ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ (ສນຊ) ຕ້ອນຮັບການເຂົ້າພົບປະຢ້ຽມຢາມຂອງທ່ານ ບີລາລ ໂອແຣັງ ເຊັບ ດູຮານີ ຜູ້ຕາງໜ້າ ອົງການອຸ່ຍນິເຊັບ ປະຈໍາລາວ ຄົນໃໝ່ ທີ່ສູນກາງແນວລາວສ້າງຊາດ ມີບັນດາທ່ານຈາກສອງອົງການເຂົ້າຮ່ວມ ໃນວັນທີ 9 ມັງກອນ 2025 ນີ້.
ທ່ານ ປະທານ ສນຊ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ທ່ານ ບີລາລ ໂອແຣັງ ເຊັບ ດູຮານີ ທີ່ໄດ້ຖືກແຕ່ງຕັ້ງເປັນຜູ້ຕາງໜ້າຄົນໃໝ່ຂອງ ອົງການຢູນິເຊັບ ປະຈໍາລາວ ແລະ ໄດ້ສະແດງຄວາມຂອບໃຈ ຕໍ່ອົງການອຸ່ຍນິເຊັບ ທີ່ໄດ້ໃຫ້ການສະໜັບສະໜູນຢ່າງຕໍ່ເນື່ອງ ຕໍ່ໂຄງການລິເລີ່ມຕ່າງໆ ໂດຍສະເພາະແມ່ນໄດ້ເອົາໃຈໃສ່ຕໍ່ເດັກນ້ອຍ ແລະ ແມ່ຍິງລາວ ທ່ານໄດ້ຍົກໃຫ້ເຫັນເຖິງຄວາມສໍາຄັນຂອງການຮ່ວມມື ລະຫວ່າງ ອົງການອຸ່ຍນິເຊັບ ແລະ ອົງການແນວລາວສ້າງຊາດ ຕະຫຼອດໄລຍະຜ່ານມາ ແລະ ເພື່ອສືບຕໍ່ຮ່ວມມືໃຫ້ບັນລຸເປົ້າໝາຍທີ່ໄດ້ກໍານົດໄວ້.
ຜູ້ຕາງໜ້າອົງການອຸ່ຍນີເຊັບໄດ້ສະແດງຄວາມຂອບໃຈ ເປັນຢ່າງຍິງ ສໍາລັບການຕ້ອນຮັບອັນອົບອຸ່ນ ແລະ ໄດ້ເນັ້ນຢໍ້າເຖິງຄວາມມຸ່ງໝັ້ນ ໃນປີ 2025 ລະຫວ່າງ ອົງການອຸ່ຍນິເຊັບ ແລະ ສູນກາງແນວລາວສ້າງຊາດການຮ່ວມມືທີ່ດີ ເປັນຕົ້ນ ທາງດ້ານການປົກປ້ອງສິດທິເດັກ ແລະ ແມ່ຍິງ ການເຂົ້າເຖິງຊຸມຊົນໃນການປຸກລະດົມການສັກຢາວັກຊິນຕ່າງໆ ພ້ອມກັນນີ້ ສອງຝ່າຍໄດ້ແລກປ່ຽນກ່ຽວກັບການຮ່ວມມືໃນຕໍ່ໜ້າຕື່ມອີກ.
