ກອງປະຊຸມຄະນະກຳມະການຄຸ້ມຄອງໄພພິບັດທົ່ວປະເທດ ປະຈຳປີ 2024 ແລະ ວາງທິດທາງແຜນການປີ 2025 ໄດ້ຈັດຂຶ້ນໃນວັນທີ 21 ມັງກອນ 2025 ທີ່ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ (ຄພສ), ມີ ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ຮອງປະທານ ຄພສ, ມີບັນດາຮອງລັດຖະມົນຕີ, ຮອງເຈົ້າແຂວງ ປະທານຄະນະກໍາມະການຄຸ້ມຄອງໄພພິບັດຂັ້ນແຂວງ, ນະຄອນຫຼວງວຽງຈັນ, ກອງເລຂາຄະນະກໍາມະການຄຸ້ມຄອງໄພພິບັດ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ພົນເອກ ຈັນສະໝອນ ຈັນຍາລາດ ກ່າວວ່າ: ກອງປະຊຸມຄັ້ງນີ້ເຊິ່ງເປັນກອງປະຊຸມທີ່ມີຄວາມສໍາຄັນ ໃນ 1 ປີ ທາງຄະນະກຳມະການຄຸ້ມຄອງໄພພິບັດທັງຂັ້ນສູນກາງ ແລະ ຂັ້ນແຂວງຈະໄດ້ມາ ເພື່ອຖອດຖອນບົດຮຽນໃນການຈັດຕັ້ງປະຕິບັດວຽກງານການຄຸ້ມຄອງໄພພິບັດ, ການສ້າງຄວາມເປັນເອກະພາບສູງ ແລະ ສ້າງຄວາມກຽມພ້ອມຮັບມືກັບໄພພິບັດທີ່ອາດຈະເກີດຂຶ້ນໃນປີ 2025 ໃນຂອບເຂດທົ່ວປະເທດ.
ໃນປີ 2024 ທີ່ຜ່ານມາ, ໄດ້ມີເຫດການໄພພິບັດທີ່ເກີດຂຶ້ນຢູ່ບັນດາແຂວງໃນຂອບເຂດທົ່ວປະເທດ ເຊິ່ງເຫັນໄດ້ວ່າເປັນເຫດໜຶ່ງທີ່ມີຄວາມຮຸນແຮງ ໂດຍສະເພາະເຫດການລົມພະຍຸພັດ, ດິນເຈື່ອນ, ນໍາຖ້ວມຊຸ ແລະ ນໍ້າຖ້ວມຂັງ ແລະ ໃນໄລຍະທ້າຍເດືອນກໍລະກົດ ຫາເດືອນກັນຍາ 2024 ມີເຫດການລົມພະຍຸດີເປເຊີນ, ພາຍຸພາພິລຸນ, ພາຍຸຢາກິ ແລະ ພາຍຸຊູລິກ ທີ່ພັດຜ່ານເຂົ້າມາ ສປປ ລາວ ເຮັດໃຫ້ຫຼາຍແຂວງໄດ້ຮັບຜົນກະທົບທັງໝົດ 16 ແຂວງ 1 ນະຄອນຫຼວງ, ຍັງແຕ່ແຂວງອັດຕະປື ແມ່ນບໍ່ໄດ້ຮັບຜົນກະທົບ ຕາມການເກັບກຳຂໍ້ມູນຂອງກອງເລຂາ ແລະ ລາຍງານຂອງບັນດາແຂວງ, ເຫັນໄດ້ວ່ານັບມື້ສະພາບໄພພິບັດມີຄວາມຮຸນແຮງ, ແຂວງທາງພາກເໜືອບໍ່ເຄີຍມີນໍ້າຖ້ວມຂັງ ແລະ ຮຸນແຮງກໍມີ ຄື: ໃນປີ 2024 ແຂວງຫົວພັນ, ຫຼວງນໍ້າທາ, ໄຊຍະບູລີ, ຫຼວງພະບາງ ແລະ ແຂວງອື່ນໆ ເຊິ່ງສ້າງຄວາມເສຍຫາຍເປັນຈໍານວນຫຼາຍສົມຄວນ.
ຕໍ່ກັບສະພາບໄພພິບັດທີ່ເກີດຂຶ້ນ ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ທ້ອງຖິ່ນ ໄດ້ເອົາໃຈໃສ່ນໍາພາ-ຊີ້ນໍາ, ຕິດຕາມ, ຊຸກຍູ້ການຄວບຄຸມ, ແກ້ໄຂສຸກເສີນ, ຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພພິບັດຢູ່ບັນດາແຂວງໃຫ້ສາມາດກັບສູ່ສະພາບປົກກະຕິໄດ້ຢ່າງວ່ອງໄວ, ໄດ້ຮີບຮ້ອນຟື້ນຟູສຸກເສີນ, ຮີບດ່ວນດ້ານພື້ນຖານໂຄງລ່າງ, ດ້ານການຜະລິດກະສິກຳ ແລະ ສະເໜີລັດຖະບານອະນຸມັດແກ້ໄຂໂຄງການຟື້ນຟູສຸກເສີນ ແລະ ຟື້ນຟູໄລຍະຍາວເຂົ້າໃນແຜນຟື້ນຟູປົກກະຕິ ແຜນລົງທຶນຂອງລັດ ປີ 2025 ນີ້.
