ສະຖານທູດ ສປ ຈີນ ປະຈໍາລາວ ຈັດງານລ້ຽງ ຕ້ອນຮັບບຸນກຸດຈີນປີ 2025 ໃນຕອນຄ່ຳວັນທີ 22 ມັງກອນ 2025 ຢູ່ນະຄອນຫລວງວຽງຈັນ ໂດຍເປັນກຽດເຂົ້າຮ່ວມຂອງ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຮອງປະທານປະເທດແຫ່ງ, ທ່ານ ກິແກ້ວ ໄຂຄຳພິທູນຮອງນາຍົກລັດຖະມົນຕີ, ທ່ານ ຄຳພັນ ເຜີຍຍະວົງ ຫົວໜ້າ ຄະນະໂຄສະນາອົບຮົມສູນກາງພັກ, ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ມີບັນດາທູຕານຸທູດປະຈໍາລາວ ແລະ ແຂກຖືກເຊີນ ເຂົ້າຮ່ວມ.
ທ່ານ ຟາງ ຫົງ ເອກອັກຄະລັດຖະທູດ ສປ ຈີນ ປະຈຳລາວ ໄດ້ມີຄໍາເຫັນວ່າ: ການນຳເອົາຜົນ ສຳເລັດຂອງບຸນກຸດຈີນ ແລະ ການຟ້ອນລຳວົງຂອງລາວ ເຂົ້າເປັນມໍລະດົກໂລກໃນປີຜ່ານມາ ໄດ້ເພີ່ມບັນຍາກາດອັນອົບອຸ່ນ ໃຫ້ແກ່ພີ່ນ້ອງຮ່ວມຊາດຢູ່ລາວ. ຜ່ານການເຮັດວຽກໜັກໜ່ວງໜຶ່ງປີ, ພວກເຮົາໄດ້ສ້າງຊີວິດການເປັນຢູ່ຂອງແຕ່ລະຄອບຄົວໃຫ້ດີຂຶ້ນ, ປະກອບສ່ວນເຂົ້າໃນການພັດທະນາຂອງຈີນ-ລາວ ແລະ ຄວາມກ້າວໜ້າຂອງການພົວພັນສອງປະເທດ. ພ້ອມນີ້, ທ່ານເອກອັກຄະລັດຖະທູດ ຍັງໄດ້ສະແດງຄວາມພາກພູມໃຈ ຕໍ່ບັນດາຜົນສຳເລັດໃນການພັດທະນາການພົວພັນຮ່ວມມື ລະຫວ່າງ ສອງປະເທດຈີນ-ລາວ, ພ້ອມທັງຍິນດີທີ່ຈະຮ່ວມກັບທຸກພາກສ່ວນ ສືບຕໍ່ເປັນເຈົ້າການຊຸກຍູ້ ແລະປະ ກອບສ່ວນເຂົ້າໃນການສ້າງສາມິດຕະພາບ ລະຫວ່າງສອງປະເທດໃນດ້ານຕ່າງໆ.
ໂອກາດນີ້, ທ່ານ ບຸນທອງ ຈິດມະນີ ໄດ້ຕາງໜ້າພັກ-ລັດ ແລະ ປະຊາຊົນລາວ ສະແດງຄວາມດີອົກດີໃຈ ທີ່ໄດ້ເຂົ້າຮ່ວມງານລ້ຽງໃນຄັ້ງນີ້. ໃນປີຜ່ານມາ ເຫັນວ່າ ພາຍໃຕ້ການນໍາພາຂອງພັກກອມມູນິດຈີນ, ປະຊາຊົນຈີນ ໄດ້ພ້ອມກັນຍາດໄດ້ໄຊຊະນະອັນມະຫາສານ ໃນກາປົກປັກຮັກສາ ແລະ ພັດທະ ນາປະເທດຊາດ. ໂອກາດປີໃໝ່ທີ່ໝູນວຽນມາຮອດນີ້, ຂໍສົ່ງຄໍາອວຍພອນ ສປ ຈີນ ໃຫ້ສືບຕໍ່ປົກປັກຮັກສາພັດທະນາປະເທດ ໃຫ້ຮຸ່ງເຮືອງໄປຕາມທິດທີ່ ພັກກອມມູນິດຈີນໄດ້ກໍານົດໄວ້, ພວກເຮົາທັງສອງປະເທດ ພ້ອມກັນສືບຕໍ່ປົກປັກຮັກສາສາຍພົວພັນມິດຕະພາບອັນເປັນມູນເຊື້ອ, ການເປັນຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ຈົ່ງໝັ້ນຄົງຖະນົງແກ່ນຕະຫລອດໄປ.
ຂໍ້ມູນ-ພາບ: CMG FM93
