ໂດຍຕອບສະໜອງຕາມຄຳເຊື້ອເຊີນຂອງ ສົມເດັດ ມະຫາ ບໍວໍ ທິບໍດີ ຮຸນ ມາແນດ ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ໃນວັນທີ 4 ທັນວາ 2024 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ໄດ້ເດີນທາງຈາກສະໜາມບິນວັດໄຕ ນະຄອນຫລວງວຽງຈັນ ໄປຍັງ ນະຄອນຫລວງພະນົມເປັນ ເພື່ອດຳເນີນການຢ້ຽມຢາມ ຣາຊະອານາຈັກ ກຳປູເຈຍ ຢ່າງເປັນທາງການ ແຕ່ວັນທີ 4-5 ທັນວາ 2024 ໂດຍການຕ້ອນຮັບຂອງ ທ່ານ ແກ້ວ ຣົດຕະນາກ (Keo Rottanak) ລັດຖະມົນຕີກະຊວງພະລັງງານ ແລະ ບໍ່ແຮ່ (ລັດຖະມົນຕີກຽດຕິຍົດ) ພ້ອມດ້ວຍຄະນະຕ້ອນຮັບຈາກຝ່າຍກຳປູເຈຍ ແລະ ຝ່າຍລາວ.
ການຢ້ຽມຢາມຄັ້ງນີ້, ເພື່ອສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີອັນເປັນມູນເຊື້ອທີ່ມີມາແຕ່ດົນນານ ແລະ ການເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ລາວ ແລະ ກຳປູເຈຍ ໃຫ້ເລິກເຊິ່ງກວ່າເກົ່າ.
ພາຍຫລັງສຳເລັດພິທີຕ້ອນຮັບທີ່ສະໜາມບິນ, ຄະນະຜູ້ແທນຂັ້ນສູງຂອງ ສປປ ລາວ ກໍໄດ້ເດີນ ທາງໄປເຂົ້າຮ່ວມພິທີວາງພວງມາລາ ຢູ່ ອານຸສາວະລີ ເອກະລາດ ແລະ ອານຸສາວະລີ ພະບາດສົມເດັດ ໂນໂຣດົມ ສີຫານຸ ເພື່ອສະແດງເຖິງຄວາມເຄົາລົບຮັກ, ຄຸນງາມຄວາມດີ, ນ້ຳໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນຂອງບັນພະບູລຸດກຳປູເຈຍ ກໍຄື ບັນດານັກຮົບປະຕິວັດຂອງຊາດ ທີ່ເສຍສະຫລະຊີວິດເລືອດເນື້ອເພື່ອພາລະກິດປະຕິວັດຊາດຢ່າງອົງອາດກ້າຫານໃນອະດີດ.
ໃນການຢ້ຽມຢາມຄັ້ງນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ພ້ອມດ້ວຍຄະນະຜູ້ແທນຂັ້ນສູງ ຈະພົບປະສອງຝ່າຍກັບ ສົມເດັດ ມະຫາ ບໍວໍ ທິບໍດີ ຮຸນ ມາແນດ ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ. ພ້ອມນັ້ນ, ກໍຈະເຂົ້າຢ້ຽມຂ່ຳນັບບັນດາການນຳຂັ້ນສູງຂອງ ຣາຊາອານາຈັກ ກຳປູເຈຍ ເປັນຕົ້ນ ພະບາດສົມເດັດ ພະບໍຮົມມະນຽດ ໂນໂຣດົມ ສີຫາມຸນີ ພະມາຫາກະສັດ ແຫ່ງ ຣາຊະອານາຈັກ ກຳປູເຈຍ, ສົມເດັດ ມະຫາ ຣັດສະເພຍທິກາ ທິບໍດີ ຄຸນ ສຸດາຣີ ປະທານສະພາແຫ່ງຊາດ ແຫ່ງ ຣາຊະອານາຈັກ ກຳປູເຈຍ ແລະ ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ເຊນ ປະທານສະພາສູງ ແຫ່ງ ຣາຊະອານາຈັກ ກໍາປູເຈຍ. ນອກຈາກນີ້, ຄະນະຜູ້ແທນຂັ້ນສູງຂອງ ສປປ ລາວ ຍັງຈະໄດ້ໄປຢ້ຽມຢາມເຂດເສດຖະກິດພິເສດພະນົມເປັນ ແລະ ສືບຕໍ່ເຂົ້າຮ່ວມເປັນແຂກກິດຕິມະສັກ ກອງປະຊຸມພາກທຸລະກິດ ກໍາປູເຈຍ-ລາວ (Cambodia-Laos Business Forum).
ຂ່າວ-ພາບ: ກົມການຂ່າວ, ກະຊວງການຕ່າງປະເທດ
