ສະໂມສອນ ບານເຕະ ປະສານໃຈ ເອັບຊີ ທີມອາວຸໂສ ອັນດັບຕົ້ນຂອງ ສປປ ລາວ ຍັງສາມາດຮັກສາມູນເຊື້ອຄອງອັບດັບໜຶ່ງ ໃນວົງການບານເຕະລະດັບສາຍອາວຸໂສ ຫຼ້າສຸດໄລ່ຖະຫຼົ່ມເອົາຊະນະ ສະໂມສອນ ເມືອງລາວ ເອັບຊີ ໄປແບບຂາດຮອຍ ໃນນັດຊີງຊະນະເລີດ ຄວ້າແຊ໋ມການແຂ່ງຂັນເຕະບານ ຮຸ່ນອາຍຸ 40 ປີຂຶ້ນໄປ ຫຼື ຢູ-40 ລາຍການ ເບ ສະຫວັນ ໂອເພັນ 2024 (Bay Savanh Open 2024) ໄປຄອງຢ່າງຍິ່ງໃຫຍ່.
ການແຂ່ງຂັນເຕະບານ ຮຸ່ນອາຍຸ 40 ປີຂຶ້ນໄປ ຫຼື ຢູ-40 ລາຍການ ເບ ສະຫວັນ ໂອເພັນ 2024 ຈັດຂຶ້ນ ເມື່ອວັນທີ 30 ພະຈິກ 2024 ທີ່ສະໜາມກິລາຫຍ້າທຽມ ເບ ສະຫວັນ ບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມ ແລະ ມອບລາງວັນ ໂດຍທ່ານ ບຸນມີ ຫຼ່ຽມໄຊຍະຈັກ ປະທານສະຫະພັນບານເຕະຄົນພິການຕາແຫ່ງຊາດລາວ, ຮອງປະທານສະຫະພັນບານເຕະ ນະຄອນຫຼວງວຽງຈັນ ທັງເປັນປະທານສະໂມສອນ ແລະ ສະໜາມບານເຕະ ຫຍ້າທຽມ ເບ ສະຫວັນ ແລະ ທ່ານ ບຸນມີ ໄຊຍະວົງ ຮອງປະທານສະຫະພັນບານເຕະຄົນພິການຕາແຫ່ງຊາດລາວ, ຄະນະບໍລິຫານງານສະຫະພັນບານເຕະ ນະຄອນຫຼວງວຽງຈັນ ທັງເປັນປະທານຈັດການແຂ່ງຂັນ ມີຕາງໜ້າຈາກຫຼາຍພາກສ່ວນ ຕະຫຼອດຄູຝຶກ ແລະ ນັກກິລາ ທັງອະດິດທີມຊາດ ແລະ ໃນອະດິດລີກແຕ່ລະສາຍເຂົ້າຮ່ວມ.
ການແຂ່ງຂັນລາຍການດັ່ງກ່າວ ຈັດຂຶ້ນ ກໍເພື່ອສ້າງຂະບວນການສະເຫຼີມສະຫຼອງວັນຊາດທີ 2 ທັນວາ ຄົບຮອບ 49 ປີ ພ້ອມທັງກະຕຸ້ນການທ່ອງທ່ຽວ ສປປ ລາວ ກໍຄື ນະຄອນຫຼວງວຽງຈັນ ໃຫ້ເປັນຂະບວນການຄືກຄື້ນ ແນໃສ່ສ້າງໂອກາດໃຫ້ນັກກິລາອະດິດທີມ ແລະ ອະດິດທີ່ເຄີຍເຄື່ອນໄຫວໃນລາວລີກ ຜ່ານມາ ໄດ້ມາພົບປະແລກປ່ຽນ ແລະ ເປັນແບບຢ່າງທີ່ດີໃຫ້ກຸ່ມເຍົາວະຊົນ ແລະ ໄວໜຸ່ມ ຫັນມາຫຼິ້ນກິລາເພື່ອຕ້ານປະກົດການຫຍໍ້ຕ່າງໆທີ່ເກີດຂຶ້ນໃນສັງຄົມປັດຈຸບັນ.
ລາຍການນີ້ ມີ 9 ສະໂມສອນເຂົ້າຮ່ວມຊີງໄຊ ແບ່ງອອກ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເລືອກເອົາທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ຜ່ານການແຂ່ງຂັນປາກົດວ່າ: ປະສານໃຈ ເອັຟຊີ ສ້າງຜົນງານຢ່າງໂດດເດັ່ນ ຊະນະ 2 ນັດ ແລະ ເສຍ 1 ນັດຜ່ານເຂົ້າຮອບ 4 ທີມໃນຖານະທີມແຊ໋ມກຸ່ມ A ໄປພົບກັບ ບໍລິຄໍາໄຊ ເອັບຊີ ຮອງແຊ໋ມກຸ່ມ B ແລະ ກໍເປັນໄປຕາມຄາດ ປະສານໃຈ ໄລ່ເອົາຊະນະໄປຂາດຮອຍ 3-0 ປະຕູ ກ່ອນໃນນັດຊີງຊະນະເລີດ ກໍໄລ່ຖະຫຼົ່ມເອົາຊະນະ ເມືອງລາວ ເອັບຊີ ຂາດຮອຍ 3-0 ປະຕູ ຄວ້າແຊ໋ມລາຍການດັ່ງກ່າວໄປຄອງ ພ້ອມທັງເງິນລາງວັນ 5 ລ້ານກີບ ນອກຈາກນັ້ນ ນັກກິລາຂອງ ປະສານໃຈ ກໍຍັງຄວ້າລາງວັນນັກກິລາດີເດັ່ນ ກໍຄື ໄພວັນ ຫຼວງລາດ ໄດ້ລາງວັນດາວຊັນໂວ ຍິງໄດ້ 6 ປະຕູ ສ່ວນ ໄກສອນ ສຸວັນນະສີ ກໍຄວ້າລາງວັນຜູ້ສາປະຕູດີເດັ່ນອີກດ້ວຍ. ຂະນະທີ່ ເມືອງລາວ ກໍຍັງໄດ້ຮັບລາງວັນເງິນສົດ 3 ລ້ານກີບ ແລະ ອັນດັບທີ 3 ຮ່ວມ ບໍລິຄຳໄຊ ເອັບຊີ ແລະ ວີໄອພີ ເມືອງຫາດ ກໍໄດ້ຮັບເງິນລາງວັນທີມລະ 1 ລ້ານກີບ.
ພາບ-ຂ່າວໂດຍ ສົງການ ພັນແພງດີ
