ວັນທີ 15 ມັງກອນ 2025 ທີ່ສະພາແຫ່ງຊາດ ໄດ້ມີການນຖະແຫລ່ງຂ່າວ ກ່ຽວກັບການຈັດຕັ້ງການທາບທາມຄຳເຫັນ ໃສ່ເນື້ອໃນຮ່າງລັດຖະທຳມະນູນ ສະບັບປັບປຸງປີ 2025 ໃນທົ່ວປະເທດ ແນໃສ່ເຮັດໃຫ້ປະຊາ ຊົນ ລາວບັນດາເຜົ່າ ທັງພາຍໃນປະເທດ ແລະ ພີ່ນ້ອງຊາວລາວຢຕ່າງປະເທດ ໄດ້ຮັບຊາບ ຢ່າງທົ່ວເຖິງ.
ໂອກາດນີ້, ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຮອງປະທານຜູ້ປະຈຳການ ແລະ ຫົວໜ້າກອງເລຂາ ຂອງຄະນະກຳມະການລະດັບຊາດ ປັບປຸງລັດຖະທຳມະນູນ ໄດ້ໃຫ້ຮູ້ວ່າ: ການຈັດຕັ້ງການທາບທາມຄຳເຫັນ ໃສ່ຮ່າງລັດຖະທຳມະນູນ ສະບັບປັບປຸງ ຄັ້ງນີ້ ມີຄວາມໝາຍສຳຄັນຢ່າງຍິ່ງ ແລະ ແມ່ນຄວາມຈຳເປັນ ຢ່າງພາວະວິໄສ ເພາະວ່າ ລັດຖະທຳມະນູນ ແມ່ນນິຕິກຳສູງສຸດຂອງລັດ ແຫ່ງ ສປປ ລາວ ແລະ ເປັນກົດໝາຍພື້ນຖານຂອງຊາດລາວເຮົາ. ຜ່ານການກະກຽມຢ່າງເຄັ່ງຮ້ອນເປັນເວລາ 6 ເດືອນເຕັມ ນັບແຕ່ເດືອນມິຖຸນາ 2024 ເປັນຕົ້ນມາ, ຮ່າງລັດຖະທຳມະນູນ ສະບັບປັບປຸງໄດ້ຮັບການຄົ້ນຄວ້າ, ວິເຄາະ, ວິໄຈ ແລະ ປັບປຸງໃຫ້ສຳເລັດເປັນສະບັບສົມບູນໂດຍພື້ນຖານ. ສະນັ້ນ, ປະຕິບັດຕາມມາດຕາ 14 ຂອງລັດຖະທຳມະນູນ ສະບັບປີ 2015 ແລະ ມາດຕາ 39 ຂອງກົດໝາຍວ່າດ້ວຍການສ້າງນິຕິກຳ ສະບັບເລກທີ 06/ສພຊ, ລົງວັນທີ 16 ພະຈິກ 2021, ຄະນະກຳມະການລະດັບຊາດ ປັບປຸງລັດຖະທຳມະນູນ ຈຶ່ງຕົກລົງໃຫ້ນຳເອົາຮ່າງລັດຖະທຳມະນູນ ໄປຈັດຕັ້ງທາບທາມຄຳເຫັນທາງເລິກ ໂດຍຜ່ານກອງປະຊຸມ ແລະ ທາງກວ້າງ ໂດຍຜ່ານພາຫະນະສື່ມວນຊົນ ເພື່ອລະດົມຄຳເຫັນ, ສະຕິປັນຍາລວມ ຂອງທົ່ວພັກ, ທົ່ວລັດ, ກຳລັງປະກອບອາວຸດ, ພາກທຸລະກິດ ທັງລັດ ແລະ ເອກະຊົນ ກໍຄື ປະຊາຊົນລາວບັນດາເຜົ່າ ໃນທົ່ວປະເທດ ແນໃສ່ເຮັດໃຫ້ເນື້ອໃນຂອງຮ່າງລັດຖະທຳມະນູນ ສະບັບປັບປຸງ ເປັນສະບັບທີ່ມີເນື້ອໃນຄົບຖ້ວນ, ຮັດກຸມ ແລະ ສົມບູນ ເພື່ອຈະນຳໄປສະເໜີຕໍ່ກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ພິຈາລະນາຮັບຮອງເອົາ.
