ກະຊວງ ເເຜນການ ເເລະ ການລົງທຶນ ສປປ ລາວ ຮ່ວມກັບ ກະຊວງເເຜນການ ເເລະ ການລົງທຶນ ສສ ຫວຽດນາມ ຈັດກອງປະຊຸມກອງປະຊຸມຮ່ວມມືລົງທຶນ ລາວ-ຫວຽດນາມ ປະຈໍາປີ 2025 ຢູ່ນະຄອນຫລວງວຽງຈັນ ໃນວັນທີ 9 ມັງກອນ 2025 ໂດຍການເປັນປະທານຮ່ວມຂອງ ທ່ານ ເພັດ ພົມພິພັກ ລັດຖະມົນຕີ ກະຊວງເເຜນການ ເເລະ ການລົງທຶນ ສປປ ລາວ ເເລະ ທ່ານ ຫວຽນຈິດັງ ລັດຖະມົນຕີ ກະຊວງເເຜນການ ເເລະ ການລົງທຶນ ສສ ຫວຽດນາມ ໂດຍເປັນກຽດເຂົ້າຮ່ວມຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ເເຫ່ງ ສປປ ລາວ ເເລະ ທ່ານ ຟ້າມ ມິງ ຈິງ ນາຍົກລັດຖະມົນຕີ ເເຫ່ງ ສສ ຫວຽດນາມ.ມີຜູ້ຕາງໜ້າຈາກ ພາກລັດ ເເລະ ພາກທຸລະກິດ ເຂົ້າຮ່ວມ.
ກອງປະຊຸມຈັດຂຶ້ນພາຍໃຕ້ຫົວຂໍ້ “ສົ່ງເສີມການພັດທະນາທີ່ຍືນຍົງ ແລະ ຄວາມສີວິໄລຮ່ວມກັນ” ຖືເປັນເວທີແຫ່ງການເສີມຂະຫຍາຍສາຍພົວພັນ, ຄວາມສາມັກຄີພິເສດ ແລະ ການຮ່ວມມືຮອບດ້ານທີ່ ສະຫາຍເລຂາທິການໃຫຍ່ ປະທານປະເທດ ຂອງ 2 ປະເທດ ໄດ້ລົງນາມໃນສົນທິສັນຍາ ແລະ ການຮ່ວມມື ຄົບຮອບ 47 ປີ (18/7/1977-18/7/2024) ແລະ ການສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 62 ປີ (5/9/1962-5/9/2024).
ໃນໂອກາດດັ່ງກ່າວ, ທ່ານ ເພັດ ພົມພິພັກ ໄດ້ໃຫ້ຮູ້ວ່າ: ລັດຖະບານ ສປປ ລາວ ຖືເອົາວຽກງານ ການຄ້າ-ການລົງທຶນ ເປັນໜຶ່ງໃນແຜນງານບຸລິມະສິດຂອງລັດຖະ ບານ ເພື່ອຊຸກຍູ້ການເຕີບໂຕທາງດ້ານເສດຖະກິດ, ການສ້າງລາຍຮັບເຂົ້າປະເທດ ກໍຄື ການພັດທະນາເສດຖະກິດ-ສັງຄົມ ແຫ່ງຊາດ. ພາຍໃນ 11 ເດືອນ ຕົ້ນປີ 2024 ມູນຄ່າການຄ້າສອງຝ່າຍ ລາວ-ຫວຽດນາມ ສາມາດບັນລຸ 1,94 ຕື້ໂດລາສະຫະລັດ ເພີ່ມຂຶ້ນ 32,8% ທຽບໃສ່ໄລຍະດຽວກັນຂອງປີ 2023. ໃນນັ້ນ ມູນຄ່າການນຳເຂົ້າສິນຄ້າຈາກຫວຽດນາມ ບັນລຸ 641,8 ລ້ານໂດລາສະຫະລັດ ເພີ່ມຂຶ້ນ 32% ແລະ ມູນຄ່າສົ່ງອອກໄປຫວຽດນາມ ບັນລຸ 1,3 ຕື້ໂດລາສະຫະລັດ ເພີ່ມຂຶ້ນ 26,2%. ໃນດ້ານການລົງທຶນ, ນັບແຕ່ ສປປ ລາວ ເປີດຮັບການລົງທຶນຈາກຕ່າງປະເທດ ຈົນເຖິງປັດຈຸບັນ ກໍໄດ້ມີການລົງທຶນຈາກ ບັນດາປະເທດທີ່ມີຄວາມສົນໃຈມາລົງທຶນ ຢູ່ ສປປ ລາວ.
