ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ອັດລົງດ້ວຍຜົນສຳເລັດອັນຈົບງາມ ໃນວັນທີ 12 ທັນວາ 2024, ພາຍຫລັງດຳເນີນມາແຕ່ວັນທີ 18 ພະຈິກ ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ມີການເຂົ້າຮ່ວມຂອງທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ມີບັນດາການນຳຂັ້ນສູງພັກ, ລັດ, ຄະນະລັດຖະບານ, ສະມາຊິກສະພາແຫ່ງຊາດ ພ້ອມດ້ວຍອະດີດການນຳຂັ້ນສູງ ເຂົ້າຮ່ວມ.
ໂອກາດດັ່ງກ່າວ, ທ່ານ ໄຊສົມພອນ ພົມວິຫານ ໄດ້ຍົກໃຫ້ເຫັນຜົນສຳເລັດ ຂອງການດໍາເນີນກອງປະຊຸມສະໄໝສາມັນ ໃນຄັ້ງນີ້, ເຊິ່ງຕະຫລອດໄລຍະຂອງການດໍາເນີນກອງປະຊຸມ ບັນດາສະມາຊິກສະພາແຫ່ງຊາດ ປະຈຳເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳຄິດຄຳເຫັນຢ່າງກົງໄປກົງມາ ໃສ່ເນື້ອໃນຂອງບົດລາຍງານຕ່າງໆ ຂອງລັດຖະບານ ທີ່ນຳມາສະເໜີ ແລະ ພິຈາລະນາ, ຜ່ານການດຳເນີນກອງປະຊຸມ ໄດ້ພິຈາລະນາຮັບຮອງເອົາບົດລາຍງານລັດຖະບານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ປະຈຳປີ 2024 ແລະ ແຜນການປີ 2025 ຕິດພັນກັບວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດ-ການເງິນ; ແຜນການລົງທຶນຂອງລັດ ປະຈຳປີ 2025, ແຜນຈັດສັນງົບປະມານ ໃຫ້ກະຊວງ, ອົງການ, ທ້ອງຖິ່ນ ປະຈຳປີ 2025 ແລະ ການດັດແກ້ແຜນງົບປະມານແຫ່ງລັດ ປະຈໍາປີ 2024. ພ້ອມນີ້, ກອງປະຊຸມ ຍັງໄດ້ສະເໜີໃຫ້ລັດຖະບານ ເອົາໃຈໃສ່ຊີ້ນໍາການເກັບລາຍຮັບ ໃຫ້ໄດ້ຢ່າງຄົບຖ້ວນ ຕາມກົດໝາຍກຳນົດ ໂດຍສະເພາະ ລາຍຮັບຈາກຊັບພະຍາກອນທຳມະຊາດ, ແກ້ໄຂບັນຫາການຍົກເວັ້ນການປະຕິບັດກົດໝາຍ ທີ່ສົ່ງຜົນກະທົບຕໍ່ການເກັບລາຍຮັບເຂົ້າງົບປະມານ; ຄົ້ນຄວ້າແກ້ໄຂໜີ້ສິນສາທາລະນະ, ໜີ້ສິນໂຄງການລົງທຶນຂອງລັດ ໃຫ້ມີການຫັນປ່ຽນທີ່ດີຂຶ້ນ; ສືບຕໍ່ຄວບຄຸມ ແລະ ແກ້ໄຂບັນຫາເງິນເຟີ້, ອັດຕາແລກປ່ຽນ, ການເໜັງຕີຂອງລາຄາສິນຄ້າ ດ້ວຍການນໍາໃຊ້ມາດຕະການທາງກົດໝາຍ ແລະ ມາດຕະການທາງເສດຖະກິດ ຢ່າງເຂັ້ມງວດ ແລະ ເດັດຂາດ. ພ້ອມນັ້ນ, ຍັງໄດ້ສະເໜີໃຫ້ລັດຖະບານ ເພີ່ມການລົງທຶນຂອງລັດ ເຂົ້າໃສ່ການພັດທະນາຂົງເຂດວັດທະນະທຳ-ສັງຄົມ ເພື່ອຍົກສູງຄຸນນະພາບໃນການເຄື່ອນໄຫວໃນຂົງເຂດດັ່ງກ່າວ ດ້ວຍການສົ່ງເສີມການພັດທະນາສີມືແຮງງານ ໃຫ້ມີຄຸນນະພາບ; ປັບປຸງການບໍລິການປິ່ນປົວ ແລະ ກອງທຶນປະກັນສຸຂະພາບ ໃຫ້ສາມາດດຶງດູດສະມາຊິກປະກັນສຸຂະພາບ ໃຫ້ເພີ່ມຂຶ້ນ; ເອົາໃຈໃສ່ປັບປຸງໂຄງລ່າງພື້ນຖານຂົງເຂດວຽກງານທ່ອງທ່ຽວ, ເພີ່ມທະວີການຄຸ້ມຄອງວຽກງານທ່ອງທ່ຽວ ເປັນຕົ້ນ ຄວາມປອດໄພໃນການທ່ອງທ່ຽວ ເພື່ອດຶງດູດ ແລະ ສ້າງຄວາມໝັ້ນໃຈ ແກ່ນັກທ່ອງທ່ຽວ ເພື່ອໃຫ້ນັກທ່ອງທ່ຽວເຂົ້າມາທ່ຽວລາວໃຫ້ນັບມື້ນັບຫລາຍ ແນໃສ່ປະກອບສ່ວນສ້າງລາຍຮັບ ແກ່ຜູ້ປະກອບການ ແລະ ສ້າງວຽກເຮັດງານທຳ ແກ່ສັງຄົມນັບມື້ນັບເພີ່ມຂຶ້ນ.
