ພິທີວາງສີລາລືກໂຄງການພັດທະນາອຸດສະຫະກຳທ່ອງທ່ຽວທຳມະຊາດ ແລະ ສະໜາມກ໊ອຟຂອງ ບໍລິສັດ ວັງວິວລີ້ຮິວ ຈຳກັດ ຕັ້ງຢູ່ໃນເຂດອ່າງນໍ້າແຖມ ບ້ານປາກເປາະ ແລະ ບ້ານພູດິນແດງ ເມືອງວັັງວຽງ ແຂວງວຽງຈັນ ເຊິ່ງໂຄງການນີ້ຈະເປັນແຫຼ່ງທ່ອງທ່ຽວແຫ່ງໃໝ່ໃນພາກພື້ນມີເນື້ອທີ່ທັງໝົດ 522 ເຮັກຕາ ຄາດວ່າມູນຄ່າການລົງທຶນຫຼາຍກວ່າ 700 ລ້ານໂດລາສະຫະລັດ ຈັດຂຶ້ນວັນທີ 18 ທັນວາ 2024 ທີ່ເມືອງວັງວຽງ ແຂວງວຽງຈັນ ໃຫ້ກຽດເຂົ້າຮ່ວມໂດຍ ທ່ານ ຄຳພັນ ສິດທິດຳພາ ເຈົ້າແຂວງແຂວງວຽງຈັນ ຄະນະນຳສະພາປະຊາຊົນແຂວງ ບັນດາຮອງເຈົ້າແຂວງ ເຈົ້າເມືອງ ອົງການຈັດຕັ້ງພັກ-ລັດທຸກພາກສ່ວນທັງສູນກາງ ແລະ ທ້ອງຖິ່ນຕະຫຼອດຮອດບັນດາຫົວໜ່ວຍທຸລະກິດທ່ອງທ່ຽວເມືອງວັງວຽງ.
ໂອກາດນີ້ທ່ານ ຄຳພັນ ສິດທິດຳພາ ເຈົ້າແຂວງວຽງຈັນໄດ້ມີຄໍາເຫັນວ່າ: ການທ່ອງ ທ່ຽວແມ່ນວຽກງານໜຶ່ງທີ່ພັກ-ລັດຖະບານໄດ້ໃຫ້ຄວາມສໍາຄັນ ເຊິ່ງເປັນຂະແໜງການທີ່ນອນຢູ່ໃນໂຄງປະກອບເສດຖະກິດ-ສັງຄົມເເຫ່ງຊາດ ເວົ້າລວມ ເວົ້າສະເພາະກໍ່ຄືແຜນພັດທະນາເສດຖະກິດ-ສັງຄົມຂອງແຂວງ ແລະ ຂອງເມືອງ ກາຍເປັນຂະ ແໜງເສດຖະກິດທ່າແຮງ ປາຍແຫຼມໜຶ່ງຕໍ່ການພັດທະນາທີ່ມີຄວາມສຳຄັນ ເຊິ່ງເປົ້າໝາຍລວມຂອງການພັດທະນາການທ່ອງທ່ຽວກໍ່ແມ່ນການເດີນທາງໄປຢ້ຽມ ຢາມ ການໄປມາທ່ຽວຊົມ ການໄປພັກຜ່ອນສຸຂະພາບຮ່າງກາຍ ແລະ ຈິດໃຈ ເວົ້າສະເພາະໂຄງການພັດທະນາອຸດສາຫະກຳ ແລະ ທ່ອງທ່ຽວສະໜາມກ໊ອຟແຫ່ງນີ້ເມື່ອສ້າງສຳເລັດຈະປະກອບສ່ວນສ້າງວຽກເຮັດງານທໍາ ແລະ ການຂະ ຫຍາຍຕົວເສດຖະ ກິດ-ສັງຄົມຂອງປະເທດຊາດຂອງທ້ອງຖິ່ນ ຍ້ອນເຫັນໄດ້ຄວາມສໍາຄັນດັ່ງກ່າວພັກ-ລັດ ຈຶ່ງໄດ້ມີນະໂຍບາຍຟື້ນຟູ ແລະ ສົ່ງເສີມການທ່ອງທ່ຽວ ຊຸກຍູ້ນັກທຸລະກິດທັງພາຍໃນ ແລະ ຕ່າງປະເທດມາລົງທຶນພັດທະນາການທ່ອງທ່ຽວ ແລະ ສ້າງໃຫ້ເກີດຫຼາຍກິດຈະການຮັບໃຊ້ກິດຈະການທ່ອງທ່ຽວດັ່ງບໍລິສັດ ວັງວິວລີຮິ້ວ ຈຳກັດ ທີ່ໄດ້ສຸມທຶນຮອນພັດທະນາເຂດໂຄງການນີ້ເພື່ອດູດດຶງແຂກພາຍໃນ ຕ່າງປະເທດໄດ້ມາສຳ ຜັດກັບມົນສະເໜ່ໃນໄມຕີຈິດມິດຕະພາບອັນດູດດື່ມ ມາພັກຜ່ອນຢ່ອນກາຍໃນໂຮງແຮມ ແລະ ຫຼິ້ນກິລາກ໊ອຟທີ່ໄດ້ມາດຕະຖານ ມາຊີມລົດຊາດອາຫານພື້ນບ້ານທີ່ເປັນເອກະລັກ ທ່ອງທ່ຽວພູຜາປ່າໄມ້ຊີວະນາໆພັນທີ່ຂຽວສົດງົດງາມ.
