ຕະຫລອດໄລຍະ 70 ປີຜ່ານມາ, ພັກ ປະຊາຊົນ ປະຕິວັດລາວ ຍາມໃດກໍຮັກສາໄດ້ຄຸນທາດການເມືອງ, ທາດແທ້ປະຕິວັດວິທະຍາສາດ, ພັກໄດ້ຍຶດໝັ້ນຢ່າງສະເໝີຕົ້ນສະເໝີປາຍ ຕໍ່ອຸດົມການສັງຄົມນິຍົມ ດ້ວຍການສ້າງ ແລະ ບູລະນະລະບອບ ປະຊາທິປະໄຕ ປະຊາຊົນ ຕາມເສັ້ນທາງກ້າວຂຶ້ນສັງຄົມນິຍົມຢ່າງໜັກແໜ້ນ.
ສະຫາຍ ພົທ ກົງທອງ ພົງວິຈິດ ກໍາມະການສູນກາງພັກ, ຮອງເລຂາຄະນະພັກກະຊວງ, ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ມີຄໍາເຫັນໃນໂອກາດ ວັນສ້າງຕັ້ງພັກປະຊາຊົນປະຕິ ວັດລາວ ຄົບຮອບ 70 ປີ ທີ່ຈະມາເຖິງນີ້ວ່າ: ໃນເງື່ອນໄຂໃໝ່ ພັກເຮົາໄດ້ສືບຕໍ່ນໍາພາປະເທດຊາດ ຜ່ານຜ່າຄວາມຫຍຸ້ງຍາກ, ສິ່ງທ້າທາຍທົດສອບຕ່າງໆ ສາມາດຍາດໄດ້ຜົນງານໃຫຍ່ຫລວງ, ມີຄວາມໝາຍປະຫວັດສາດ, ປະຕິບັດສອງໜ້າທີ່ຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດຊາດ ມີຜົນສໍາເລັດເປັນກ້າວໆ, ເຮັດໃຫ້ປະເທດເຮົາມີສະຖຽນລະພາບ ທາງດ້ານການເມືອງຢ່າງໜັກແໜ້ນ, ສັງ ຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ຖືກທິດດ້ວຍການຍູ້ແຮງການຫັນເປັນອຸດສາຫະກໍາ ແລະ ທັນສະໄໝ, ເພີ່ມທະວີຄວາມສາມາດ ປ້ອງກັນ ຊາດ-ປ້ອງກັນຄວາມສະຫງົບ, ເປີດກວ້າງການພົວພັນຮ່ວມມືກັບຕ່າງປະເທດ, ຍົກສູງບົດບາດຂອງປະ ເທດໃນເວທີສາກົນນັບມື້ສູງຂຶ້ນ, ປັບປຸງຄວາມເຊື່ອໜັ້ນຂອງປະຊາຊົນບັນດາເຜົ່າ ຕໍ່ກັບການນໍາພາ-ຊີ້ ນໍາຂອງພັກ. ພັກເຮົາສົມແລ້ວທີ່ເປັນກໍາລັງຫລັກແຫລ່ງນໍາພາ ໃນທົ່ວລະບົບການເມືອງປະຊາທິປະໄຕປະຊາຊົນ, ຜົນງານ ແລະ ໄຊຊະນະທີ່ຍາດມາໄດ້ນັ້ນ ນອກຈາກການນໍາພາ-ຊີ້ນໍາອັນໜັກແໜ້ນຂອງພັກ ແລ້ວ ແມ່ນມາຈາກຄວາມພະຍາຍາມສູ້ຊົນ, ບາກບັ່ນຂອງທົ່ວກຳລັງປະກອບອາວຸດ, ທົ່ວປວງຊົນລາວທັງຊາດ, ໃນນັ້ນມີການປະກອບສ່ວນດ້ວຍການເສຍສະລະ ຊີວິດເລືອດເນື້ອເຫື່ອແຮງ, ສະຕິປັນຍາອັນ ສໍາຄັນ ຂອງຖັນແຖວພະນັກງານ-ສະມາຊິກພັກ, ນັກຮົບ ແລະ ຕະຫລອດຮອດປະຊາຊົນບັນດາເຜົ່າຊັ້ນຄົນຕ່າງໆ. ພວກເຮົາມີຄວາມເອກອ້າງທະນົງໃຈຕໍ່ທາດແທ້ອັນດີງາມ, ມູນເຊື້ອວິລະຊົນ ແລະ ປະ ຫວັດສາດອັນສະຫວ່າງສະໄຫວຂອງພັກ.