ໃນກອງປະຊຸມ ຍັງໄດ້ສະແດງຄວາມຊົມເຊີຍຕໍ່ລັດຖະບານ ໃນການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍ ການແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດ-ການເງິນ ເຊິ່ງໄດ້ຮັບຜົນສໍາເລັດຫລາຍດ້ານ, ພ້ອມທັງສະເໜີໃຫ້ລັດຖະບານ ເພີ່ມທະວີການແກ້ໄຂຢ່າງເດັດຂາດ ຕໍ່ການລັກລອບນໍາເຂົ້າສິນຄ້າ ທີ່ບໍ່ຖືກຕ້ອງຕາມກົດໝາຍ; ຄົ້ນຄວ້າປະເພດສິນຄ້າທີ່ເປັນທ່າແຮງ ເພື່ອສຸມທຶນຮອນ, ເຕັກນິກວິຊາການ, ແນວພັນ ເຮັດໃຫ້ຜົນຜະລິດກະສິກຳສະອາດ ນັບມື້ນັບມີປະສິດທິຜົນສູງ; ເອົາໃຈໃສ່ຄຸ້ມຄອງການອະນຸຍາດໃຫ້ໂຄງການລົງທຶນດ້ານບໍ່ແຮ່, ການຂຸດຄົ້ນແຮ່ທາດ ໃຫ້ຖືກຕ້ອງຕາມກົດໝາຍຢ່າງເຂັ້ມງວດ, ໃຫ້ແກ້ໄຂຢ່າງຂາດຕົວ ບັນດາໂຄງການທີ່ບໍ່ມີຄຸນນະພາບ ແລະ ບໍ່ເປັນມືອາຊີບ, ສູ່ຊົນການເກັບລາຍຮັບ ຈາກການດໍາເນີນທຸລະກິດແຮ່ທາດ ເຊິ່ງເປັນລາຍຮັບທີ່ມີມູນຄ່າສູງ ໃຫ້ໄດ້ຢ່າງຄົບຖ້ວນ, ຖືກຕາມຕົວຈິງ ແລະ ຕາມກົດໝາຍກຳນົດ ພ້ອມທັງເກັບກູ້ໜີ້ຕ້ອງຮັບຂອງລັດ ໃຫ້ໄດ້ຢ່າງຄົບຖ້ວນ.
