເມສາ 2025 ນີ້ ເປັນການເດີນທາງມາຢ້ຽມຢາມທາງລັດຖະກິດ ສປປ ລາວ ຄັ້ງທຳອິດຂອງ ທ່ານ ເລືອງ ເກືອງ ໃນຖານະຮັບຕຳແໜ່ງໃໝ່ ແລະ ໃນທ່າມກາງສະເຫລີມສະຫລອງບຸນປີໃໝ່ລາວ ເຊິ່ງເປັນບັນຍາກາດອັນອົບອຸ່ນມີຊີວິດຊີວາສະແດງເຖິງນ້ຳໃຈມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ສະໜິດແໜ້ນ, ຈົງຮັກພັກດີ ແລະ ບໍລິສຸດຜຸດຜ່ອງລະຫວ່າງຂອງສອງພັກ, ສອງລັດ ແລະ ປະຊາຊົນສອງຊາດຫວຽດນາມ-ລາວ. ການຢ້ຽມຢາມ ສປປ ລາວ ຄັ້ງນີ້, ໄດ້ດຳເນີນໃນບັນຍາກາດທີ່ສອງພັກ, ສອງລັດ ພວມຜັນຂະຫຍາຍມະຕິກອງປະຊຸມໃຫຍ່ຂອງແຕ່ລະພັກ ແລະ ພວມດຳເນີນການກະກຽມໃຫ້ແກ່ກອງປະຊຸມໃຫຍ່ອົງຄະນະພັກທົ່ວປະເທດຂອງແຕ່ລະພັກໃນຕົ້ນປີ 2026. ການພົວພັນຫວຽດນາມ-ລາວ ຢູ່ໃນທວງທ່າພັດທະນາຢ່າງຕັ້ງໜ້າ ແລະ ບັນລຸໄດ້ບັນດາຜົນງານທີ່ສຳຄັນທີ່ເພິ່ງພໍໃຈ. ການຢ້ຽມຢາມໃນຄັ້ງນີ້, ແມ່ນໜຶ່ງໃນບັນດາຂີດໝາຍສຳຄັນຂອງປະຫວັດສາດການພົວພັນຂອງສອງປະເທດ; ສືບຕໍ່ຜັນຂະຫຍາຍແນວທາງນະໂຍບາຍການຕ່າງປະເທດຂອງແຕ່ລະພັກ ແລະ ນະໂຍບາຍສະເໝີຕົ້ນສະເໝີປາຍຂອງແຕ່ລະປະເທດ, ຢືນຢັນການສະໜັບສະໜູນຢ່າງແຂງແຮງໃຫ້ແກ່ການປ່ຽນແປ່ງໃໝ່, ຊ່ວຍເຫລືອເຊິ່ງກັນ ແລະ ກັນ, ພ້ອມກັນພັດທະນາ, ຊຸກຍູ້ການປະຕິບັດບັນດາຂໍ້ຕົກລົງລະຫວ່າງການນຳຂັ້ນສູງຂອງສອງພັກ, ສອງລັດ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ-ລາວ, ພັດທະນາສູ່ລວງເລິກ, ມີປະສິດທິຜົນ ແລະ ແທດເໝາະກັບສະພາບຄວາມເປັນຈິ່ງ, ນຳເອົາຄວາມຈະເລີນຮຸ່ງເຮືອງມາໃຫ້ປະຊາຊົນແຕ່ລະປະເທດ.
ຂ່າວ: ຢ່າຕົ່ງ ຊົ່ງຈົ່ງເນັ່ງ
