ອົງການອາຫານໂລກ ໄດ້ສົ່ງເສີມ ແລະ ສ້າງກຸ່ມຊາວກະສິກອນຜະລິດກະສິກໍາໃນຄົວເຮືອນ ເພື່ອປະກອບສ່ວນເຂົ້າໂຄງການອາຫານທ່ຽງຂອງໂຮງຮຽນໃຫ້ມີຄວາມຍືນຍົງ, ໂດຍໄດ້ສ້າງກຸ່ມສວນຄົວປູກ ຜັກ, ກຸຸ່ມລ້ຽງປາ ແລະ ກຸ່ມລ້ຽງໄກ່ພັນໄຂ່ ເພື່ອນຳເອົາຜົນຜະລິດທີ່ໄດ້ປະກອບສ່ວນເຂົ້າໃນໂຄງການອາຫານທ່ຽງ 30% ຂອງຜົນຜະລິດທີ່ໄດ້.
ທ່ານ ຫອມ ແກ້ວປະເສີດ ອາຊີບຊາວກະສິກອນ ຢູ່ບ້ານນາຊຽງດີ ເມືອງຮຸນ ແຂວງອຸດົມໄຊ ໄດ້ຮັບທຶນການຊ່ວຍເຫຼືອຈາກອົງການອາຫານໂລກ ໄດ້ໃຫ້ສຳພາດຕໍ່ນັກຂ່າວໜັງສືພິມ ປະຊາຊົນ ເມື່ອບໍ່ດົນມານີ້ວ່າ: ໄລຍະຜ່ານມາຄອບຄົວຂອງຕົນໄດ້ຮັບທຶນການຊ່ວຍເຫຼືອຈາກໂຄງການພັດທະນາຊົນນະບົດ ໂດຍສົ່ງເສີມໃຫ້ປູກຜັກໃນເຮືອນຮົ່ມ ຊຶ່ງໄດ້ຮັບອຸປະກອນໃນການສ້າງເຮືອນຮົ່ມ ຕໍ່ມາກໍໄດ້ຮັບການຊ່ວຍເຫຼືອຈາກອົງການອາຫານໂລກ ໂດຍໄດ້ຮັບທຶນ 1,600,000 ກີບ ເພື່ອສ້າງເຮືອນຮົ່ມປູກພືດຜັກ ເມື່ອສ້າງຂຶ້ນໄດ້ໄລຍະ 3 ປີ ເຫັນວ່າການປູກພືດໃນເຮືອນຮົ່ມສ້າງຜົນດີຫຼາຍຢ່າງ ເປັນຕົ້ນແມ່ນສາມາດປູກພືດໄດ້ທຸກລະດູ. ຫຼັງຈາກທຳການຜະລິດໄດ້ແລ້ວກໍໄດ້ນຳມາຈຳໜ່າຍພາຍໃນບ້ານສ້າງລາຍໄດ້ປະມານ 3 ລ້ານກີບຕໍ່ເດືອນ; ໄລຍະຜ່ານມາຍັງບໍ່ສາມາດຜະລິດໄດ້ພຽງພໍກັບຄວາມຕ້ອງການຂອງຜູ້ບໍລິໂພກ. ດັ່ງນັ້ນ, ຈຶ່ງຢາກຂະຫຍາຍອອກຕື່ມອີກ ພໍດີມາໃນໄລຍະກາງປີນີ້ອົງການອາຫານໂລກໄດ້ມອບທຶນການສ້າງເຮືອນຮົ່ມໃຫ້ຕື່ມອີກ ໃນນັ້ນຕົນເອງໄດ້ຮັບອີກ 2 ຫຼັງ; ພາຍຫຼັງທີ່ໄດ້ຮັບທຶນການຊ່ວຍເຫຼືອຈາກໂຄງການແລ້ວ ເຫັນວ່າຄອບຄົວມີລາຍຮັບຈາກການຈຳໜ່າຍຜົນຜະລິດຂຶ້ນຕື່ມ ນອກຈາກການເຮັດໄຮ່ -ເຮັດສວນ.
ນາງ ແດງ ແກ້ວປະເສີດ ຊຶ່ງເປັນຄອບຄົວດຽວກັນກັບ ທ່ານ ຫອມ ແກ້ວປະເສີດ; ໄດ້ໃຫ້ຮູ້ຕື່ມວ່າ: ຕົນເອງແມ່ນໄດ້ຮັບທຶນຈາກໂຄງການຊ່ວຍເຫຼືອຂອງອົງການອາຫານໂລກໃນການສົ່ງເສີມແມ່ຍິງ, ການໄດ້ຮັບທຶນຈາກໂຄງການຊ່ວຍເຫຼືອດັ່ງກ່າວ ແມ່ນມີຄວາມດີໃຈຫຼາຍເພາະວ່າສາມາດສ້າງລາຍໄດ້ໃຫ້ແກ່ຄອບຄົວ ອີກຢ່າງໜຶ່ງຕົນກໍເປັນຄົນມັກດ້ານກະສິກຳຢູ່ແລ້ວ ໃນແຕ່ລະປີກໍໄດ້ປູກຜັກເພື່ອບໍລິໂພກໃນຄອບຄົວແຕ່ບໍ່ໄດ້ເປັນສິນຄ້າ. ໃນເບື້ອງຕົ້ນໂຄງການໄດ້ສ້າງເຮືອນຮົ່ມ ແລະ ສະໜອງອຸປະກອນການເຮັດສວນໃຫ້ ພາຍຫຼັງທີ່ໄດ້ຮັບທຶນແລ້ວແມ່ນສາມາດປູກພືດຜັກໄດ້ທຸກລະດູ ຮັບປະກັນຜົນຜະລິດ ປູກໄດ້ຫຼາຍກາຍສິນຄ້າ ແລະ ມີລາຍໄດ້ເຂົ້າສູ່ຄອບຄົວເຮັດໃຫ້ເສດຖະກິດຄອບຄົວດີຂຶ້ນເລື້ອຍໆ. ພາຍໃນສວນແມ່ນປູກພືດໝູນວຽນເຊັ່ນ: ປູກໝາກເຂືອ, ໝາກເຜັດ, ໝາກຖົ່ວ, ຫົວກະຫຼໍ່າປີ, ຜັກກາດ, ຜັກສະຫຼັດ, ແລະຜັກຫອມຕ່າງໆ ຫຼັງຜະລິດໄດ້ແລ້ວກໍນຳໄປຈຳໜ່າຍພາຍໃນບ້ານ ສ້າງລາຍຮັບປີໜຶ່ງ ໄດ້ຫຼາຍລ້ານກີບ.
ນອກຈາກນີ້, ກໍໄດ້ປະກອບສ່ວນເຂົ້າໃນໂຄງການອາຫານທ່ຽງໃນໂຮງຮຽນ 30% ຂອງຜົນຜະລິດທີ່ໄດ້ພາຍໃນສວນ ສະເລ່ຍປີໜຶ່ງໄດ້ປະມານ 30 ຫາ 40 ກິໂລ ການປະກອບສ່ວນເຂົ້າໃນໂຄງການອາຫານທ່ຽງ ແມ່ນເປັນຄວາມພາກພູມໃຈອີກອັນໜຶ່ງເພາະລູກຫຼານໄດ້ກິນອື່ມ, ກິນອາຫານທີ່ມີປະໂຫຍດຕໍ່ຮ່າງກາຍ ແລະ ຍັງເປັນການສ້າງໃຫ້ໂຄງການອາຫານທ່ຽງໃນໂຮງຮຽນມີຄວາມຍືນຍົງອີກດ້ວຍ.
