ທ່ານ ນາງ ບຸນຄໍາ ວໍລະຈິດ, ລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໃຫ້ຮູ້ໃນໂອກາດຊີ້ແຈງຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ເມື່ອບໍ່ດົນມານີ້ວ່າ: ປີ 2025 ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ວາງຄາດໝາຍຂຶ້ນທະບຽນອອກໃບຕາດິນທົ່ວປະເທດໃຫ້ໄດ້ 500,000 ຕອນ ໃນຈໍານວນຕອນດິນທັງໝົດ 1,6 ລ້ານຕອນ ໃນປີ 2025, ແຕ່ອີງໃສ່ການຈັດຕັ້ງປະຕິບັດຕົວຈິງເຫັນວ່າ ເລີ່ມແຕ່ການປະຕິບັດຄາດ ໝາຍການຂຶ້ນທະບຽນອອກໃບຕາດິນ ນັບແຕ່ປີ 2021-2024 ເຫັນວ່າ ບໍ່ສາມາດບັນລຸຄາດໝາຍທີ່ກໍານົດໄວ້, ອີງໃສ່ສະພາບຄວາມເປັນຈິງໃນໄລຍະຜ່ານມາ.
ສະນັ້ນ ຈຶ່ງເຫັນວ່າ ໃນປີ 2025 ການກໍານົດຄາດໝາຍ 500,000 ຕອນ ອາດຈະບໍ່ສາມາດບັນລຸໄດ້ ຍ້ອນສາຍເຫດເກົ່າທີ່ປະສົບໃນໄລຍະຜ່ານມາ ເປັນຕົ້ນ: ໃນຂໍ້ມູນສໍາມະໂນຕອນດິນ ແມ່ນນອນໃນດິນສາມປະເພດປ່າຕ້ອງໄດ້ມີການສໍາຫຼວດຈັດສັນກ່ອນ ແລະ ຈໍາແນກປະເພດ ເປັນໃບຢັ້ງຢືນການນໍາໃຊ້ທີ່ດິນ ແລະ ໃບຕາດິນຕາມແຜນຈັດສັນທີ່ດິນປ່າໄມ້; ການຈັດສັນທີ່ດິນຂັ້ນເມືອງ ແລະ ຂັ້ນບ້ານບໍ່ທັນສໍາເລັດ, ບໍ່ທັນກຳນົດເຂດສະຫງວນ; ການມອບວຽກຂຶ້ນທະບຽນອອກໃບຕາດິນໃຫ້ເມືອງຍັງບໍ່ທັນສໍາເລັດ ຫຼື ເມືອງທີ່ສໍາເລັດແລ້ວຍັງບໍ່ທັນໄດ້ມອບຂໍ້ມູນສໍານວນທີ່ດິນ ແລະ ອື່ນໆ.
ຢ່າງໃດກໍຕາມ, ເພື່ອສູ້ຊົນໃຫ້ສາມາດຂຶ້ນທະບຽນອອກໃບຕາດິນບັນລຸຕາມແຜນການທີ່ວາງໄວ້. ທ່ານ ນາງ ບຸນຄໍາ ວໍລະຈິດ ໃຫ້ຮູ້ວ່າ: ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມຈະໄດ້ສືບຕໍ່ເອົາໃຈໃສ່ໃນການກຳນົດວິທີການ ແລະ ຫລາຍມາດຕະການປະຕິບັດ ເຊິ່ງໜຶ່ງໃນນັ້ນແມ່ນການແກ້ໄຂປະກົດການຫຍໍ້ທໍ້ໃນຖັນແຖວພະນັກງານທີ່ເຮັດວຽກກ່ຽວກັບທີ່ດິນເນື່ອງຈາກຜ່ານມາຍັງມີຫາງສຽງຈົ່ມວ່າເກີດຂຶ້ນຈາກສັງຄົມຈໍານວນບໍ່ໜ້ອຍ.
ສໍາລັບໃນປີ 2024 ຜ່ານມາ, ລັດຖະບານ ວາງຄາດໝາຍຂຶ້ນທະບຽນອອກໃບຕາດິນໃຫ້ໄດ້ທັງໝົດ 300,000 ຕອນໃນທົ່ວປະເທດ, ແຕ່ຈາກການລາຍງານຂອງລັດ ຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງ ແວດລ້ອມຕໍ່ກອງປະຊຸມສະ ໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃຫ້ຮູ້ວ່າ: ໝົດປີ 2024 ແມ່ນບັນລຸພຽງ 220,000 ຕອນ.
BT, ວສລ