ພ້ອມນີ້, ເພື່ອເປັນການປັບປຸງກົນໄກການປະສານງານ ຂອງຄະນະກຳມະການຄຸ້ມຄອງໄພພິບັດ ຢູ່ແຕ່ລະຂັ້ນໃຫ້ມີຄວາມເຂັ້ມແຂງ ແນໃສ່ເຮັດໃຫ້ການຈັດຕັ້ງປະຕິບັດວຽກງານປ້ອງກັນ, ຄວບຄຸມ ແລະ ຟື້ນຟູຫຼັງໄພພິບັດ ໃຫ້ໄດ້ຮັບຜົນດີ ໂດຍໄດ້ຊຸກຍູ້ການສ້າງຄວາມເຂັ້ມແຂງໃຫ້ແກ່ກອງທຶນຄຸ້ມຄອງໄພພິບັດຂັ້ນສູນກາງ ທາງລັດຖະບານກໍອະນຸມັດງົບປະມານຈໍານວນໜຶ່ງເຂົ້າກອງທຶນ, ຂັ້ນສູນກາງ ແລະ ທ້ອງຖິ່ນ ກໍໄດ້ມີການສ້າງຕັ້ງກອງທຶນໃນຂັ້ນຂອງຕົນ ໃຫ້ສາມາດສະໜອງຕໍ່ວຽກງານການ ຕອບໂຕ້ສຸກເສີນ, ຊຸກຍູ້ການສ້າງແຜນຍຸດທະສາດຫຼຸດຜ່ອນຄວາມສ່ຽງໄພພິບັດຂັ້ນແຂວງ ແລະ ແຜນປະຕິບັດງານຫຼຸດຜ່ອນຄວາມສ່ຽງໄພພິບັດຂັ້ນເມືອງ ແລະ ສ້າງແຜນກຽມພ້ອມຕອບໂຕ້ໄພພິບັດ ປະຈໍາປີ ແຕ່ສູນກາງຮອດທ້ອງຖິ່ນ, ສ້າງຄວາມເຂັ້ມແຂງໃຫ້ພາກສ່ວນທີ່ກ່ຽວຂ້ອງໃນວຽກງານຄຸ້ມຄອງ ໄພພິບັດໃນຂອບເຂດທົ່ວປະເທດ, ສ້າງທີມງານປະເມີນຜົນສຸກເສີນຂັ້ນສູນກາງ ແລະ ຂັ້ນທ້ອງຖິ່ນ, ຍົກລະດັບວຽກງານເຕືອນໄພ ໃຫ້ສັງຄົມສາມາດຮັບຮູ້ຂໍ້ມູນຂ່າວສານຢ່າງວ່ອງໄວ, ຊັດເຈນ ແລະ ສ້າງສູນປະຕິບັດງານສຸກເສີນໃຫ້ບາງແຂວງ.
ທ່ານ ວົງຄໍາ ພັນທະນຸວົງ ຫົວໜ້າກົມສັງຄົມສົງເຄາະ ກະຊວງ ຮສສ ຫົວໜ້າກອງເລຂາ ຄພສ ໄດ້ຂຶ້ນລາຍງານການຈັດຕັ້ງປະຕິບັດວຽກງານຄຸ້ມຄອງໄພພິບັດ ປະຈໍາປີ 2024 ແລະ ທິດທາງແຜນການ ປີ 2025 ແລະ ແຜນກຽມພ້ອມຕອບໂຕ້ໄພພິບັດ ປີ 2025 ວ່າ: ໃນໄລຍະ 1 ປີຜ່ານມາ, ໄດ້ມີເຫດການໄພພິບັດເກີດຂຶ້ນໃນຂອບເຂດທົ່ວປະເທດທັງໝົດ 69 ຄັ້ງ, ສົ່ງຜົນກະທົບຢູ່ 16 ແຂວງ, 147 ເມືອງ, 1.730 ບ້ານ, 58.753 ຄອບຄົວ, 271.168 ຄົນ ຍິງ 124.213 ຄົນ, ເສຍຊີວິດ 17 ຄົນ, ບາດເຈັບ 58 ຄົນ, ເຮືອນເປ່ເພ 6.432 ຫຼັງ, ເຮືອນຖືກເສຍຫາຍ 100% 110 ຫຼັງ, ໂຮງຮຽນ 126 ແຫ່ງ, ສະໜາມບິນ 1 ແຫ່ງ, ສັດລ້ຽງ 4.349 ໂຕ, ເນື້ອທີ່ 41.027 ເຮັກຕາ ແລະ ຊົນລະປະທານ 118 ແຫ່ງ ລວມມູນຄ່າເສຍຫາຍທັງໝົດ 6.747.509.456.029 ກີບ. ຈາກນັ້ນ, ຜູ້ເຂົ້າຮ່ວມໃນກອງປະຊຸມ, ກໍໄດ້ຮ່ວມກັນປຶກສາຫາລື, ແລກປ່ຽນຄວາມຄິດເຫັນ ເພື່ອຊອກຫາວິທີທາງໃນການແກ້ໄຂບາງບັນຫາທີ່ຍັງຄົງຄ້າງ ແລະ ຍັງເປັນສິ່ງທ້າທາຍ ເພື່ອເອກະພາບກັນສືບຕໍ່ຈັດຕັ້ງປະຕິບັດວຽກງານຄຸ້ມຄອງໄພພິບັດໃນປີ 2025 ໃຫ້ໄດ້ຮັບໝາກຜົນດີຂຶ້ນກວ່າເກົ່າ.