ພ້ອມນີ້, ກອງປະຊຸມໄດ້ຄົ້ນຄວ້າ ແລະ ຮັບຮອງເອົາການຈັດຕັ້ງປະຕິບັດວຽກງານສາມສ້າງ ພ້ອມທັງສະເໜີໃຫ້ລັດຖະບານ ເອົາໃຈໃສ່ຄົ້ນຄວ້າສ້າງ, ປັບປຸງນິຕິກຳ, ແຜນການເຄື່ອນໄຫວວຽກງານ 3 ສ້າງ ໃຫ້ເປັນລະບົບຄົບຊຸດ ລວມທັງການຈັດຕັ້ງ ໂຄສະນາເຜີຍແຜ່ ໃຫ້ພະນັກງານ, ທະຫານ, ຕຳຫລວດ ກໍຄື ປະຊາຊົນບັນດາເຜົ່າໄດ້ຮັບຮູ້, ເຂົ້າໃຈ ແລະ ເຂົ້າຮ່ວມການຈັດຕັ້ງປະຕິບັດ; ຄົ້ນຄວ້າ ແລະ ປັບປຸງການແບ່ງຂັ້ນຄຸ້ມຄອງວຽກງານ 3 ສ້າງ ລະຫວ່າງສູນກາງ ແລະ ທ້ອງຖິ່ນ, ລະຫວ່າງຂະແໜງການ ດ້ານວຽກງານໂຄງການ, ດ້ານງົບປະມານ, ດ້ານບຸກຄະລາກອນ ແລະ ເຕັກນິກວິຊາການ ໃຫ້ສອດຄ່ອງ ເພື່ອພ້ອມກັນຈັດຕັ້ງປະຕິບັດໃຫ້ໄດ້ຮັບຜົນສໍາເລັດ ຕາມແຜນການທີ່ວາງໄວ້. ກອງປະຊຸມ ຍັງໄດ້ພິຈາລະນາ ແລະ ຮັບຮອງເອົາການຈັດຕັ້ງປະຕິບັດ ຍຸດທະສາດການປະຕິຮູບລະບົບການສຶກສາ, ການພັດທະນາຊັບພະຍາກອນມະນຸດແຫ່ງຊາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ອີກບັນຫາໜຶ່ງທີ່ສຳຄັນ ກອງປະຊຸມ ຍັງໄດ້ສະເໜີໃຫ້ລັດຖະບານ ເອົາໃຈໃສ່ແກ້ໄຂບັນຫາການຂາດແຄນຄູ ແລະ ບັນຫາການປະລະການຮຽນ ໂດຍສະເໜີໃຫ້ທຸກພາກສ່ວນໃນສັງຄົມ ກໍຄື ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ພ້ອມກັນໂຄສະນາ, ປຸກລະດົມ ພໍ່ແມ່ຜູ້ປົກຄອງ, ນັກຮຽນ, ນັກສຶກສາ ໃຫ້ເຫັນໄດ້ຄວາມສໍາຄັນຂອງວຽກງານການສຶກສາ. ພ້ອມກັນນັ້ນ, ກໍສະເໜີໃຫ້ຄົ້ນຄວ້າ ການສະໜອງງົບປະມານ ເຂົ້າໃນຂົງເຂດການສຶກສາ ໃຫ້ມີຄວາມສອດຄ່ອງກັບວຽກງານຕົວຈິງຕື່ມ.
ນອກຈາກນີ້, ໃນກອງປະຊຸມ ຍັງໄດ້ພິຈາລະນາ ແລະ ຮັບຮອງເອົາການປະເມີນຜົນການຈັດຕັ້ງປະຕິບັດ ກົດໝາຍ ຂົງເຂດ ວັດທະນະທຳ-ສັງຄົມ 4 ສະບັບ ຄື: ກົດໝາຍວ່າດ້ວຍການສຶກສາ, ກົດໝາຍ ວ່າດ້ວຍການຄວບຄຸມເຄື່ອງດື່ມທີ່ມີທາດເຫລົ້າ, ກົດໝາຍ ວ່າດ້ວຍແຮງງານ ແລະ ກົດໝາຍ ວ່າດ້ວຍປ້າຍ. ຜ່ານການປະເມີນຜົນການຈັດຕັ້ງປະຕິບັດກົດໝາຍດັ່ງກ່າວ ສາມາດຊອກເຫັນໄດ້ດ້ານຕັ້ງໜ້າ ແລະ ບັນຫາຄົງຄ້າງ ໃນການຈັດຕັ້ງປະຕິບັດກົດໝາຍ ໃນໄລຍະຜ່ານມາ ໂດຍມອບໃຫ້ລັດຖະບານ ຊີ້ນໍາທັງ 4 ກະຊວງ ທີ່ກ່ຽວຂ້ອງ ຄົ້ນຄວ້າ ແລະ ກ້າວໄປເຖິງການປັບປຸງກົດໝາຍ ທີ່ຢູ່ໃນຂອບເຂດຄວາມຮັບຜິດຊອບ ຂອງແຕ່ລະພາກສ່ວນ ເພື່ອກຳນົດມາດຕະການແກ້ໄຂບັນຫາທີ່ຄົງຄ້າງ ໃນໄລຍະຜ່ານມາ ລວມທັງປັບປຸງ ແລະ ຍົກສູງຄຸນນະພາບໃນການເຄື່ອນໄຫວວຽກງານຂອງຕົນ ໃຫ້ມີປະສິດທິຜົນ ແລະ ເຂັ້ມງວດຕາມກົດໝາຍຍິ່ງໆຂຶ້ນ.
