ທ່ານ ນາງ ສຸດາພອນ ຄົມທະວົງ, ຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງຫລວງພະບາງ ໃຫ້ຮູ້ໃນໂອກາດລາຍງານກອງປະຊຸມປຶກ ສາຫາລື ເພື່ອກຽມຄວາມພ້ອມຕ້ອນຮັບນັກທ່ອງທ່ຽວໃນລະດູການທ່ອງທ່ຽວຂອງແຂວງຫລວງພະບາງ ຈັດຂຶ້ນເມື່ອບໍ່ດົນມານີ້ ວ່າ: ເພື່ອເປັນການກຽມຄວາມພ້ອມໃນການຮອງຮັບບັນດາກຸ່ມນັກທ່ອງທ່ຽວ ທັງພາຍ ໃນ ແລະ ສາກົນໃນລະດູການທ່ອງທ່ຽວ ສໍາລັບສົກ 2024- 2025 ໂດຍອີງໃສ່ແຜນພັດທະນາ, ສົ່ງເສີມ ແລະ ຄຸ້ມ ຄອງການທ່ອງທ່ຽວ ແຂວງຫຼວງພະບາງ ສໍາລັບ 5 ປີ (2025-2029), ແຂວງຫລວງພະບາງ ໄດ້ກຳນົດແຜນທິດທາງ ແລະ ຄາດໝາຍສູ້ຊົນຫລາຍດ້ານ ເຊັ່ນ: ຄາດໝາຍສູ້ຊົນຮອດປີ 2029 ສູ້ຊົນດຶງດູດນັກທ່ອງທ່ຽວໃຫ້ໄດ້ທັງໝົດປະມານ 10 ລ້ານເທື່ອຄົນ, ໃນນັ້ນ, ນັກທ່ອງທ່ຽວສາກົນໃຫ້ໄດ້ 6 ລ້ານເທື່ອຄົນ; ສະເລ່ຍຄ່າໃຊ້ຈ່າຍຂອງນັກທ່ອງທ່ຽວປະມານ 4,9 ຕື້ໂດລາສະຫະລັດ.
ໃນປີ 2025 ຈະສູ້ຊົນດຶງດູດນັກທ່ອງທ່ຽວໃຫ້ໄດ້ທັງໝົດ 2,306,375 ເທື່ອຄົນ, ໃນນີ້, ນັກທ່ອງທ່ຽວພາຍໃນ 522,270 ເທື່ອຄົນ ແລະ ນັກທ່ອງທ່ຽວສາກົນ 1,784,105 ເທື່ອຄົນ, ສາມາດສ້າງລາຍໄດ້ຈາກການໃຊ້ຈ່າຍຂອງນັກທ່ອງທ່ຽວທັງ ໝົດ 1,276,447,055 ໂດລາສະຫະລັດ. ຄຽງຄູ່ກັນນີ້, ຕ້ອງໄດ້ສືບຕໍ່ປັບປຸງ ແລະ ພັດທະນາໂຄງລ່າງພື້ນຖານ ແລະ ສິ່ງອໍານວຍຄວາມສະດວກດ້ານການທ່ອງທ່ຽວ ໃນສະຖານທີ່ທ່ອງທ່ຽວທີ່ສໍາຄັນຂອງແຂວງ ໃຫ້ໄດ້ມາດຕະຖານສະຖານທີ່ທ່ອງທ່ຽວແຫ່ງຊາດ ແລະ ຫັນເຂົ້າສູ່ລະບົບທີ່ທັນສະໄໝເທື່ອລະກ້າວ ເປັນຕົ້ນແມ່ນ: ສະຖານທີ່ທ່ອງທ່ຽວນໍ້າຕົກຕົກຕາດກວາງຊີ, ວັດຊຽງທອງ, ພູສີ, ຫໍພິພິທະພັນແຫ່ງຊາດຫຼວງພະບາງ ແລະ ຖ້ຳຕິ່ງ.
ພ້ອມນີ້ ຕ້ອງສືບຕໍ່ຍົກລະດັບຄຸນນະພາບບຸກຄະລາກອນໃນຂົງເຂດທ່ອງທ່ຽວ ທັງພາກລັດ ແລະ ພາກທຸລະກິດ ໃຫ້ພຽງພໍດ້ວຍຫຼາຍຮູບການ. ສຸມໃສ່ປັບປຸງ, ຊຸກຍູ້ບ້ານເປົ້າໝາຍການທ່ອງທ່ຽວແບບອະນຸລັກປະຊາຊົນມີ ສ່ວນຮ່ວມ ຢູ່ 8 ບ້ານ 3 ເມືອງ 1 ນະຄອນ, ປະກອບມີ: ບ້ານລ້ອງເລົາ 1-2, ບ້ານທ່າແປ້ນ, ບ້ານຊຽງລ້ອມ, ບ້ານຈ່ານເໜືອ, ບ້ານຊ່າງໄຫ, ບ້ານນາຍາງເໜືອ ແລະ ບ້ານນາຍາງໃຕ້ ເພື່ອສະເໜີຄັດເລືອກຂໍຮັບລາງວັນມາດຕະ ຖານອາຊຽນ ໃນປີ 2025 ແລະ ອື່ນໆ.
ສໍາລັບປີ 2024 ຜ່ານມາ, ແຂວງຫລວງພະບາງ ສາມາດດຶງ ດູດນັກທ່ອງທ່ຽວຕ່າງປະເທດໄດ້ທັງໝົດ 1,532,393 ຄົນ, ໃນນີ້ ຫລາຍກວ່າໝູ່ແມ່ນນັກທ່ອງທ່ຽວຈີນ ຈໍານວນ 438,355 ຄົນ, ຮອງລົງມາແມ່ນນັກທ່ອງທ່ຽວໄທ ຈໍານວນ 175,575 ຄົນ.
ປັດຈຸບັນ, ແຂວງຫລວງພະບາງ ມີແຫຼ່ງທ່ອງທ່ຽວທີ່ໄດ້ເປີດບໍລິການແລ້ວ 158 ແຫ່ງ ໃນຈໍານວນທັງໝົດ 228 ແຫ່ງໃນທົ່ວແຂວງ, ໃນນີ້ ມີສິ່ງຮອງຮັບດ້ານການທ່ອງທ່ຽວ ເຊັ່ນ: ບໍລິສັດນໍາທ່ຽວ 123 ບໍລິສັດ, ຮ້ານອາຫານ 384 ຮ້ານ, ຮ້ານບັນ ເທີງ 58 ຮ້ານ, ຮ້ານນວດ-ສະປາ 41 ຮ້ານ, ພະນັກງານນໍາທ່ຽວລະດັບແຂວງ ຈໍານວນ 196 ຄົນ, ຍິງ 81 ຄົນ, ໂຮງແຮມ – ລີສອດ 116 ແຫ່ງ ແລະ ເຮືອນພັກ 435 ແຫ່ງ ສາມາດຮອງຮັບນັກທ່ອງທ່ຽວໄດ້ 11,280 ເທື່ອຄົນຕໍ່ມື້.
BT, ວສລ
