ງານວາງສະແດງ ນຳເຂົ້າ-ສົ່ງອອກ ສປ ຈີນ ຄັ້ງທີ 137 ຫຼື Cantan fair ຈັດຂຶ້ນໃນຕອນເຊົ້າວັນທີ 17 ມັງກອນ 2024 ທີ່ໂຮງແຮມແລນມາກ, ນະຄອນຫຼວງວຽງຈັນ ໂດຍມີຮອງຫົວໜ້າກົມສົ່ງເສີມການຄ້າ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ, ເລຂາເອກທີ່ປຶກສາເສດຖະກິດກາານຄ້າ ຈີນ ປະຈຳ ລາວ, ຮອງຫົວໜ້າສູນການຄ້າ ສາກົນສປ ຈີນ ພ້ອມດ້ວຍຕາງໜ້າຈາກພາກລັດ, ພາກທຸລະກິດ ເຂົ້າຮ່ວມ.
ຈຸດປະສົງເພື່ອແນໃສ່ຊຸກຍູ້ສົ່ງເສີມການຮ່ວມມືດ້ານການຄ້າ ແລະ ການລົງທຶນຂອງສອງຝ່າຍ ລາວ-ຈີນ (ແຂວງກວາງໂຈ) ໃຫ້ນັບມື້ເພີ່ມທະວີຂຶ່ນນ ໂດຍພື້ນຖານການຮ່ວມມືຂອງສອງຝ່າຍຕ່າງຝ່າຍຕ່າງມີຜົນຮ່ວມກັນ, ພ້ອມກັນສ້າງເສດຖະກິດຂອງປະເທດໃຫ້ມີຄວາມເຂັ້ມແຂງ, ຮັ່ງມີ ແລະ ມີຄວາມໝັ້ນຄົງຢ່າງບໍ່ຢຸດຢັ້ງ.
ພາຍໃຕ້ການຮ່ວມມືຂອງລັດຖະບານຂອງສອງປະເທດ ໄດ້ຍູ້ສົ່ງເສີມການຮ່ວມມືແບບຮອບດ້ານເພື່ອສ້າງຄວາມເຂັ້ມແຂງ ແລະ ຄວາມຈະເລີນກ້າວໜ້າໃຫ້ກັບປະເທດຊາດ ສ້າງຄວາມເປັນ ຢູ່ທີ່ດີຂື້ນໃຫ້ກັບປະຊາຊົນຂອງສອງຊາດ ແລະ ສ້າງຄວາມເຊື່ອ ໝັ້ນໃຫ້ກັບນັກທຸລະກິດຂອງທັງສອງປະເທດໄດ້ຮ່ວມກັນລົງ ທຶນຄ້າຂາຍຮ່ວມກັນ; ໂດຍສະເພາະ ເມືອງກວາງໂຈ ເປັນເມືອງຫລວງຂອງມົນທົນກວາງຕຸ້ງ ແລະ ເປັນເມຶອງທີ່ໃຫຍ່ທີ່ສຸດໃນພາກໃຕ້ຂອງຈີນ ແລະ ເປັນສູນກາງດ້ານການຄ້າ ແລະ ການຂົນສົ່ງທີ່ໃຫຍ່ທີ່ສຸດມີພື້ນຖານເສດຖະກິດທີ່ເຂັ້ມແຂງ, ສຳລັບງານວາງສະແດງ Canton Fair (ງານວາງສະແດງສິນຄ້າ ນຳເຂົ້າ ແລະ ສົ່ງອອກຂອງຈີນ) ເປັນງານວາງສະແດງທີ່ເກົ່າແກ່ ແລະ ຍິ່ງໃຫຍ່ ຂອງ ສປ ຈີນ ຊຶ່ງມີຫລາຍປະເທດເຂົ້າຮ່ວມໃນງານນີ້, ເພື່ອຊອກຫາຊ່ອງທາງ ແລະ ໂອກາດໃນການຄ້າຂາຍ, ລົງທຶນ. ງານວາງສະແດງນຳເຂົ້າ-ສົ່່ງອອກ ສປຈີນ ຄັ້ງທີ່ 137 ຫຼື Cantan fair ເຊິ່ງແມ່ນງານໜື່ງທີ່ມີຊື່ສຽງ ແລະ ເປັນເວທີທີ່ສຳຄັນໃນການສົ່ງເສີມການຮ່ວມມືການຄ້າໃນທົ່ວໂລກ ເຊິ່ງເປັນໂອກາດອັນດີໃຫ້ແກ່ ສປປ ລາວ ເພື່ອຈະໄດ້ເຂົ້າໃຈເລິກເຊິ່ງຂື້ນກ່ຽວກັບງານດັ່ງກ່າວ, ເປັນການເປີດໂອກາດໃຫ້ຫົວໜ່ວຍທຸລະກິດສາມາດໂຄສະນາສິນຄ້າຂອງຕົນ ແລະ ສາມາດຈັບຈອງສິນຄ້າທີ່ຕົນເອງຕ້ອງການເພື່ອມາປະກອບເຂົ້າໃນທຸລະກິດຂອງຕົນ.
