ກະຊວງການຕ່າງປະເທດ ຈັດພິທີປະກາດການຈັດຕັ້ງ, ປາຖະກະຖາວັນສໍາຄັນຂອງພັກຂອງຊາດ ແລະ ສະຫລຸບຜົນງານການເຄື່ອນໄຫວວຽກງານປະຈໍາປີ 2024 ແລະ ທິດທາງແຜນການ ສຳລັບປີ 2025 ໃນຕອນບ່າຍວັນທີ 23 ທັນວາ 2024 ຢູ່ສູນການຮ່ວມມືສາກົນ ແລະ ການຝຶກອົບຮົມ (ICTC) ພາຍໃຕ້ການເປັນປະທານຂອງ ທ່ານ ທອງສະຫວັນ ພົມວິຫານ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ, ມີຄະນະພັກ-ຄະນະນຳກະຊວງ, ຄະນະກົມ, ຄະນະພະແນກ ແລະ ພະນັກງານກະຊວງການຕ່າງປະເທດທີ່ຢູ່ພາຍໃນ ເຂົ້າຮ່ວມ, ລວມເຖິງ ບັນດາພະນັກງານນັກການທູດລາວ ທີ່ປະຈຳຢູ່ຕ່າງປະເທດ ກໍໄດ້ເຂົ້າຮ່ວມຜ່ານລະບົບປະຊຸມທາງໄກ.
ໃນພິທີ ທ່ານ ທົງສັກ ກົມມະເມືອງ ຮອງຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຜ່ານ ມະຕິຕົກລົງຂອງເລຂາທິການສູນກາງພັກ ວ່າດ້ວຍການບົ່ງຕົວແຕ່ງຕັ້ງ ກໍາມະການປະຈໍາພັກກະຊວງການຕ່າງ ປະເທດ ແລະ ດໍາລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ຮອງລັດຖະມົນຕີກະຊວງການຕ່າງປະເທດ ຈໍານວນ 2 ທ່ານ ຄື: ທ່ານ ໄມທອງ ທໍາມະວົງສາ ເປັນກໍາມະການປະຈໍາພັກກະຊວງການຕ່າງປະເທດ, ຮອງລັດຖະ ມົນຕີກະຊວງກການຕ່າງປະເທດ ແລະ ທ່ານ ພົງສະຫວັນ ສີສຸລາດ ເປັນກໍາມະການປະຈໍາພັກກະຊວງການຕ່າງປະ ເທດ, ຮອງລັດຖະມົນຕີກະຊວງການຕ່າງປະເທດ, ພ້ອມດ້ວຍປະກາດການແຕ່ງຕັ້ງ ຫົວໜ້າກົມ 1 ທ່ານ, ຫົວໜ້າພະແນກ 4 ທ່ານ ແລະ ຮອງຫົວໜ້າພະແນກ 7 ທ່ານ.
ໂອກາດນີ້, ທ່ານ ພົງສະຫວັນ ສີສຸລາດ,ຮອງລັດຖະມົນຕີກະຊວງການຕ່າງປະເທດ (ອະດີດຫົວໜ້າຫ້ອງ ການ) ໄດ້ຜ່ານບົດລາຍງານສະຫລຸບຕີລາຄາໝາກຜົນ ຂອງການເຄື່ອນໄຫວວຽກງານການຕ່າງປະເທດ ປະຈຳປີ 2024 ແລະ ແຜນການຈຸດສຸມສຳລັບປີ 2025. ໃນປີ 2024 ນີ້ ເປັນປີໜຶ່ງທີ່ສໍາຄັນ ແລະ ມີຫລາຍເຫດການເດັ່ນເກີດຂຶ້ນ, ການເຄື່ອນໄຫວວຽກງານການຕ່າງປະເທດ ໄດ້ປະສົບຜົນສໍາເລັດຫລາຍດ້ານ, ຫລາຍທິດ, ຫລາຍລະດັບ, ຫລາຍຂົງເຂດ ທັງໃນຂອບສອງຝ່າຍ ແລະ ຫລາຍຝ່າຍ, ສືບຕໍ່ເພີ່ມທະວີການພົວພັນຮ່ວມມືກັບປະເທດເພື່ອນມິດ ອື່ນໆໃນໂລກ ທັງຢູ່ໃກ້ ແລະ ຢູ່ໄກ, ຍາດໄດ້ຜົນສຳເລັດພົ້ນເດັ່ນຫຼາຍດ້ານຢ່າງໜ້າພາກພູມໃຈ ທັງໃນຂອບການຮ່ວມມືສອງຝ່າຍ ແລະ ຫລາຍຝ່າຍ, ສາມາດຂົນຂວາຍຍາດແຍ່ງເອົາການຮ່ວມມື, ສະໜັບສະໜູນ ແລະ ຊ່ວຍເຫລືອຈາກປະເທດເພື່ອນມິດຍຸດທະສາດ, ປະເທດຄູ່ຮ່ວມພັດທະນາ ແລະ ຈາກສາກົນ ໄດ້ຢ່າງຫລວງຫລາຍ. ໃນນັ້ນ, ຜົນສໍາເລັດອັນພົ້ນເດັ່ນ ກໍແມ່ນການຕ້ອນຮັບບັນດາຜູ້ນໍາປະເທດເພື່ອນມິດໃນການເດີນທາງມາຢ້ຽມຢາມ ສປປ ລາວ ໂດຍສະເພາະໃນໂອກາດ ສປປ ລາວ ເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44,45 ແລະ ກອງປະຊຸມປິ່ນອ້ອມອື່ນໆ ຈໍານວນ 400 ກວ່າຄັ້ງ, ລວມເຖິງ ການຄົ້ນຄວ້າຂຶ້ນແຜນການຢ້ຽມຢາມຕ່າງປະເທດ ແລະ ເຂົ້າຮ່ວມກອງປະຊຸມລະດັບພາກພື້ນ ແລະ ສາກົນໃຫ້ແກ່ການນໍາຂັ້ນສູງ ຢ່າງມີຈຸດສູມ, ມີປະສິດທິພາບ ແລະ ປະຢັດມັດຖະຍັດ; ບັນດາສຳນັກງານຜູ້ຕາງໜ້າ ແຫ່ງ ສປປ ລາວ ປະຈຳຢູ່ຕ່າງປະເທດ ກໍຄື ບັນດານັກການທູດລາວ ກໍໄດ້ເຄື່ອນໄຫວວຽກງານການທູດການເມືອງ, ການທູດເສດຖະກິດ ແລະ ການທູດພາກປະຊາຊົນ ຢ່າງຕັ້ງໜ້າ ແລະ ມີຜົນສຳເລັດສູງ, ສາມາດຂົນຂວາຍຍາດແຍ່ງເອົາການຮ່ວມມືຈາກພາຍນອກ ແລະ ການສະໜັບສະໜູນຊ່ວຍເຫລືອຈາກສາກົນ ໄດ້ຢ່າງຫລວງຫລາຍ, ປົກປ້ອງໄດ້ສິດຜົນປະໂຫຍດອັນຊອບທໍາຂອງ ສປປ ລາວ ຢູ່ເວທີພາກພື້ນ ແລະ ສາກົນ, ລວມເຖິງການຂົນຂວາຍດຶງດູດຄົນເຊື້ອຊາດລາວຢູ່ປະເທດຕ່າງໆ, ສາມາດດຶງດູດເອົາການລົງທຶນຈາກຕ່າງ ປະເທດ, ການທ່ອງທ່ຽວ ແລະ ການຮ່ວມມືດ້ານເສດຖະກິດ ມາສູ່ປະເທດຊາດ ໄດ້ຢ່າງມີປະສິດທິພາບ ແລະ ມີທ່ວງທ່າເພີ່ມຂຶ້ນ, ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ເປັນແຕ່ລະໄລະຍະ. ພ້ອມກັນນີ້, ບັນດາຜູ້ເຂົ້າຮ່ວມກອງປະຊຸມ ກໍໄດ້ຮ່ວມກັນປະກອບຄຳຄິດເຫັນ ໃສ່ບົດລາຍງານສະຫລຸບຕີລາຄາການເຄື່ອນ ໄຫວວຽກງານການຕ່າງປະເທດໃນໄລຍະປີຜ່ານມາ ແລະ ວຽກຈຸດສຸມໃນຕໍ່ໜ້າ ເພື່ອໃຫ້ມີເນື້ອໃນຄົບຖ້ວນສົມບູນຍິ່ງຂຶ້ນ.
