ງານມະຫາກຳກິລານັກຮຽນມັດທະຍ ົມສຶກສາທົ່ວປະເທດ ຄັ້ງທີ VII ຫຼື “ສາລະວັນ ເກມ 2024” ທີ່ແຂວງສາລະວັນ ເປັນເຈົ້າພາບ ອັນລົງດ້ວຍຜົນສຳເລັດອັນຈົບງາມ ໂດຍທັບນັກກິລານະຄອນຫຼວງວຽງຈັນ ຍັງຄົງຄວາມເປັນເບີໜຶ່ງຂອງກິລານັກຮຽນລາວ ຍາດມາໄດ້ເຖິງ 26 ຫຼຽນຄຳ, 21 ຫຼຽນເງິນ ແລະ 29 ຫຼຽນທອງ ລວມ 76 ຫຼຽນ ເປັນອັນດັບ 1 ຂອງທົ່ວປະເທດ. ຂະນະທີ່ ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VIII ແມ່ນແຂວງເຊກອງ ຮັບກຽດເປັນເຈົ້າພາບ ໃນປີ 2027.
ພິທີປິດງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ໄດ້ມີຂຶ້ນໃນຕອນແລງວັນທີ 22 ທັນວາ 2024 ທີ່ສະໜາມກິລາໃໝ່ຂອງແຂວງສາລະວັນ, ໂດຍໃຫ້ກຽດເຂົ້າຮ່ວມຂອງ ທ່ານ ປອ ດາວວົງ ພອນແກ້ວ ເຈົ້າແຂວງສາລະວັນ ທັງເປັນປະທານຈັດງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII, ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ປະທານຮ່ວມຈັດງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII, ທັງເປັນປະທານຄະນະກຳມະການໂອແລມປິກແຫ່ງຊາດລາວ ແລະ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ພ້ອມດ້ວຍບັນດາການນໍາຈາກສູນກາງ ແລະ ທ້ອງຖິ່ນ, ຄະນະນັກກິລາ ລວມເຖິງມວນຊົນ ທັງພາຍໃນ ແລະ ຕ່າງປະເທດ ຢ່າງຫຼວງຫຼາຍ.
ກ່ອນພິທີທາງການເລີ່ມຂຶ້ນມວນຊົນທີ່ມາຮ່ວມງານ ໄດ້ຮັບຊົມການສະແດງຄອນເສີດ ແລະ ເມື່ອກ້າວສູ່ພິທີປິດຢ່າງເປັນທາງການ ກໍໄດ້ເລີ່ມຕົ້ນຂຶ້ນໂດຍມີຂະບວນສວນສະໜາມຂອງກ້ອນກຳລັງ ເດີນເຂົ້າສູ່ສະໜາມ ຊຶ່ງປະກອບມີ ກອງດຸລິຍາງ, ປ້າຍຄໍາຂວັນງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII, ໂລໂກ້ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII, ກ້ອນກໍາລັງທຸງຊາດ, ທຸງກິລາ, ທຸງງານ, ກໍາມະການຕັດສິນ, ຕາມມາດ້ວຍກ້ອນກຳລັງແຕ່ລະປະເພດກິລາ ມີ 12 ກ້ອນກຳລັງ ແລະ ອັດທ້າຍດ້ວຍກ້ອນກຳລັງປອດຄວັນຢາສູບ.
