– ບັນດາທ່ານ ຄະນະນຳສູນກາງພັກ, ລັດຖະບານ ທີ່ເຄົ່າລົບ ແລະ ນັບຖື !.
– ບັນດາທ່ານ ຄະນະກໍາມະການອະໄພຍະໂທດ ລະດັບຊາດ, ຄະນະກໍາມະການອະໄພຍະໂທດ ຂັ້ນກະຊວງ, ແຂວງ, ນະຄອນຫລວງ ຕະຫລອດຮອດພໍ່ແມ່ປະຊາຊົນລາວ ບັນດາເຜົ່າ ທີ່ນັບຖື ແລະ ຮັກແພງ !.
ໃນທ່າມກາງບັນຍາກາດ ທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ປະຊາຊົນລາວບັນດາເຜົ່າ ພວມສຸມໃສ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 11 ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ໄລຍະທ້າຍສະໄໝ ທັງຕິດພັນການສືບຕໍ່ຈັດຕັ້ງປະຕິບັດ 2 ວາລະແຫ່ງຊາດຄື: ວາລະແຫ່ງຊາດ ວ່າ ດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ທັງຍູ້ແຮງຂະບວນການສ້າງຜົນງານດ້ານຕ່າງໆ ເພື່ອຂໍ່ານັບຮັບຕ້ອນວັນປະຫວັດສາດສຳຄັນຂອງພັກ, ຂອງ ຊາດ ກໍຄື ການດຳເນີນກອງປະຊຸມໃຫຍ່ 3 ຂັ້ນຂອງພັກ ຢ່າງກວ້າງຂວາງ ໃນທົ່ວສັງຄົມ.
ມື້ນີ້, ຂ້າພະເຈົ້າ ຮູ້ສຶກເປັນກຽດ ທີ່ໄດ້ຖະແຫລງການ ກ່ຽວກັບການໃຫ້ອະໄພຍະໂທດ ປະຈໍາປີ 2024 ແລະ ໃນນາມປະທານຄະນະກໍາມະການອະໄພຍະໂທດ ລະດັບຊາດ ຂໍສະແດງຄວາມຊົມເຊີຍ ມາຍັງບັນດາສະຫາຍ ໃນຄະນະກໍາມະການອະໄພຍະໂທດ ແຕ່ສູນກາງຮອດທ້ອງຖິ່ນ ແລະ ຜູ້ທີ່ມີສ່ວນຮ່ວມ ໂດຍສະເພາະ ບັນດາສະ ຫາຍ ທີ່ປະຕິບັດໜ້າທີ່ໃນຂົງເຂດປົກປ້ອງກົດໝາຍ, ຂົງເຂດຕຸລາການ, ຂົງເຂດຍຸຕິທໍາ ທີ່ມີຄວາມຮັບຜິດຊອບ ໂດຍກົງຕໍ່ວຽກງານນີ້.
– ບັນດາທ່ານ ທີ່ມີກຽດ, ປະຊາຊົນລາວບັນດາເຜົ່າ ທີ່ນັບຖື ແລະ ຮັກແພງ !.
ວຽກງານອະໄພຍະໂທດ ເປັນວຽກງານໜຶ່ງທີ່ສໍາຄັນ ຊຶ່ງສະແດງໃຫ້ເຫັນແນວທາງນະໂຍບາຍອັນຖືກຕ້ອງ, ເປັນທໍາຂອງພັກ, ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອໃຫ້ຜູ້ທີ່ຫລົງຜິດ ໄດ້ກໍ່ສ້າງຕົນເອງ ໃຫ້ກາຍເປັນພົນລະເມືອງດີຂອງຊາດ ແນໃສ່ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນ ລະບຽບຮຽບຮ້ອຍ, ສ້າງເງື່ອນໄຂໃຫ້ມີການປະກອບສ່ວນເຂົ້າໃນການປົກປັກຮັກສາ, ພັດທະນາປະເທດຊາດ ໃຫ້ມີ ຄວາມມັ່ງຄັ່ງ, ເຂັ້ມແຂງ, ປະຊາຊົນຮັ່ງມີ, ສັງຄົມສີວິໄລ ແລະ ຍຸຕິທໍາ.