ກອງປະຊຸມ ໄດ້ພິຈາລະນາ ແລະ ຮັບຮອງເອົາວິໄສທັດ ຮອດປີ 2040 ແລະ ແຜນຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030 ພ້ອມທັງສະເໜີໃຫ້ເອົາໃຈໃສ່ ການຈັດແບ່ງເຂດການຜະລິດໃຫ້ຈະແຈ້ງ, ເພີ່ມທະວີການຄຸ້ມຄອງ ແລະ ນໍາໃຊ້ທີ່ດິນກະສິກຳ ໃຫ້ຖືກຕ້ອງ ແລະ ສອດຄ່ອງກັບກົດໝາຍ, ກຳນົດມາດຕະການຢ່າງເຂັ້ມງວດ ຕໍ່ການແກ້ໄຂບັນຫາການຫັນປ່ຽນທີ່ດິນກະສິກຳ ເປັນທີ່ດິນປະເພດອື່ນ ແລະ ການບຸກລຸກທີ່ດິນປ່າໄມ້; ການ ອອກໃບຕາດິນກະສິກຳ ຕ້ອງມີຄວາມຊັດເຈນ, ຖືກຕ້ອງ ແລະ ຮັດກຸມ ແນໃສ່ການນໍາໃຊ້ທີ່ດິນກະສິກຳ ໃຫ້ເກີດປະໂຫຍດສູງສຸດ. ພ້ອມນີ້ ຍັງໄດ້ສະເໜີໃຫ້ອົງການກວດກາແຫ່ງລັດ ແລະ ອົງການກວດສອບແຫ່ງລັດ ເອົາໃຈໃສ່ສົມທົບກັບພາກສ່ວນທີ່ກ່ຽວຂ້ອງ ສືບຕໍ່ແກ້ໄຂ ຜົນການກວດສອບ ແລະ ກວດກາ ໃຫ້ມີຄວາມເຂັ້ມງວດຕາມກົດໝາຍ ເພື່ອເຮັດໃຫ້ການນໍາໃຊ້ຊັບສິນຂອງລັດ, ງົບປະມານຂອງລັດ ມີປະສິດທິຜົນ ເພື່ອເປັນກຳລັງແຮງ ແກ່ການພັດທະນາເສດຖະກິດ-ສັງຄົມ ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ເປັນຮູບປະທໍາຫລາຍຂຶ້ນ.
ກອງປະຊຸມ ຍັງໄດ້ສະເໜີໃຫ້ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ຄົ້ນຄວ້າປັບປຸງບັນດາກົດໝາຍ ທີ່ກ່ຽວຂ້ອງກັບການດໍາເນີນຄະດີ ດ້ວຍການຄົ້ນຄວ້າແບ່ງຂອບເຂດສິດ ແລະ ໜ້າທີ່ໃຫ້ຈະແຈ້ງ, ແກ້ໄຂບັນຫາການຊໍ້າຊ້ອນໜ້າທີ່ວຽກງານ; ເອົາໃຈໃສ່ສຶກອົບຮົມບຸກຄະລາກອນຂອງຕົນ ໃຫ້ມີຄວາມໜັກແໜ້ນເຂັ້ມແຂງທາງດ້ານການເມືອງ-ແນວຄິດ, ມີຈັນຍາບັນ, ຈັນຍາທໍາ ໃນການປະຕິບັດໜ້າທີ່ວຽກງານ ເພື່ອສ້າງຄວາມເຊື່ອໝັ້ນໃຫ້ປະຊາຊົນ ຕໍ່ການດໍາເນີນຄະດີຕາມຂະບວນການຍຸຕິທໍາ; ສະເໜີໃຫ້ສອງອົງການ ເອົາໃຈໃສ່ຍົກສູງຄວາມຮັບຜິດຊອບ ໃນການຮັບໃຊ້ປະຊາຊົນ, ສ້າງເງື່ອນໄຂໃຫ້ປະຊາຊົນ ໄດ້ເຂົ້າຮ່ວມໃນການດໍາເນີນຄະດີ, ນໍາສະເໜີຂໍ້ມູນຫລັກຖານ ຕາມກົດໝາຍກໍານົດ ແລະ ສ້າງເງື່ອນໄຂໃຫ້ປະຊາຊົນ ໄດ້ເຂົ້າເຖິງຂະບວນຍຸຕິທໍາຢ່າງທົ່ວເຖິງ ໂດຍສະເພາະ ປະຊາຊົນຢູ່ເຂດຫ່າງໄກສອກຫລີກ. ພ້ອມນີ້, ກອງປະຊຸມ ຍັງໄດ້ລົງຄະແນນສຽງຮັບຮອງ ເອົາການສະເໜີແຕ່ງຕັ້ງສະມາຊິກສະພາ ຜູ້ພິພາກສາຂອງສານປະຊາຊົນສູງສຸດ ຕາມການສະເໜີຂອງປະທານສານ ປະຊາຊົນສູງສຸດ ຈໍານວນ 2 ທ່ານ ເພື່ອຮັບປະກັນ ການປະຕິບັດໜ້າທີ່ວຽກງານ ໃຫ້ມີຄຸນນະພາບນັບມື້ສູງຂຶ້ນ.
