ເພື່ອເປັນການປົກປັກຮັກສາ ແລະ ສົ່ງເສີມບັນດາຮີດຄອງປະເພນີ ວັດທະນະທຳອັນດີງາມຂອງເຜົ່າ ຕິດພັນກັບການສົ່ງເສີມການທ່ອງທ່ຽວ ທັງເປັນການເຕົ້າໂຮມຄວາມສາມັກຄີບັນດາເຜົ່າພາຍໃນເມືອງ ໃນວັນທີ 12 ມັງກອນ ຜ່ານມານີ້, ບ້ານແຟນ ຄຸ້ມ3 ເມືອງຮຸນ ແຂວງອຸດົມໄຊ ໄດ້ຈັດງານສະເຫຼີມສະຫຼອງບຸນເຕັດນຶມ ຫຼື ບຸນເກິຣ. ໂດຍການເຂົ້າຮ່ວມຂອງ ທ່ານ ນາງ ຄຳໝັ້ນ ແກ້ວບຸນຫວນ ເຈົ້າເມືອງໆຮຸນ, ແຂກຖືກເຊີນ ແລະ ພໍ່ແມ່ປະຊາຊົນພາຍໃນບ້ານເຂົ້າຮ່ວມດ້ວຍບັນຍາກາດຟົດຟື້ນ.
ທ່ານ ສີເຟືອງ ສັນຍາລາດ ຮອງນາຍບ້ານໆແຟນ ໄດ້ຜ່ານປະຫວັດຄວາມເປັນມາຂອງບຸນປະເພນີ ບຸນເຕັດນຶມ ຂອງເຜົ່າກຶມມຸ ຊຶ່ງເປັນບຸນປາງໜຶ່ງທີ່ມີຄວາມສຳຄັນປະຈຳເຜົ່າກຶມມຸ ເປັນຮີດຄອງອັນເກົ່າແກ່ມາແຕ່ບູຮານນະການ ເປັນມໍລະດົກວັດທະນະທຳອັນດີງາມ ທີ່ຊົງຄຸນຄ່າໜຶ່ງໃນພື້ນຖານວັດທະນະທຳແຫ່ງຊາດລາວທີ່ໄດ້ສືບທອດຕໍ່ກັນມາ ໂດຍມີພິທີກຳຫຼາຍຢ່າງທີ່ຕິດພັນກັບການດຳລົງຊີວິດປະຈຳວັນ.
ສະຫຼຸບແລ້ວບຸນເຕັດນຶມ ແມ່ນການສະເຫຼີມສະຫຼອງຜົນສຳເລັດການຜະລິດປີເກົ່າ ເພື່ອກ້າວເຂົ້າສູ່ການຜະລິດປີໃໝ່ ໂດຍຈະມີການເອີ້ນຂວັນ ຜູກແຂນ ອວຍພອນເຊິ່ງກັນ ແລະ ກັນ ທັງມີການສົມມາຄາລະວະຕໍ່ສິ່ງທີ່ໄດ້ເຮັດຜິດພາດ ລ່ວງເກີນ, ຂໍພອນນຳເຈົ້າຖິ່ນເຈົ້າຖານ ສິ່ງສັກສິດທັງປ່ວງ ແລະ ມີການຄົບງັນ ສ້າງຄວາມມ່ວນຊື່ນ ພາຍຫຼັງທີ່ສຳເລັດຈາກການເກັບກູ້ຜົນລະປູກຂຶ້ນເລົ້າ ຂຶ້ນເຢຍແລ້ວ ເຜົ່າກຶມມຸຢູ່ຕາມບ້ານຕ່າງໆ ກໍຈະພາກັນຈັດງານບຸນດັ່ງກ່າວຂຶ້ນທຸກໆປີຈົນສືບທອດມາເຖິງທຸກວັນນີ້.
(ຂ່າວ: ອຳຄາ ສຸລິນທອງ)