ທ່ານ ປອ ຈັນທອນ ສິດທິໄຊ ປະທານ ແລະ ຜູ້ກໍ່ຕັ້ງບໍລິສັດ ວັງວິວລີ້ຮິວ ຈຳກັດ ໄດ້ຂຶ້ນກ່າວ ແລະ ມີຄຳເຫັນກ່ຽວກັບເນື້ອໃນ-ຈິດໃຈ ແລະ ເຈດຕະນາໃນການພັດທະນາໂຄງການອຸດສະຫະກຳທ່ອງທ່ຽວທຳມະຊາດ ແລະ ສະໜາມກ໊ອຟແຫ່ງນີ້ວ່າ: ເນື້ອ ແທ້ກໍ່ແມ່ນມີຈຸດປະສົງຈະຍົກລະດັບໃຫ້ເປັນສູນກາງການແລກປ່ຽນນັກທ່ອງທ່ຽວພູມມິພາກຂອງອາຊຽນ ແລະ ອາຊີປາຊິຟິກ ໂດຍຈະປະກອບມີກິດຈະການຕ່າງໆທີ່ຈະສາມາດດຶງດູດໃຈນັກທ່ອງທ່ຽວຈາກທົ່ວທຸກມຸມໂລກເປັນຕົ້ນສະໜາມກ໊ອຟ ໂຮງ ແຮມ 5 ດາວ ຣີສອດ ເຂດທ່ອງທ່ຽວວັດທະນະທຳ ແລະ ທຳມະຊາດສີຂຽວ ເຂດອຸດສາຫະກໍາ ແລະ ຫັດຖະກໍາຂະໜາດນ້ອຍ ຫໍວັດທະນະທຳ ສູນຝຶກອົບຮົມ ແລະ ສະ ໜາມກິລາຄົບວົງຈອນ ສະໜາມແຂ່ງລົດ ສະໜາມແຂ່ງມ້າ ສູນລວມບັນເທີງຄົບວົງຈອນ ເຂດການຄ້າ ສະຖາບັນການສຶກສາ ສະຖາບັນການເງິນ ໂຮງໝໍ ສູນຝຶກອົບຮົມພັດທະນາຝີມືວິຊາອາຊີບຄົບວົງຈອນ ແລະ ບັນດາກິດຈະການ ແລະ ການບໍລິ ການອື່ນໆທີ່ມີລະບົບພື້ນຖານໂຄງລ່າງສິ່ງອຳນວຍຄວາມສະດວກຄົບວົງຈອນຂະ ໜາດໃຫຍ່ທີ່ໄດ້ມາດ ຕະຖານ ແລະ ທັນສະໄໝທຽບເທົ່າສາກົນ ເພື່ອໃຫ້ຕອບສະ ໜອງໄດ້ຕາມຄວາມຮຽກຮ້ອງຕ້ອງການຂອງສັງຄົມໂດຍມີເປົ້າໝາຍໃນການດຶງດູດນັກທ່ອງທ່ຽວເຂົ້າມາເຕົ້າໂຮມຊົມໃຊ້ຢ້ຽມຢາມໂຄງການຢ່າງໜ້ອຍໃຫ້ໄດ້ 3 ລ້ານຄົນຕໍ່ປີ ໃຫ້ຫຼັ່ງໄຫຼເຂົ້າມາ ສປປ ລາວ ເພື່ອກະຕຸກຊຸກຍູ້ເສດຖະກິດຂອງປະເທດໃຫ້ນັບມື້ນັບເຂັ້ມແຂງ ແລະ ຂະຫຍາຍຕົວຢ່າງໝັ້ນຄົງຍືນຍົງ ເພື່ອໃຫ້ບັນລຸໄດ້ຕາມນະໂຍ ບາຍ ວັດຈຸດປະສົງ ແລະ ເປົ້າໝາຍຕາມຄຳຂວັນຂອງໂຄງການ“ເສັ້ນທາງໃໝ່ແຫ່ງການທ່ອງທ່ຽວທໍາມະຊາດແບບຍືນຍົງຄົງໄວ້ວັດ ທະນະທຳປ່ຽມລໍ້ານໍາສະໄໝຊູໄດ້ການພັດທະນານໍາພາເສດຖະກິດ-ສັງຄົມວັງວິວລີ້ຮິວ.”
ໃນເວລາດຽວກັນນີ້ບໍລິສັດ ວັງວິວລີ້ຮິວ ຈໍາກັດ ໄດ້ຈັດພິທີເຊັນຄູ່ຮ່ວມຍຸດທະສາດໃນການພັດທະນາໂຄງການ ກັບບັນດາບໍລິສັດທີ່ມີຄວາມຊ່ຽວຊານໃນແຕ່ລະດ້ານ: ບໍລິ ສັດ GENSLER ບໍລິສັດ KUNMING ARCHITECTURAL DESIGN & RESEARCH INSTITUTE CO., LTD ບໍລິສັດ INTHIRA GROUP ບໍລິສັດ Kunming YUMANTIANXIA HOTEL MANAGEMENT CO., LTD ແລະ ໄດ້ຮ່ວມມືກັບໂຮງຮຽນສາມັນກິນນອນຊົນເຜົ່າເມືອງວັງວຽງ ແຂວງວຽງຈັນ ເພື່ອພັດທະນາເປັນສູນເຝິກອົບ ຮົມວິຊາຊີບ ພ້ອມດຽວກັນນັ້ນບໍລິສັດຍັງໄດ້ມອບເງິນຊຸກຍູ້ໃຫ້ໂຮງຮຽນ 100.000.000 ກີບ.
