ກົມໂຄສະນາການທ່ອງທ່ຽວ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ(ຖວທ), ຈັດກອງປະຊຸມ ຖອດຖອນບົດຮຽນການຈັດຕັ້ງປະຕິບັດປີທ່ອງທ່ຽວລາວ 2024 ໃນວັນທີ 23 ທັນວາ 2024, ທີ່ນະຄອນຫລວງວຽງຈັນ ໂດຍມີ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ, ມີຮອງລັດຖະມົນຕີ, ມີຫົວໜ້າກົມ, ຮອງກົມ, ຜູ້ຕາງໜ້າອະນຸກໍາມະການ, ສະມາຄົມ ແລະ ພາກທຸລະກິດທ່ອງທ່ຽວທີ່ກ່ຽວຂ້ອງ, ພະແນກ ຖວທ ນະຄອນຫລວງວຽງຈັນ ແລະ ຖວທ ແຂວງ ໃນຂອບເຂດທົ່ວປະເທດ ເຂົ້າຮ່ວມ.
ທ່ານ ນາງ ສວນສະຫວັນ ວິຍະເກດ ໄດ້ມີຄໍາເຫັນວ່າ: ລັດຖະບານແຫ່ງ ສປປ ລາວ ໄດ້ຖືເອົາວຽກງານການທ່ອງທ່ຽວ ເປັນຂະແໜງເສດຖະກິດປາຍແຫລມຂະແໜງການໜຶ່ງ ທີ່ກະຕຸ້ນບັນດາຂະແໜງການທີ່ເປັນຕ່ອງໂສ້ໃຫ້ມີການພັດທະນາໄປພ້ອມໆກັນ ດ້ວຍການສ້າງອາຊີບ ແລະ ລາຍຮັບ ທີ່ກວ້າງຂວາງ ຊຶ່ງນຳເອົາເງິນຕາຕ່າງປະ ເທດ ມາສູ່ປະເທດລາວເຮົາເປັນຈຳນວນຫລາຍພໍສົມຄວນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດໃຫ້ມີຄວາມເຂັ້ມແຂງ, ຊ່ວຍຫລຸດຜ່ອນຄວາມທຸກຍາກຂອງປະຊາຊົນບັນດາເຜົ່າ ຕາມນະໂຍບາຍຂອງພັກ ແລະ ລັດຖະບານ ທີ່ໄດ້ວາງອອກເທື່ອລະກ້າວ. ລັດຖະບານໄດ້ຕົກລົງອະນຸມັດໃຫ້ຈັດປີທ່ອງທ່ຽວລາວ 2024 ຊຶ່ງພິທີເປີດປີທ່ອງທ່ຽວລາວ 2024 ໄດ້ຈັດຂຶ້ນໃນວັນທີ 23 ພະຈິກ 2023 ພາຍໃຕ້ຄໍາຂວັນ: “ທ່ອງທ່ຽວ ລາວປອດໄພ, ຊື່ນໃຈໃນວັດທະນະທຳ, ທຳມະຊາດ ເເລະ ປະຫວັດສາດ” ປະກອບມີ 79 ກິດຈະກໍາ. ໃນນີ້, ມີ 14 ກິດຈະກໍາ ລະດັບຊາດ ແລະ 65 ກິດຈະກໍາ ລະດັບທ້ອງຖິ່ນ ເຊິ່ງຖືວ່າເປັນເຫດການສຳຄັນຢ່າງຍິ່ງໃນໂຄສະນາ, ສົ່ງເສີມ ແລະ ພັດທະນາວຽກງານທ່ອງທ່ຽວ ໃຫ້ເຕີບໃຫຍ່ຂະຫຍາຍຕົວ ແລະ ສາມາດດຶງດູດນັກທ່ອງທ່ຽວໃຫ້ເຂົ້າມາທ່ອງທ່ຽວລາວເຮົາໃຫ້ຫລາຍຂຶ້ນຕື່ມ.
ການຈັດກອງປະຊຸມຄັ້ງນີ້, ເພື່ອຖອດຖອນບົດຮຽນ ແລະ ຕີລາຄາ ກ່ຽວກັບການຈັດຕັ້ງປະຕິບັດປີທ່ອງທ່ຽວລາວ 2024 ແລະ ບັນຫາອື່ນໆ ທີ່ປິ່ນອ້ອມ ເພື່ອໃຫ້ພວກເຮົາໄດ້ຮັບຮູ້ຂໍ້ມູນ-ຂ່າວສານຮ່ວມກັນ, ພ້ອມກັນຈັດຕັ້ງປະຕິບັດ ແລະ ດຳເນີນການແກ້ໄຂບັນດາສິ່ງທ້າທາຍຕ່າງໆ ທີ່ເກີດຂຶ້ນຢູ່ໃນຂະແໜງການທ່ອງທ່ຽວ ແລະ ຂະແໜງການອື່ນທີ່ກ່ຽວຂ້ອງ ເພື່ອເຮັດໃຫ້ວຽກງານທ່ອງທ່ຽວຂອງລາວເຮົາມີບາດກ້າວທີ່ດີ, ສ້າງຊື່ສຽງໃຫ້ແກ່ປະເທດຊາດ ລວມທັງການຈັດປີທ່ອງທ່ຽວລາວໃນຄັ້ງຕໍ່ໄປ.
ຂ່າວ: ສົມຫວັງ
ພາບ: ຂັນໄຊ
