ສະຫາຍ ບຸນເຫຼືອ ສິນໄຊວໍຣະວົງ ຮອງເລຂາພັກແຂວງ ຮອງເຈົ້າແຂວງຫຼວງພະບາງ ພ້ອມດ້ວຍການນໍາຂອງແຂວງຫຼວງພະບາງ ໄດ້ເຂົ້າຢ້ຽມຂໍ່ານັບ ສະຫາຍ ຫງວຽນ ຊວນ ຖັງ ກຳມະການກົມການເມືອງສູນກາງພັກກອມມູນິດຫວຽດນາມ ປະທານສະພາທິດສະດີສູນກາງພັກ ຫົວໜ້າສະຖາບັນການ ເມືອງແຫ່ງຊາດ ໂຮ່ຈິມິນ ໃນຕອນບ່າວຍວັນທີ 27 ພະຈິກນີ້ ທີ່ນະຄອນ-ຫຼວງພະບາງ ໃນໂອກາດທີ່ຄະນະຜູ້ແທນຂອງສະພາທິດສະດີສູນກາງພັກກອມມູນິດຫວຽດນາມ ເດີນທາງມາແຂວງຫຼວງພະບາງ ເພື່ອຢ້ຽມ ຢາມ ແລະ ເຂົ້າຮ່ວມກອງປະຊຸມສຳມະນາທິດສະດີສອງພັກ ລາວ-ຫວຽດນາມ ຄັ້ງທີ XI ທີ່ຈະຈັດຂຶ້ນໃນວັນທີ 28 ພະຈິກ 2024 ນີ້.
ໂອກາດນີ້, ສະຫາຍ ບຸນເຫຼືອ ສິນໄຊວໍຣະວົງ ກໍໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ສະຫາຍ ຫງວຽນ ຊວນ ຖັງ ທີ່ໄດ້ນໍາພາຄະນະມາຢ້ຽມຢາມ ແລະ ເຮັດວຽກຢູ່ແຂວງຫຼວງພະບາງ ພ້ອມທັງສະແດງຄວາມຂອບໃຈທີ່ການນໍາຝ່າຍລາວ ເລືອກແຂວງຫຼວງພະບາງເປັນບ່ອນຈັດກອງປະຊຸມດັ່ງກ່າວທີ່ມີຄວາມໝາຍສຳຄັນຍິ່ງ ລະຫວ່າງ ສອງພັກຂອງພວກເຮົາ. ພ້ອມດຽວກັນນີ້, ກໍໄດ້ລາຍງານຈຸດພິເສດຂອງແຂວງຫຼວງພະບາງ ໂດຍສັງເຂບໃຫ້ຊາບ ຊຶ່ງແຂວງຫຼວງພະບາງມີຊາຍແດນຕິດກັບ 2 ແຂວງຂອງ ສສ ຫວຽດນາມ ກໍຄືແຂວງດຽນບຽນ ແລະ ແຂວງເຊີນລາ ແລະ ຍັງມີສະຖານກົງສູນໃຫຍ່ ສສ ຫວຽດນາມ ຕັ້ງຢູ່ແຂວງນີ້. ແຂວງຫຼວງພະບາງ ໄດ້ມີການພົວພັນຮ່ວມມື ກັບບັນດາເມືອງ, ນະຄອນ ຂອງ ສສ ຫວຽດນາມ; ນັບແຕ່ມີກົງສູນໃຫຍ່ ສສ ຫວຽດນາມ ປະຈໍາພາກເໜືອຂອງລາວ ມາຕັ້ງຢູ່ແຂວງຫຼວງພະບາງ ຍິ່ງເຮັດໃຫ້ການພົວພັນຮ່ວມມື ລະຫວ່າງແຂວງຫຼວງພະບາງ ກັບບັນດາແຂວງ, ນະຄອນ ຂອງ ສສ ຫວຽດນາມ ນັບມື້ນັບສະດວກ ແລະ ມີໝາກຜົນດີຍິ່ງໆຂຶ້ນ. ພິເສດ, ແຂວງຫຼວງພະບາງ ໄດ້ຮັບການຊ່ວຍເຫຼືອຈາກລັດຖະບານ ແລະ ບັນດາແຂວງ, ນະຄອນ ຂອງ ສສ ຫວຽດນາມ ໃນການກໍ່ສ້າງພື້ນຖານໂຄງລ່າງ ແລະ ຍັງໄດ້ສົມທົບກັບການນໍາແຂວງດຽນບຽນ, ເຊີນລາ ເພື່ອບູລະນະຫຼັກໝາຍຊາຍແດນ ເລກທີ 145 ແລະ 147 ລາວ-ຫວຽດນາມ ຂອບເຂດຊາຍແດນແຂວງຫຼວງພະບາງ – ແຂວງດຽນບຽນ – ແຂວງເຊີນລາ ແລະ ສົມທົບກັບແຂວງດຽນບຽນ ໄປກວດການກໍ່ສ້າງຕ້ານເຈື່ອນຫຼັກໝາຍຊາຍແດນເລກທີ 130. ໃນແຕ່ລະປີ ກໍໄດ້ຮັບເອົານັກສຶກສາ, ພະນັກງານ-ລັດຖະກອນ ແລະ ນັກຮຽນລາວ ໄປຮຽນວິຊາສະເພາະ, ໄປຍົກລະດັບທາງດ້ານທິດສະດີ ຢູ່ ສສ ຫວຽດນາມ ເປັນຈໍານວນບໍ່ໜ້ອຍ ຊຶ່ງເປັນກຳລັງແຮງໃນການພັດທະນາແຂວງຫຼວງພະບາງໃຫ້ກ້າວຂຶ້ນ.