ສະຫາຍ ພົທ ກົງທອງ ພົງວິຈິດ ຍັງໃຫ້ຮູ້ອີກວ່າ: ພາຍໃຕ້ການນຳພາຂອງພັກ ກຳລັງປ້ອງກັນຄວາມສະຫງົບໄດ້ເອົາໃຈໃສ່ກໍ່ສ້າງ ແລະ ປັບປຸງຕົນເອງໃຫ້ເຕີບໃຫຍ່ເຂັ້ມແຂງ, ມີແບບແຜນທັນສະໄໝ ສາມາດຍາດໄດ້ຜົນສຳເລັດຫລາຍດ້ານ ເປັນຕົ້ນກໍ່ສ້າງກໍາລັງປ້ອງກັນຄວາມສະຫງົບ ໃຫ້ໜັກແໜ້ນທາງດ້ານການເມືອງ-ແນວຄິດ; ກໍ່ສ້າງກໍາລັງປ້ອງກັນຄວາມສະຫງົບ ໃຫ້ເຂັ້ມແຂງທາງດ້ານການຈັດຕັ້ງ; ກໍ່ສ້າງກໍາລັງປ້ອງກັນຄວາມສະຫງົບ ໃຫ້ມີຄວາມຮູ້-ຄວາມສາມາດທາງດ້ານວິຊາສະເພາະ ເຊິ່ງໃນໄລຍະຜ່ານມາ ພັກ-ລັດ ກໍຄື ກະຊວງປ້ອງກັນຄວາມສະຫງົບ ໄດ້ເອົາໃຈໃສ່ບໍາລຸງ-ກໍ່ສ້າງກໍາລັງປ້ອງກັນຄວາມສະຫງົບ ຢູ່ພາຍໃນ ແລະ ຕ່າງປະເທດ ເຊິ່ງໄດ້ຍຶດໝັ້ນການກໍ່ສ້າງກໍາລັງປ້ອງກັນຄວາມສະຫງົບຢ່າງຮອບດ້ານ. ນອກຈາກນີ້, ພັກຍັງນໍາພາກໍາລັງພວກເຮົາ ເຮັດວຽກງານກໍ່ສ້າງຮາກຖານການເມືອງ, ຕິດພັນກັບວຽກງານພັດທະນາຊົນນະບົດ ເປັນວຽກງານຍຸດທະສາດຍາວນານ ທັງຖືເອົາປະຊາຊົນເປັນກົກເຫງົ້າພະລັງແຮງ, ເປັນບ່ອນອີງອັນແໜ້ນແກ່ນ ແລະ ເປັນພື້ນຖານສໍາຄັນໃນການຈັດຕັ້ງປະຕິບັດແນວທາງ, ແຜນນະໂຍບາຍ, ມະຕິ, ຄໍາສັ່ງຂອງພັກ-ລັດໄດ້ວາງອອກ. ສ່ວນການກໍ່ສ້າງກໍາລັງປ້ອງກັນຄວາມສະຫງົບ ໃຫ້ມີແບບແຜນການນໍາພາ ແລະ ວິທີການເຮັດວຽກທີ່ທັນສະໄໝ ເຊິ່ງພັກເດັດຂາດ, ໂດຍກົງ ແລະ ຮອບດ້ານຕໍ່ວຽກງານ ແລະ ກໍາລັງປ້ອງກັນຄວາມສະຫງົບ ແນໃສ່ເຮັດໃຫ້ກໍາລັງປ້ອງກັນຄວາມສະຫງົບ ມີຄວາມເຕີບໃຫຍ່ເຂັ້ມແຂງດ້ວຍບາດກ້າວທີ່ໜັກແໜ້ນ, ຍຶດໝັ້ນຫລັກການລວມສູນປະຊາທິປະໄຕ, ນໍາພາເປັນໝູ່ຄະນະ, ມີການແບ່ງງານ, ແບ່ງຄວາມຮັບຜິດຊອບພາຍໃນຄະນະພັກ, ປະຕິບັດລະບອບປະຊຸມ ແລະ ປຶກສາຫາລືຕົກລົງບັນຫາສໍາຄັນ ເພື່ອກໍານົດເປັນມະຕິ, ມີກົນໄກປະ ສານງານ ລະຫວ່າງການນໍາພາ-ຊີ້ນໍາ ຂອງຄະນະພັກແຕ່ລະຂັ້ນ ໂດຍສະເພາະ ພາຍຫລັງສໍາເລັດກອງປະຊຸມໃຫຍ່ຂັ້ນຂອງຕົນ, ຄະນະພັກແຕ່ລະຂັ້ນໄດ້ນໍາພາ-ຊີ້ນໍາ ແລະ ປັບປຸງລະບອບແບບແຜນນໍາພາ ແລະ ວິທີການເຮັດວຽກຕາມທິດຫັນເປັນທັນສະໄໝເທື່ອລະກ້າວ; ກໍານົດແຜນດໍາເນີນງານ, ແຜນການ, ແຜນງານ ແລະ ໂຄງການລະອຽດ ຂອງແຕ່ລະກົມກອງ-ທ້ອງຖິ່ນ ເພື່ອເປັນບ່ອນອີງໃນການຈັດຕັ້ງປະຕິບັດ ແລະ ອື່ນໆ