ໃນພິທີ, ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ, ຜູ້ຊີ້ນຳວຽກງານຂົງເຂດວັດທະນະທຳ-ສັງຄົມ ທັງເປັນຮອງປະທານຈັດງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ໄດ້ກ່າວສະຫຼຸບລາຍງານຜົນສໍາເລັດຂອງການແຂ່ງຂັນ ໃຫ້ຮູ້ວ່າ: ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ນີ້ ໄດ້ດຳເນີນການແຂ່ງຂັນກິລາ 12 ປະເພດ ຕິດພັນກັບນະໂຍບາຍການພັດທະນາຊັບພະຍາກອນມະນຸດຮອບດ້ານ ເປັນຕົ້ນແມ່ນການສົ່ງເສີມໃຫ້ນັກຮຽນໄດ້ຮັບການພັດທະນາທາງດ້ານຮ່າງກາຍ ແລະ ປັນຍາ ຕາມ 5 ຫຼັກມູນຂອງການສຶກສາ. ພ້ອມນີ້ກໍເປັນການບົ່ມສອນສ້າງໃຫ້ນັກກິລາ ທີ່ຢູ່ໃນໄວກຸ່ມເຍົາວະຊົນ, ຊາວໜຸ່ມ ໄດ້ມີສະຕິຕໍ່ການຈັດຕັ້ງ, ມີລະບຽບວິໄນ, ມີຄຸນສົມບັດ, ມີຄວາມສາມັກຄີມິດຕະພາບ ແລະ ແລກປ່ຽນປະສົບການດ້ານກິລາ ຊຶ່ງຈະເປັນເງື່ອນໄຂສົ່ງເສີມໃຫ້ເຂົາເຈົ້າສາມາດເກັບກຳເອົາບົດຮຽນ ປະສົບການ ທີ່ໄດ້ຮັບໃນຄັ້ງນີ້ ໄປພັດທະນາສົ່ງເສີມຕົນເອງໃຫ້ສູງຂຶ້ນ. ຊຶ່ງການແຂ່ງຂັນກິລາໃນຄັ້ງນີ້ ດໍາເນີນໄປ 10 ກວ່າວັນ ຄະນະຮັບຜິດຊອບຈັດງານແຂ່ງຂັນສາມາດສະຫຼຸບສັງລວມ ອັນດັບທີ 1-3 ດັ່ງນີ້: ອັນດັບທີ 1 ທັບນັກກິລານະຄອນຫຼວງວຽງຈັນ ຍັງສ້າງຜົນງານໄດ້ຢ່າງໂດດເດັ່ນສົມກັບເປັນເມືອງເອກຂອງ ສປປ ລາວ ດ້ວຍການຄອງເຈົ້າຫຼຽນຄຳ ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ທີ່ແຂວງສາລະວັນ ເປັນເຈົ້າພາບ ຫຼັງຍາດມາໄດ້ເຖິງ 26 ຫຼຽນຄຳ, 21 ຫຼຽນເງິນ ແລະ 29 ຫຼຽນທອງ ລວມ 76 ຫຼຽນ ເປັນອັນດັບ 1 ຂອງທົ່ວປະເທດ ແລະ ເປັນສະໄໝທີ 6; ອັນດັບທີ 2 ຕົກເປັນຂອງແຂວງຈຳປາສັກ ຍາດມາໄດ້ 20 ຫຼຽນຄຳ, 20 ຫຼຽນເງິນ ແລະ 20 ຫຼຽນທອງ ລວມ 60 ຫຼຽນ; ອັນດັບທີ 3 ແຂວງສາລະວັນ ເຈົ້າພາບ ຍາດໄດ້ 12 ຫຼຽນຄຳ, 20 ຫຼຽນເງິນ ແລະ 16 ຫຼຽນທອງ ລວມ 48 ຫຼຽນ.
ໃນໂອກາດທີ່ມີຄວາມໝາຍສຳຄັນນີ້, ທ່ານ ປອ ດາວວົງ ພອນແກ້ວ ໄດ້ກ່າວປິດງານຢ່າງເປັນທາງການວ່າ: ຂ້າພະເຈົ້າໃນນາມຕ່າງໜ້າໃຫ້ແກ່ອຳນາດການປົກຄອງແຂວງສາລະວັນ ແລະ ລັດຖະບານ ສະແດງຄວາມຍ້ອງຍໍຊົມເຊີຍຜົນງານ, ຜົນສຳເລັດ ຂອງຄະນະຮັບຜິດຊອບຈັດງານ, ຄະນະພັກ-ອົງການປົກຄອງແຂວງສາລະວັນ, ບັນດາທ່ານຄະນະນຳ, ນັກກິລາ, ຄຸຝືກ, ກຳມະການຕັດສິນ, ຜູ້ປະກອບການ, ຜູ້ອຸປະຖຳຕະຫຼອດຮອດ ຄູ-ອາຈານ, ນັກຮຽນ ແລະ ພີ່ນ້ອງປະຊາຊົນບັນດາເຜົ່າ ທີ່ໄດ້ໃຫ້ການປະກອບສ່ວນເຂົ້າຮ່ວມງານມະຫາກຳກິລານັກຮຽນມັດທະຍົມທົ່ວປະເທດ ຄັ້ງທີ VII ທີ່ແຂວງສາລະວັນ ເປັນເຈົ້າພາບ ເຮັດໃຫ້ງານໃນຄັ້ງນີ້ ມີຜົນສຳເລັດ ຕາມຈຸດປະສົງລະດັບຄາດໝາຍຢ່າງຈົບງາມ. ສະນັ້ນ, ມາຮອດນີ້ ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ໄດ້ສຳເລັດລົງຢ່າງເປັນທາງການ ແລ້ວພົບກັນໃໝ່ໃນງານແຂ່ງຂັນກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VIII ທີ່ແຂວງເຊກອງ ເປັນເຈົ້າພາບ ໃນປີ 2027. ນະໂອກາດນີ້ ຂ້າພະເຈົ້າ ຂໍປະກາດປິດງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ຢ່າງເປັນທາງການ ນັບແຕ່ເວລານີ້ ເປັນຕົ້ນໄປ.