ອີງຕາມລັດຖະທໍາມະນູນ, ກົດໝາຍ ແລະ ລັດຖະບັນຍັດຂອງປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ວ່າດ້ວຍການໃຫ້ອະໄພຍະໂທດ ສະບັບເລກທີ 001/ປປທ, ລົງວັນທີ 20 ມີນາ 2018 ແລະ ເພື່ອປະຕິບັດແນວທາງນະໂຍບາຍມະນຸດສະທໍານັ້ນ, ໃນແຕ່ລະປີ ລັດຖະບານ ໄດ້ມີການຄົ້ນຄວ້າ, ນຳສະເໜີອະໄພຍະໂທດ, ຜ່ອນໂທດ ໃຫ້ແກ່ນັກໂທດທີ່ເປັນຄົນລາວ ແລະ ນັກໂທດທີ່ເປັນຄົນຕ່າງປະເທດ ທີ່ມີ ການປະພຶດດີ, ມີຄວາມກ້າວໜ້າ, ຮູ້ສຶກກິນແໜງແຄງໃຈຕໍ່ການກະທໍາຜິດ, ໄດ້ຕັ້ງໜ້າຝຶກຝົນຫລໍ່ຫລອມຕົນເອງ ຕະຫລອດໄລຍະເວລາປະຕິບັດໂທດ ແລະ ດ້ວຍແນວທາງນະໂຍບາຍດ້ານມະນຸດສະທໍາດັ່ງກ່າວ ແມ່ນໄດ້ຈັດຕັ້ງປະ ຕິບັດຜ່ານມາຫລາຍປີ ໂດຍແມ່ນຄະນະກໍາມະການອະໄພຍະໂທດ ຢູ່ແຕ່ລະຂັ້ນ ເປັນຜູ້ຄົ້ນຄ້ວາ, ນຳສະເໜີ ຕາມຂັ້ນ ຕອນ ແລະ ລະບຽບການ ທີ່ໄດ້ກໍານົດໄວ້.
ປີ 2024 ນີ້, ເປັນອີກປີໜຶ່ງ ທີ່ປະເທດເຮົາ ໄດ້ປະສົບກັບບັນຫາໄພທໍາມະຊາດ ທີ່ເກີດຂຶ້ນຢູ່ຫລາຍທ້ອງ ຖິ່ນ ຊຶ່ງເຮັດໃຫ້ເກີດມີຄວາມເສຍຫາຍຫລາຍພໍສົມຄວນ; ນອກນີ້ ພວກເຮົາ ຍັງມີຄວາມຫຍຸ້ງຍາກທາງດ້ານເສດ ຖະກິດ, ເຮັດໃຫ້ຄ່າຄອງຊີບສູງຂຶ້ນ ເຊິ່ງສົ່ງຜົນກະທົບບໍ່ນ້ອຍຕໍ່ການຜະລິດ, ການດຳລົງຊີວິດຂອງພະນັກງານ, ລັດ ຖະກອນ ແລະ ປະຊາຊົນລາວບັນດາເຜົາ. ແຕ່ເຖິງຢ່າງໃດກໍຕາມ ດ້ວຍຄວາມເອົາໃຈໃສ່ຊີ້ນໍາຈາກສູນກາງພັກ, ລັດຖະບານ ເຮັດໃຫ້ບັນຫາດັ່ງກ່າວໄດ້ຮັບການແກ້ໄຂຢ່າງຕັ້ງໜ້າ ແລະ ບັນດາວຽກປິ່ນອ້ອມຂອງ ລັດຖະບານ ໂດຍ ສະເພາະ ການຄົ້ນຄວ້າອະໄພຍະໂທດ ຂອງຄະນະກຳມະການພວກເຮົາ, ບັນດາສະຫາຍ ແມ່ນໄດ້ມີຄວາມພະຍາມ ຢ່າງຕັ້ງໜ້າ ທັງມີຄວາມຮັບຜິດຊອບສູງ ໃນການປະຕິບັດໜ້າທີ່ຕາມພາລະບົດບາດ ຈຶ່ງເຮັດໃຫ້ວຽກງານນີ້ມີຜົນສໍາ ເລັດ.