ຈຸດປະສົງ ແລະ ລະດັບຄາດໝາຍ ໃນການຈັດຕັ້ງການທາບທາມຄຳເຫັນ ໃສ່ຮ່າງລັດຖະທຳມະນູນ ສະບັບປັບປຸງ ຄັ້ງນີ້, ແນໃສ່ປະກອບຄຳເຫັນ ເຂົ້າໃສ່ເນື້ອໃນຂອງຮ່າງລັດຖະທຳມະນູນ ທີ່ໄດ້ປັບປຸງ ຊຶ່ງຄະນະກຳມະການລະດັບຊາດ ໄດ້ນຳມາຈັດຕັ້ງການທາບທາມຄຳເຫັນຄັ້ງນີ້ ໃຫ້ເປັນສະບັບຮ່າງທີ່ມີເນື້ອໃນຄົບຖ້ວນ, ຮັດກຸມ ແລະ ສອດຄ່ອງກັບໂຄງການການເມືອງຂອງພັກ ສະບັບທີ 3 ແລະ ລາຍງານການ ເມືອງຕໍ່ກອງປະຊຸມໃຫຍ່ ຄັ້ງທີ 12 ຂອງພັກປະຊາຊົນປະຕິວັດລາວ, ເຮັດໃຫ້ຮ່າງລັດຖະທຳມະນູນກາຍເປັນຮ່າງສະບັບສົມບູນ; ເຊື່ອມຊຶມທັດສະນະຊີ້ນຳຂອງສູນກາງພັກ ຕໍ່ການປັບປຸງລັດຖະທຳມະນູນຄັ້ງນີ້ ແລະ ສ້າງຄວາມຮັບຮູ້ເຂົ້າໃຈທີ່ຖືກຕ້ອງ ຕໍ່ການປັບປຸງເນື້ອໃນຂອງຮ່າງລັດຖະທຳມະນູນ ເພື່ອສືບຕໍ່ຍົກສູງສະຕິເຄົາລົບ ແລະ ປະຕິບັດລັດຖະທຳມະນູນ ໃນທົ່ວສັງຄົມ ໃຫ້ເຂັ້ມງວດ ແລະ ສັກສິດກວ່າເກົ່າ; ປະກອບສ່ວນຍູ້ແຮງຂະບວນການແຂ່ງຂັນກັນ ສ້າງຜົນງານຂໍ່ານັບຮັບຕ້ອນການດຳເນີນກອງປະຊຸມໃຫຍ່ສາມຂັ້ນ ຂອງພັກປະຊາຊົນປະຕິວັດລາວ ແລະ ຂ່ຳນັບຮັບຕ້ອນສາມວັນປະຫວັດ ສາດທີ່ສຳຄັນຂອງຊາດລາວເຮົາ ໃນປີ 2025 ຄື: ວັນເກີດຂອງ ປະທານ ໄກສອນ ພົມວິຫານ ຄົບຮອບ 105 ປີ, ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ແລະ ວັນສ້າງຕັ້ງລັດແຫ່ງ ສປປ ລາວ ຄົບຮອບ 50 ປີ.
ສໍາລັບເນື້ອໃນທີ່ສຳຄັນຕົ້ນຕໍ ໃນການຈັດຕັ້ງການທາບທາມຄຳເຫັນ ໃສ່ຮ່າງລັດຖະທຳມະນູນ ປະກອບມີ: ຮ່າງລັດຖະທຳມະນູນ ສະບັບປັບປຸງ; ບົດອະທິບາຍການປັບປຸງເນື້ອໃນຂອງຮ່າງລັດຖະທຳມະນູນ; ຄຳຖາມເຈາະຈີ້ມ ແລະ ອື່ນໆ ເຊິ່ງການຈັດຕັ້ງການທາບທາມຄຳເຫັນ ໃສ່ຮ່າງລັດຖະທຳມະນູນ ໂດຍຜ່ານກອງປະຊຸມນັ້ນ, ຄະນະກຳມະການລະດັບຊາດ ປັບປຸງລັດຖະທຳມະນູນ ໄດ້ຕົກລົງໃຫ້ເປີດກອງປະຊຸມຢູ່ໃນ 7 ຈຸດ ຄື: ຈຸດທີ 1 ສະເພາະພະນັກງານນຳພາ-ຄຸ້ມຄອງ ຂອງບັນດາກະຊວງ, ອົງການ ອ້ອມຂ້າງສູນກາງ, ລວມທັງມະຫາວິທະຍາໄລແຫ່ງຊາດ, ມະຫາວິທະຍາໄລສຸຂະພາບ, ສະພາການຄ້າ ແລະ ອຸດ ສາຫະກຳແຫ່ງຊາດລາວ ຈັດຢູ່ນະຄອນຫລວງວຽງຈັນ (ວັນທີ 16 ມັງກອນ 2025); ຈຸດທີ 2 ສຳລັບພະນັກງານນຳພາ-ຄຸ້ມຄອງຂອງ 3 ແຂວງ ຄື: ນະຄອນຫລວງວຽງຈັນ, ແຂວງວຽງຈັນ ແລະ ແຂວງບໍລິຄໍາໄຊ ຈັດຢູ່ນະຄອນຫລວງວຽງຈັນ (ວັນທີ 17 ມັງກອນ 2025); ຈຸດທີ 3 ແຂວງຊຽງຂວາງ, ແຂວງໄຊສົມບູນ ແລະ ແຂວງຫົວພັນ ຈັດຢູ່ແຂວງຊຽງຂວາງ (ວັນທີ 16-17 ມັງກອນ 2025); ຈຸດທີ 4 ແຂວງສະຫວັນນະເຂດ, ແຂວງຄໍາມ່ວນ ແລະ ແຂວງຈຳປາສັກ ຈັດຢູ່ແຂວງສະຫວັນນະເຂດ (ວັນທີ 16-17 ມັງກອນ 2025 ); ຈຸດທີ 5 ແຂວງຫລວງນໍ້າທາ, ແຂວງບໍ່ແກ້ວ ແລະ ແຂວງຜົ້ງສາລີ ຈັດຢູ່ແຂວງຫລວງນໍ້າທາ (ວັນທີ 23-24 ມັງກອນ 2025); ຈຸດທີ 6 ແຂວງຫລວງພະບາງ, ແຂວງໄຊຍະບູລີ ແລະ ແຂວງອຸດົມໄຊ ຈັດຢູ່ແຂວງຫລວງພະບາງ (ວັນທີ 23-24 ມັງກອນ 2025); ຈຸດທີ 7 ແຂວງເຊກອງ, ແຂວງສາລະວັນ ແລະ ແຂວງອັດຕະປື ຈັດຢູ່ແຂວງເຊກອງ (ວັນທີ 21-22 ມັງກອນ 2025). ສ່ວນການຈັດຕັ້ງການທາບທາມຄຳເຫັນ ໂດຍຜ່ານພາຫະນະສື່ມວນຊົນນັ້ນ, ຈະມີການຖະແຫລງຂ່າວ, ຈັດລາຍການສົນທະນາ ກ່ຽວກັບການປັບປຸງເນື້ອໃນຮ່າງລັດຖະ ທຳມະນູນ, ສໍາພາດບຸກຄົນໃນຄະນະກໍາມະການລະດັບຊາດ ປັບປຸງລັດຖະທຳມະນູນ, ຄະນະປະຈຳສະພາແຫ່ງຊາດ, ພະນັກງານບຳນານ ແລະ ຕົວແທນຂອງພາກສ່ວນຕ່າງໆ ທັງຢູ່ສູນກາງ ແລະ ທ້ອງຖິ່ນ ໂດຍຜ່ານໂທລະພາບ, ວິທະຍຸກະຈາຍສຽງແຫ່ງຊາດ ແລະ ສື່ອື່ນໆ, ພິມເນື້ອໃນຮ່າງລັດຖະທຳມະນູນ ສະບັບປັບປຸງ ໃສ່ໜັງສືພິມ, ເວັບໄຊ ແລະ ອື່ນໆ.
ການຈັດຕັ້ງການທາບທາມຄຳເຫັນ ໃສ່ຮ່າງລັດຖະທຳມະນູນ ແມ່ນໃຫ້ສຳເລັດທົ່ວປະເທດ ໃນເດືອນ ມັງກອນ 2025 ນີ້. ຫລັງຈາກນັ້ນ, ຈະໄດ້ສະຫລຸບສັງຮວມຜົນຂອງການທາບທາມຄຳເຫັນ ເພື່ອລາຍງານຂໍທິດຊີ້ນຳຈາກຂັ້ນເທິງ, ແລ້ວສືບຕໍ່ຮຽບຮຽງຮ່າງລັດຖະທຳມະນູນ ໃຫ້ກາຍເປັນຮ່າງສະບັບສົມບູນ. ໃນການຈັດຕັ້ງການທາບທາມຄຳເຫັນ ໃສ່ຮ່າງລັດຖະທຳມະນູນ ສະບັບປັບປຸງຄັ້ງນີ້, ພວກເຮົາຈົ່ງພ້ອມກັນເອົາໃຈໃສ່ຄົ້ນຄວ້າ, ເຊື່ອມຊຶມ ແລະ ກຳແໜ້ນທັດສະນະຊີ້ນຳຂອງສູນກາງພັກປະຊາຊົນ ປະຕິວັດລາວ ຕໍ່ການປັບປຸງລັດຖະທຳມະນູນ ເພື່ອຮັບປະກັນເຮັດໃຫ້ການປະກອບຄຳເຫັນຖືກທິດ, ສອດຄ່ອງກັບແນວທາງປ່ຽນແປງໃໝ່ຮອບດ້ານ ມີຫລັກການຂອງພັກ ແລະ ສະພາບຄວາມເປັນຈິງໃນການປົກປັກຮັກສາ ແລະ ພັດທະນາປະເທດຊາດລາວ ໃນໄລຍະໃໝ່, ມີປະສິດທິພາບ, ປະສິດທິຜົນ.