ໃນໂອກາດດຽວກັນ, ທ່ານ ທອງສະຫວັນ ພົມວິຫານ ໄດ້ໃຫ້ກຽດປາຖະກະຖາ 2 ວັນປະຫວັດສາດສໍາຄັນຂອງພັກຂອງຊາດ ຄື: ວັນຊາດທີ 2 ທັນວາ ຄົບຮອບ 49 ປີ ແລະ ວັນວັນເກີດ ປະທານ ໄກສອນ ພົມວິຫານ ຄົບຮອບ 104 ປີ, ພ້ອມທັງສະແດງຄວາມຊົມເຊີຍຕໍ່ຜົນງານການເຄື່ອນໄຫວວຽກງານໃນໄລຍະຜ່ານມາ, ສັງເກດຕີລາຄາສະພາບການຂອງພາກພື້ນ ແລະ ສາກົນ ແລະ ໄດ້ທົບທວນຄືນຜົນການເຄື່ອນໄຫວວຽກງານການຕ່າງປະເທດໃນໄລຍະ 1 ປີຜ່ານມາ, ໄດ້ເຫັນດີເປັນເອກະພາບຕໍ່ບົດສະຫລຸບຕີລາຄາການ ເຄື່ອນໄຫວວຽກງານການຕ່າງປະເທດ ປະຈຳປີ 2024 ແລະ ທິດທາງວຽກງານຈຸດສຸມຂອງ ປີ 2025. ເພື່ອຮັບປະກັນການປະຕິບັດວຽກງານການຕ່າງປະ ເທດ ໃນປີ 2025 ໃຫ້ມີປະສິດທິພາບ ແລະ ປະສິດທິຜົນສູງຂຶ້ນ, ທ່ານ ທອງສະຫວັນ ພົມວິຫານ ຍັງໄດ້ໃຫ້ທິດຊີ້ ນໍາ ແລະ ຮຽກຮ້ອງໃຫ້ຄະນະນໍາແຕ່ລະຂັ້ນ ແລະ ພະນັກງານ-ລັດຖະກອນທຸກຄົນ ທັງຢູ່ພາຍໃນ ແລະ ຕ່າງປະເທດ ຈົ່ງສືບຕໍ່ເສີມຂະຫຍາຍຜົນສຳເລັດທີ່ຍາດມາໄດ້, ທັງຍັງໄດ້ເນັ້ນໃສ່ບາງວຽກທີ່ສໍາຄັນ ຄື: ໃຫ້ພ້ອມກັນສືບຕໍ່ຮັກສາຄວາມສາມັກຄີ, ສືບຕໍ່ເຄື່ອນໄຫວຢ່າງມີປະສິດທິຜົນ ແລະ ຢູ່ໃນທ່າບຸກ ໂດຍຍຶດໝັ້ນໃນແນວທາງການຕ່າງປະເທດ ‘‘ສັນຕິພາບ, ເອກະລາດ, ມິດຕະພາບ ແລະ ການຮ່ວມມື” ຕາມທິດນໍາ ‘‘ເພີ່ມມິດ ຫລຸດຜ່ອນສັດຕູ’’ ໂດຍປະຕິບັດຕາມຄໍາຂວັນ “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ” ແລະ “ເພີ່ມທະວີປະສິດທິພາບການຈັດຕັ້ງປະຕິບັດຜົນການເຄື່ອນໄຫວການຕ່າງປະເທດ ໃຫ້ປະກົດຜົນເປັນຮູບປະທໍາ”; ສືບຕໍ່ເອົາໃຈໃສ່ວຽກງານສຶກສາອົບຮົມທາງດ້ານການເມືອງ-ແນວຄິດ ໃຫ້ແກ່ສະມາຊິກພັກ-ພະນັກງານ, ລວມເຖິງເອົາໃຈໃສ່ຂຶ້ນແຜນກໍ່ສ້າງ ແລະ ຍົກລະດັບຄວາມຮູ້ຄວາມສາມາດຂອງ ພະນັກງານ-ລັດຖະກອນ ຢ່າງເປັນຮູບປະທຳ ແນໃສ່ສ້າງພະນັກງານ-ລັດຖະກອນ ໃຫ້ມີຄວາມຊ່ຽວຊານດ້ານພາສາຕ່າງປະເທດ ແລະ ດ້ານວິຊາສະ ເພາະ; ສືບຕໍ່ເອົາໃຈໃສ່ການປະຕິບັດວຽກງານວິຊາສະເພາະໃຫ້ມີປະສິດທິຜົນ ໃຫ້ໄດ້ຕາມລະດັບຄາດໝາຍ; ເອົາໃຈ ໃສ່ຕິດຕາມບັນດາໂຄງການ ແລະ ການຈັດຕັ້ງປະຕິບັດບັນດາໂຄງການຕ່າງໆ ຕາມ 6 