ວັນທີ 20 ທັນວາ 2024 ຜ່ານມາ, ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມຄະນະ ໄດ້ເດີນທາງເຂົ້າຮ່ວມພິທີສະເຫລີມສະ ຫລອງ 80 ປີແຫ່ງວັນສ້າງຕັ້ງ ກອງທັບປະຊາຊົນຫວຽດນາມ (22-12-1944 / 22-12-2024) ແລະ 35 ປີແຫ່ງວັນປ້ອງກັນຊາດທົ່ວປວງຊົນ (22/12/1989- 22/12/2024) ຢູ່ນະຄອນຫລວງຮ່າໂນ້ຍ ສສ ຫວຽດນາມ ໂດຍການເປັນກຽດເຂົ້າຮ່ວມຂອງ ສະຫາຍ ໂຕເລີມ ເລຂາທິການໃຫ່ຍສູນກາງພັກກອມມູນິດຫວຽດນາມ, ສະຫາຍ ເລືອງ ເກືອງ ປະທານປະເທດ ແຫ່ງ ສສ ຫວຽດນາມ, ມີສະຫາຍ ຟ້າມ ມິງ ຈິງ ນາຍົກລັດຖະມົນຕີແຫ່ງ ສສ ຫວຽດນາມ, ສະຫາຍ ພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມ, ມີບັນດາອະດີດການນຳພັກ-ລັດຂັ້ນສູງ, ອະດີດການນຳກະຊວງປ້ອງກັນປະເທດແຫ່ງ ສສ ຫວຽດນາມ, ມີບັນດາຜູ້ແທນສາກົນ, ບັນດາລັດຖະມົນຕີກະຊວງປ້ອງກັນປະເທດຕ່າງໆ, ຜູ້ຕາງໜ້າອົງການຈັດຕັ້ງສາກົນຢູ່ຫວຽດນາມ, ຕະຫລອດຮອດນາຍ ແລະ ພົນທະຫານກອງທັບປະຊາຊົນຫວຽດນາມ ເຂົ້າຮ່ວມ.
ໃນພິທີ, ສະຫາຍ ໂຕເລີມ ໄດ້ກ່າວຄຳປາໄສລະນຶກເຖິງມູນເຊື້ອຕະຫລອດໄລຍະ 80 ປີ ແຫ່ງການກໍາເນີດເຕີບໃຫຍ່ຂະຫຍາຍຕົວສູ້ຮົບມີໄຊ ຂອງກອງທັບປະຊາຊົນຫວຽດນາມ ໄດ້ຕິດພັນຢ່າງເລິກເຊິ່ງກັບການເຮັດສໍາເລັດໜ້າທີ່ອັນມີກຽດສະຫງ່າຂອງກອງທັບປະຊາຊົນຫວຽດນາມ ໃນພາລະກິດຕໍ່ສູ້ປົດປ່ອຍຊາດຕ້ານກັບພວກລ່າເມືອງຂຶ້ນທັງແບບເກົ່າ ແລະ ແບບໃໝ່ໃຫ້ປະລາໄຊຢ່າງເຈັບແສບ ສາມາດປົດປ່ອຍປະເທດຊາດຫວຽດນາມ ໄດ້ຢ່າງສົມບູນ ພາຍໃຕ້ການນໍາພາເດັດຂາດ ໂດຍກົງ ຮອບດ້ານ ສະຫລາດສ່ອງໃສຂອງພັກກອມມູນນິດຫວຽດນາມ ແລະ ປະທານ ໂຮ່ຈີ່ມິງ ຜູ້ນໍາທີ່ແສນເຄົາລົບຮັກຂອງປະຊາຊົນຫວຽດນາມ ໄດ້ເຮັດໃຫ້ກອງທັບປະຊາຊົນຫວຽດນາມຍາດໄດ້ໄຊຊະນະອັນໃຫຍ່ຫລວງມາໃຫ້ປະເທດຊາດ ກໍຄື ປະຊາຊົນຫວຽດນາມຢ່າງສະຫງ່າລາສີ, ກອງທັບປະຊາຊົນຫວຽດນາມ ໄດ້ພັດທະນາຢ່າງວ່ອງໄວ, ໄດ້ເຮັດຄວາມສໍາເລັດຜົນຢ່າງຕໍ່ເນື່ອງ, ຈາກກອງທັບອາວຸໂສໃນຕອນຕົ້ນ ທີ່ມີທະຫານ 34 ຄົນ, ໄດ້ພັດທະນາເປັນ 6 ກຸ່ມທະຫານ, ມີກອງທັບປືນ ແລະ ກອງທະຫານສໍາຄັນຈໍານວນໜຶ່ງ, ມີທະຫານຫລາຍສິບພັນຄົນ, ໄດ້ຮັບໄຊຊະນະຢ່າງຕໍ່ເນື່ອງໃນການສູ້ຮົບອັນໃຫຍ່ຫລວງຈົນເຖິງທີ່ສຸດ ໄດ້ຮັບໄຊຊະນະ ເໜືອດຽນບຽນຝູ ໄດ້ບັງຄັບໃຫ້ຈັກລ່າເມືອງຂຶ້ນຍອມຈຳນົນ. ກອງທັບທີ່ຫາກໍມີອາຍຸໄດ້ 10 ປີ ໄດ້ເອົາຊະນະກອງທັບທີ່ມີປະສົບການມືອາຊີບທີ່ຖືກຈັດຕັ້ງຂຶ້ນໃນສັດຕະວັດທີ 15, ນັ້ນຢືນຢັນເຖິງຄວາມສູງສົ່ງທາງສະຕິປັນຍາຂອງກອງທັບປະຊາຊົນຫວຽດນາມ ແລະ ເປັນການພັດທະນາທີ່ໂດດເດັ່ນ ແລະ ກ້າວກະໂດດຂອງກອງທັບປະຊາຊົນຫວຽດນາມ.
ການຈັດພິທີສະເຫລີມສະຫລອງວັນມູນເຊື້ອກອງທັບປະຊາຊົນຫວຽດນາມ ຄົບຮອບ 80 ປີ ຄັ້ງນີ້, ສຸດທີ່ມີຄວາມໝາຍຄວາມສໍາຄັນເປັນຢ່າງຍິ່ງ ຕໍ່ກອງທັບປະຊາຊົນຫວຽດນາມ, ເປັນການເອກອ້າງທະນົງໃຈຕໍ່ຜົນງານອັນໃຫຍ່ຫລວງ, ນໍ້າໃຈເສຍສະຫລະອັນສູງສົ່ງ ແລະ ການຕໍ່ສູ້ອັນພິລະອາດຫານບໍ່ຍອມຈໍານົນ ຂອງພະນັກງານ-ນັກຮົບ ເຫລົ່າຮົບຂອງກອງທັບປະຊາຊົນຫວຽດນາມ ເພື່ອຄວາມຢູ່ເຢັນເປັນສຸກຂອງປະຊາຊົນ ແລະ ຄວາມຈະເລີນຮຸ່ງເຮືອງຂອງປະເທດຊາດຫວຽດນາມ.
ໃນຕອນທ້າຍພິທີ, ສະຫາຍ ໂຕເລີມ ໄດ້ຕາງໜ້າໃຫ້ພັກ-ລັດຖະບານ ແຫ່ງ ສສ ຫວຽດນາມ ປະດັບຫລຽນໄຊໂຮ່ຈີ່ມິງ ໃຫ້ແກ່ກອງທັບປະຊາຊົນຫວຽດນາມ ຕື່ມອີກ.
ຂ່າວ-ພາບ: ທອງມາ