ສະຫາຍ ຫງວຽນ ຊວນ ຖັງ ກໍໄດ້ມີຄໍາເຫັນອັນຈົບງາມ ໂດຍກ່ອນອື່ນກໍໄດ້ກ່າວຂອບໃຈຕໍ່ກົມການເມືອງສູນກາງພັກປະຊາຊົນ ປະຕິວັດລາວ ແລະ ບັນດາພາກສ່ວນກ່ຽວຂ້ອງ ທີ່ໄດ້ເອົາໃຈໃສ່ໃນການກະກຽມ ແລະ ຈັດກອງປະຊຸມສຳມະນາສະພາທິດສະດີສອງພັກ ລາວ-ຫວຽດນາມ ຄັ້ງທີ XI ທີ່ເປັນກອງປະຊຸມທີ່ສຳຄັນ ແລະ ໄດ້ເລືອກເອົາແຂວງຫຼວງພະບາງເປັນສະຖານທີ່ຈັດກອງປະຊຸມ ອັນໄດ້ສ້າງໂອກາດໃຫ້ຕົນເອງ ກັບຄືນມາຢ້ຽມຢາມແຂວງຫຼວງພະບາງອີກຄັ້ງ 1 ໃນຮອບ 10 ປີ; ຜ່ານການລາຍງານຂອງ ສະຫາຍ ບຸນເຫຼືອ ສິນໄຊວໍຣະວົງ ກໍຮັບຮູ້ໄດ້ເຖິງສະພາບການພັດທະນາເສດຖະກິດ-ສັງຄົມຂອງແຂວງ ໂດຍເຫັນໄດ້ຈະແຈ້ງກ່ຽວກັບທ່າແຮງໃນການພັດທະນາ ໂດຍສະເພາະແມ່ນດ້ານການທ່ອງທ່ຽວ ແຂວງທີ່ເປັນມໍລະດົກໂລກ, ທ່າແຮງດ້ານຄົມມະນາຄົມຂົນສົ່ງ, ທ່າແຮງດ້ານກະສິກຳ ແລະ ທ່າແຮງອື່ນໆ. ບົນພື້ນຖານທ່າແຮງນັ້ນ, ແຂວງຫຼວງພະບາງ ຍັງຈະສາມາດຂຸດຄົ້ນໄດ້ທ່າແຮງບົ່ມຊ້ອນຕື່ມອີກ ເປັນຕົ້ນທ່າ ແຮງດ້ານການຜະລິດທີ່ຕິດພັນກັບການບໍລິການການທ່ອງທ່ຽວ ທີ່ມີລັກສະນະຫຼາກຫຼາຍ ແລະ ທ່າແຮງ ອື່ນໆອີກ ເພື່ອເພີ່ມຕື່ມກຳລັງແຮງໃນການພັດທະນາຂອງແຂວງຫຼວງພະບາງ ໃຫ້ໄດ້ດີຂຶ້ນກວ່າເກົ່າອີກ.
ໃນຕອນທ້າຍ, ສະຫາຍ ບຸນເຫຼືອ ສິນໄຊວໍຣະວົງ ກໍໄດ້ສະແດງຄວາມຂອບໃຈ ຕໍ່ສະຫາຍ ຫງວຽນ ຊວນ ຖັງ ພ້ອມຄະນະທີ່ໄດ້ສະຫຼະເວລາໃຫ້ເຂົ້າຢ້ຽມຂໍ່ານັບ ແລະ ແລກປ່ຽນບົດຮຽນທີ່ດີ ແກ່ການພັດທະ ນາແຂວງຫຼວງພະບາງ; ພ້ອມດຽວກັນ, ກໍອວຍພອນໃຫ້ສະຫາຍ ພ້ອມດ້ວຍຄະນະຜູ້ແທນສະພາທິດສະດີສູນກາງພັກກອມມູນິດຫວຽດນາມ ຈົ່ງປະສົບຜົນສຳເລັດໃນການມາຢ້ຽມຢາມ ແລະ ເຮັດວຽກໃນຄັ້ງນີ້.
(ຂ່າວ-ພາບ: ສຸກສະຫວັນ)