ພາຍຫຼັງການກ່າວປິດງານ, ກໍໄດ້ມີພິທີເຊີນທຸງຊາດ ແລະ ທຸງກິລາ ລົງຈາກຍອດເສົາ ພ້ອມດຽວກັນມອດໄຟອ່າງທວນໄຟຄ່ອຍໆມອດລົງ ແລະ ໄດ້ມີການມອບ-ຮັບທຸງກິລານັກຮຽນມັດທະຍົມສຶກສາທົ່ວປະເທດ ໃຫ້ແຂວງເຊກອງ ເຈົ້າພາບ ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VIII ໂດຍ ທ່ານ ປອ ດາວວົງ ພອນແກ້ວ ເຈົ້າແຂວງສາລະວັນ ມອບໃຫ້ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ກ່ອນມອບຕໍ່ໃຫ້ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ຊຶ່ງໂອກາດນີ້ທ່ານເຈົ້າແຂວງເຊກອງ ໄດ້ກ່າວບາງເນື້ອໃນສຳຄັນວ່າ: ໃນອີກ 3 ປີຂ້າງໜ້າ ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VIII ກໍຖືກຮອບວຽນທີ່ແຂວງເຊກອງເປັນເຈົ້າພາບ ຊຶ່ງຖືເປັນຄັ້ງທີ 2 ໃນປະຫວັດສາດຂອງແຂວງເຊກອງ ໃນການເປັນເຈົ້າພາບຈັດງານແຂ່ງຂັນກິລາລະດັບຊາດ ຕໍ່ຈາກປີ 2011 ທີ່ໄດ້ຮັບກຽດເປັນເຈົ້າພາບຈັດງານແຂ່ງຂັນກິລາພື້ນເມືອງທົ່ວປະເທດ. ໂອກາດນີ້, ທ່ານເຈົ້າແຂວງເຊກອງ ກໍໄດ້ຕາງໜ້າຄະນະພັກ-ອົງການປົກຄອງແຂວງເຊກອງ ແລະ ພໍໍ່ແມ່ປະຊາຊົນຊາວແຂວງເຊກອງ ເຊີນຊວນບັນດາທ່ານການນໍາພັກ-ລັດ, ຄະນະນໍາ, ຄູຝຶກ ແລະ ກ້ອນກຳລັງນັກກິລາຈາກບັນດາແຂວງ, ຊາວລາວທຸກທົ່ວໜ້າ, ແຂກພາຍໃນ ແລະ ຕ່າງປະເທດ ເພື່ອກະກຽມ ແລະ ເຂົ້າຮ່ວມ “ເຊກອງ ເກມ 2024”.
ຈາກນັ້ນ, ຂະບວນສວນສະໜາມ ກໍເດີນອອກສະໜາມ ແລະ ພິທີກໍໄດ້ເລີ່ມການສະແດງຂອງເຈົ້າພາບງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ແລະ ຄັ້ງທີ VIII ທີ່ມີຊື່ວ່າ: “ສຽງແຄນແດນສາລະວັນ” ດ້ວຍບົດຟ້ອນ: “ໄວໜຸ່ມຍຸກສະໄໝ ໃສ່ໃຈສຸຂະພາບ”, “ເຊກອງ ຍິນດີຕ້ອນຮັບ” ແລະ “ມ່ວນຊື່ນສະຫຼອງໄຊ ກິລາສາລະວັນ” ຕາມດ້ວຍການຈູດບັ້ງໄຟດອກ, ເລີ່ມການສະແດງພິທີປິດ ແລະ ຈົບພິທີຢ່າງເປັນທາງການ.
ພາບ-ຂ່າວໂດຍ: ລູກນ້ຳເຊ ອິນທະດາລິນ