ກອງປະຊຸມ ຍັງໄດ້ພິຈາລະນາ, ຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 9 ສະບັບ, ໃນນີ້, ມີກົດໝາຍ ສ້າງໃໝ່ 2 ສະບັບຄື: ກົດໝາຍ ວ່າດ້ວຍທີ່ຢູ່ອາໄສ; ກົດໝາຍ ວ່າດ້ວຍພັດທະນາສີມືແຮງງານ ແລະ ກົດໝາຍສະບັບປັບປຸງ 7 ສະບັບຄື: ກົດໝາຍ ວ່າດ້ວຍການກວດສອບອິດສະລະ; ກົດໝາຍ ວ່າດ້ວຍທະນາຄານ ແຫ່ງ ສປປ ລາວ; ກົດໝາຍ ວ່າດ້ວຍການສຶກສາ; ກົດໝາຍ ວ່າດ້ວຍການດຳເນີນຄະດີແພ່ງ; ກົດໝາຍ ວ່າດ້ວຍອົງການໄອຍະການປະຊາຊົນ; ກົດໝາຍ ວ່າດ້ວຍສະຫະພັນແມ່ຍິງລາວ; ກົດໝາຍ ວ່າດ້ວຍການພັດທະນາ ແລະ ປົກປ້ອງແມ່ຍິງ ດ້ວຍຄະແນນສຽງແຕ່ 90% ຂຶ້ນໄປ. ນອກຈາກນີ້, ກອງປະຊຸມ ໄດ້ພິຈາລະນາຮັບຮອງກົດໝາຍ ວ່າດ້ວຍການປັບປຸງມາດຕາ 18 ຂອງກົດໝາຍ ວ່າດ້ວຍການລົງທຶນຂອງລັດ ສະບັບປັບປຸງປີ 2015 ດ້ວຍຄະແນນສຽງສ່ວນຫລາຍ ທັງນີ້ກໍເພື່ອເພີ່ມຄວາມຮັບຜິດຊອບ ໃນການພິຈາລະນາຮັບຮອງງົບປະມານລົງທຶນຂອງລັດ ໃຫ້ແຂວງ ແລະ ນະຄອນຫລວງ ໃນຕົວເລກຄາດໝາຍທີ່ສູງຂຶ້ນຕື່ມ.
ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ເຂົ້າສູ່ວຽກງານຕົວຈິງ, ແມ່ນໝາກຜົນລວມສູນສະຕິປັນຍາ, ສິດປະຊາທິປະໄຕ ກໍຄືຜົນຂອງການຍົກສູງຄວາມຮັບຜິດ ຊອບທາງການເມືອງ ຂອງບັນດາສະມາຊິກສະພາແຫ່ງຊາດ, ການຕັດສິນໃຈສູງຂອງລັດຖະບານ, ອົງການລັດທີ່ກ່ຽວຂ້ອງ ທີ່ມີຄວາມພະຍາຍາມ ແລະ ມີມາດຕະການຕົວຈິງ ໃນການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ໃຫ້ຕົກໄປເທື່ອລະກ້າວ ເພື່ອສ້າງຄວາມເຊື່ອໝັ້ນຂອງປະຊາຊົນ ຕໍ່ການນໍາພາຂອງພັກ, ລັດຖະບານ ໃນພາລະກິດປົກປັກຮັກສາ ແລະ ພັດທະນາປະເທດຊາດ ໃຫ້ມີຄວາມໜັກແໜ້ນຂຶ້ນເລື້ອຍໆ.
ຂ່າວ: ທະນູທອງ, ພາບ: ຂັນໄຊ