ແຜນງານ ແລະ 38 ໂຄງການ ໃນໄລຍະປີ 2021-2025 ຂອງກະຊວງການຕ່າງປະເທດ; ສືບຕໍ່ປັບປຸງ ແລະ ສ້າງນິຕິກຳຂະແໜງການຕ່າງປະເທດ ໃຫ້ແທດເໝາະກັບສະພາບການປັດຈຸບັນ ເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານການຕ່າງປະເທດ ໃຫ້ມີຄວາມຮັດກຸມ ແລະ ມີປະສິດທິຜົນ; ສືບຕໍ່ເອົາໃຈໃສ່ວຽກງານການບໍລິການ ໂດຍສະເພາະເອົາໃຈໃສ່ໃນການຮັກສາໄດ້ການອໍານວຍຄວາມສະດວກໃຫ້ເເກ່ການອອກໜັງສືຜ່ານເເດນໃຫ້ມີຄວາມວ່ອງໄວ; ສືບຕໍ່ເອົາໃຈໃສ່ວຽກງານໂຄສະນາ ແລະ ເຜີຍແຜ່ບັນດາແນວທາງນະໂຍບາຍຂອງພັກ-ລັດ, ນິຕິກໍາ ທີ່ພົວພັນກັບວຽກງານການຕ່າງປະເທດ, ການດຶງດູດການລົງທຶນ ກໍຄື ວຽກງານການທູດເສດຖະກິດ, ການຂົນຂວາຍຄົນເຊື້ອຊາດລາວຢູ່ຕ່າງປະເທດ ແລະ ອື່ນໆ. ພ້ອມນີ້, ກໍຂໍໃຫ້ບັນດາສໍານັກງານຕາງໜ້າການທູດ ສປປ ລາວ ປະຈໍາຢູ່ຕ່າງປະເທດ ສືບຕໍ່ເຄື່ອນໄຫວວຽກງານຂອງຕົນ ເພື່ອຍົກສູງ ເເລະ ຮັດເເໜ້ນການຮ່ວມມືກັບປະເທດເຈົ້າພາບ ຫລື ອົງການຈັດຕັ້ງສາກົນຕ່າງໆ ໄປຄຽງຄູ່ກັນນັ້ນກໍໃຫ້ເອົາໃຈໃສ່ເຄື່ອນໄຫວວຽກງານການທູດເສດຖະກິດ ໃຫ້ຫລາຍຂຶ້ນ ເພື່ອຂົນຂວາຍເພື່ອດຶງດູດການລົງ ທຶນ ລວມທັງຍົກລະດັບການພົວພັນທາງດ້ານເສດຖະກິດ ກັບປະເທດເຈົ້າພາບໃຫ້ສູງຂຶ້ນ ເພື່ອຍາດເອົາຜົນປະ ໂຫຍດສູງສຸດມາສູ່ປະເທດຊາດ.
ມາຮອດປັດຈຸບັນ, ສປປ ລາວ ໄດ້ມີສາຍພົວພັນທາງການທູດກັບທັງໝົດ 151 ປະເທດ, ມີສໍານັກງານຕາງໜ້າການທູດ ຢູ່ຕ່າງປະເທດ 41 ແຫ່ງ. ໃນນີ້, ມີສະຖານເອກອັກຄະລັດຖະທູດ 28 ແຫ່ງ, ສໍານັກງານຜູ້ຕາງໜ້າຖາວອນ 3 ແຫ່ງ, ສະຖານກົງສຸນໃຫຍ່ 10 ແຫ່ງ ແລະ ຫ້ອງການກົງສຸນ 1 ແຫ່ງ; ມີກົງສຸນກິດຕິມະສັກຂອງ ສປປ ລາວ ຢູ່ຕ່າງປະເທດ 24 ແຫ່ງ, ກົງສຸນກິດຕິມະສັກຂອງຕ່າງປະເທດຢູ່ ສປປ ລາວ 18 ແຫ່ງ. ນອກນັ້ນ, ຍັງໄດ້ສໍາເລັດການຍົກລະດັບດ່ານທ້ອງຖິ່ນຂຶ້ນເປັນດ່ານສາກົນ 3 ດ່ານ ຄື: ດ່ານສາກົນປາກຕາພານ, ດ່ານສາກົນບ້ານວັງ ແລະ ດ່ານສາກົນປ່າຮ່າງ, ປັດຈຸບັນ ສປປ ລາວ ມີດ່ານຊາຍແດນທັງໝົດ 103 ດ່ານ. ໃນນັ້ນ, ດ່ານສາກົນມີ 33 ດ່ານ, ດ່ານທ້ອງຖິ່ນ 17 ດ່ານ ແລະ ດ່ານປະເພນີ 53 ດ່ານ.