ໃນໂອກາດນີ້, ຂ້າພະເຈົ້າ ຂໍແຈ້ງມາຍັງບັນດາທ່ານ ແລະ ພໍ່ແມ່ປະຊາຊົນບັນດາເຜົ່າ ທົ່ວປະເທດ ຊາບວ່າ:
ເນື່ອງໃນໂອກາດວັນສະຖາປານາ ສາທາລະນະລັດ ປະຊາຊາທິປະໄຕ ປະຊາຊົນລາວ ວັນທີ 2 ທັນວາ 2024 ຄົບຮອບ 49 ປີນີ້. ຜ່ານການກວດກາ, ຄົ້ນຄ້ວາຢ່າງລະອຽດ, ຄົບຖ້ວນ, ຮອບດ້ານ ແລະ ພາວະວິໄສ ຂອງລະບົບ ຍຸຕິທໍາ, ລັດຖະບານ ໄດ້ສະເໜີ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ອອກລັດ ຖະດໍາລັດ ວ່າດ້ວຍການໃຫ້ອະໄພຍະໂທດ ແກ່ນັກໂທດ ສະບັບເລກທີ 248/ປປທ, ລົງວັນທີ 26 ພະຈິກ 2024 ເຊິ່ງໄດ້ຕົກລົງໃຫ້ອະໄພຍະໂທດ ແກ່ນັກໂທດ ທັງໝົດ 2.716 ຄົນ, ຍິງ 357 ຄົນ; ຕ່າງປະເທດ 26 ຄົນ, ຍິງ 04 ຄົນ. ໃນນີ້, ໃຫ້ອະໄພຍະໂທດ ດ້ວຍການຫລຸດຜ່ອນໂທດ ຈໍານວນ 2.339 ຄົນ, ຍິງ 294 ຄົນ, ຄົນຕ່າງປະເທດ 19 ຄົນ, ຍິງ 04 ຄົນ; ອະໄພຍະໂທດ ດ້ວຍການປ່ອຍຕົວ ຈໍານວນ 377 ຄົນ, ຍິງ 63 ຄົນ, ຄົນຕ່າງປະ ເທດ 07 ຄົນ.
ປັດຈຸບັນນີ້, ກອງເລຂາຄະນະກໍາມະການອະໄພຍະໂທດ ລະດັບຊາດ ກໍໄດ້ກະກຽມບັນດາເອກະສານ ເພື່ອ ຈັດສົ່ງໃຫ້ບັນດາຄະນະກໍາມະການອະໄພຍະໂທດ ລະດັບກະຊວງ, ແຂວງ, ນະຄອນຫລວງວຽງຈັນ ເພື່ອພ້ອມກັນ ຈັດຕັ້ງປະຕິບັດ ໃຫ້ສໍາເລັດຕາມແຜນການທີ່ວາງໄວ້.
ຂ້າພະເຈົ້າ, ໃນນາມປະທານ ຄະນະກໍາມະການອະໄພຍະໂທດ ລະດັບຊາດ, ຈຶ່ງຂໍແຈ້ງມາຍັງບັນດາທ່ານ, ປະຊາຊົນລາວບັນດາເຜົ່າ ເພື່ອຊາບກ່ຽວກັບການອະໄພຍະໂທດ ຕໍ່ນັກໂທດພາຍໃນ ແລະ ນັກໂທດທີ່ເປັນຄົນຕ່າງ ປະເທດ ປະຈຳປີ 2024 ແລະ ຂໍຖືໂອກາດນີ້ ສະແດງຄວາມຂອບໃຈມາຍັງບັນດາສະຫາຍ ຄະນະນໍາສູນກາງພັກ ແລະ ລັດຖະບານ, ບັນດາສະຫາຍຄະນະກໍາມະການອະໄພຍະໂທດ, ອົງການປົກຄອງທ້ອງຖິ່ນ ທີ່ໄດ້ສະໜັບສະ ໜູນການ ເຄື່ອນໄຫວວຽກງານຂອງຄະນະກໍາມະການອະໄພຍະໂທດ ແຕ່ລະຂັ້ນ ໄດ້ປະຕິບັດສໍາເລັດໜ້າທີ່ເປັນຢ່າງດີ.
