ຂ່າວຕ່າງປະເທດ ລາຍງານໃນທ້າຍອາທິດຜ່ານມາ, ທ່ານ ຊູຈິໂອໂນ ລັດຖະມົນຕີກະຊວງການຕ່າງປະເທດ ອິນໂດເນເຊຍ ເປີດເຜີຍວ່າ: ການເຂົ້າຮ່ວມເປັນສະມາຊິກກຸ່ມປະເທດບຣິກ (BRICS) ຈະສ້າງຜົນດີໃຫ້ແກ່ອິນໂດເນເຊຍ, ພາກພື້ນ ແລະ ໂລກ.
ກ່ອນໜ້ານີ້, ໃນວັນທີ 6 ມັງກອນ ຜ່ານມາ ກະຊວງການຕ່າງປະເທດເບຣຊິນປະກາດວ່າ: ອິນໂດເນເຊຍ ໄດ້ເຂົ້າເປັນສະມາຊິກກຸ່ມປະເທດ BRICS ຢ່າງສົມບູນແບບ ຊຶ່ງຖືເປັນການເພີ່ມຈຳນວນສະມາຊິກຄັ້ງທຳອິດຫຼັງຈາກທີ່ເບຣຊິນຮັບຕຳແໜ່ງປະທານໝູນວຽນກຸ່ມປະເທດ BRICS ໃນປີ 2025.
ທ່ານ ຊູຈິໂອໂນ ລະບຸໃນຖະແຫຼງການຕໍ່ສື່ມວນຊົນປະຈໍາປີວ່າ: ການຕັດສິນໃຈຄັ້ງນີ້ບໍ່ແມ່ນການດຳເນີນງານພຽງຂ້າມຄືນ. ແຕ່ແມ່ນໝາກຜົນຂອງຄວາມມານະພະຍາຍາມທາງການທູດ, ຄວາມໝັ້ນຄົງ ແລະ ຄວາມຕັ້ງໃຈຂອງ ອິນໂດເນເຊຍ. ໂດຍການຕັດສິນໃຈຄັ້ງນີ້ແມ່ນສອດຄ່ອງກັບນະໂຍບາຍການຕ່າງປະເທດຂອງອິນໂດເນເຊຍໃນການມີສ່ວນຮ່ວມຢ່າງເສລີ.
ທ່ານ ຊູຈິໂອໂນ ເປີດເຜີຍວ່າ: ໃນຖານະທີ່ເປັນສະມາຊິກຂອງກຸ່ມ BRICS. ອິນໂດເນເຊຍແນໃສ່ເຊື່ອມຕໍ່ຜົນປະໂຫຍດຂອງບັນດາປະເທດພວມພັດທະນາ ໂດຍສະເພາະໃນພາກພື້ນອາຊີປາຊີຟິກ ແລະປະກອບສ່ວນເຂົ້າໃນການຜ່ອນຄາຍຄວາມເຄັ່ງຕຶງທາງດ້ານເສດຖະກິດ ແລະ ພູມສາດ.
ກຸ່ມ BRICS ໄດ້ຮັບການສ້າງຕັ້ງຂຶ້ນໂດຍປະເທດເບຣຊິນ, ຣັດເຊຍ, ອິນເດຍ ແລະ ຈີນ ໃນປີ 2009 ແລະ ມີອາຟຣິກາໃຕ້ເຂົ້າຮ່ວມໃນປີ 2010. ໂດຍປັດຈຸບັນມີສະມາຊິກທັງໝົດ 10 ປະເທດ.