ໃນນັ້ນ, ການລົງທຶນຈາກ ສສ ຫວຽດນາມ ມີທັງໝົດ 417 ໂຄງການ, ມີມູນຄ່າອະນຸມັດຫລາຍກວ່າ 4,9 ຕື້ໂດລາສະຫະລັດ, ການລົງທຶນ ຂອງຫວຽດນາມ 100% ມີມູນຄ່າ 4,6 ຕື້ໂດລາສະຫະລັດ ເຊິ່ງສ່ວນໃຫຍ່ຈະເປັນການລົງທຶນໃນຂະແໜງບໍ່ແຮ່ ມີມູນຄ່າການລົງທຶນ 1.040 ລ້ານໂດລາສະຫະລັດ, ຂະແໜງພະລັງງານໄຟຟ້າ ມີມູນຄ່າການລົງທຶນ 980 ລ້ານໂດລາສະຫະ ລັດ, ຂະແໜງກະສິກໍາ ມີມູນຄ່າການລົງທຶນ 680 ລ້ານໂດລາສະຫະລັດ ແລະ ຂະແໜງບໍລິການອື່ນໆ ມີມູນຄ່າການລົງທຶນ 2 ຕື້ໂດລາສະຫະລັດ. ການລົງທຶນ ຈາກ ສສ ຫວຽດນາມ ໃນປັດຈຸບັນ ແມ່ນຈັດຢູ່ໃນອັນດັບ 3 ຈາກ 53 ປະເທດ ທີ່ເຂົ້າມາລົງທຶນໃນ ສປປ ລາວ.
ໂອກາດນີ້, ທ່ານ ສອນໄຊ ສີພັນດອນ ແລະ ທ່ານ ຟ້າມ ມິງ ຈິງ ໄດ້ສະແດງຄວາມຊົມເຊີຍຕໍ່ຜົນສຳເລັດທີພົ້ນເດັ່ນທາງການຄ້າ ແລະ ການລົງທຶນ ລະຫວ່າງ ສປປ ລາວ ແລະ ສສ ຫວຽດນາມ, ພ້ອມທັງ ຮຽກຮ້ອງໃຫ້ທຸກພາກ ສ່ວນ ລວມທັງ ພາກທຸລະກິດ ຂອງ ລາວ ແລະ ຫວຽດນາມ ໃຫ້ເພີ່ມທະວີ ການຮ່ວມມືເພື່ອເຮັດໃຫ້ ມູນຄ່າການຄ້າ ແລະ ການລົງທຶນ ເພີ່ມຂຶ້ນ ໃຫ້ສົມຄູ່ກັບມູນເຊື້ອ ແລະ ທ່າແຮງ ການຮ່ວມມືພິເສດຂອງ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ.
ພ້ອມກັນນີ້, ຍັງໄດ້ມອບໃບອະນຸຍາດການລົງທຶນ, ສັນຍາສຳປະທານ ເເລະ ສັນ ຍາພັດທະນາໂຄງການ ໃຫ້ເເກ່ 12 ບໍລິສັດ ແລະ ເປີດນຳໃຊ້ ລະບົບຊຳລະສະກຸນເງິນ ກີບ-ດົງ ຜ່ານລະບົບ ຄິວອາໂຄດ (QR Code) ລະຫວ່າງ ລາວ ແລະ ຫວຽດນາມ ເພື່ອຫລຸດຜ່ອນຄວາມຕ້ອງການເງິນຕາຕ່າງປະ ເທດ ໃຫ້ເເກ່ ປະຊາຊົນ ເເລະ ພາກທຸລະກິດ ຂອງ 2 ຊາດ ໃນການຊຳລະ ບັນດາທຸລະກຳ ທີ່ເກີດຂຶ້ນ ຜ່ານລະບົບ Online ໃຫ້ສາມາດນຳໃຊ້ ສະກຸນເງິນຂອງໂຕເອງ ເຊິ່ງເປັນສັນຍາລັກ ທີ່ເປັນຮູບປະທຳ ຂອງການຮ່ວມມືດ້ານການລົງທຶນ ທີ່ເຂັ້ມແຂງຂອງ 2 ປະເທດ.
