ກອງປະຊຸມສຳມະນາ ກ່ຽວກັບຄວາມຮູ້ພື້ນຖານການຫັນເປັນດິຈິຕອນ ໃຫ້ແກ່ພະນັກງານພະແນກການ ແລະ ຂະແໜງການຕ່າງໆ ພາຍໃນແຂວງຄຳມ່ວນ ຈັດຂຶ້ນໃນວັນທີ 26 ພະຈິກ 2024, ທີ່ຫ້ອງປະຊຸມ ເຮືອນຮັບແຂກເລກ 1 ຂອງແຂວງ, ໂດຍໃຫ້ກຽດເປັນປະທານຮ່ວມຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ມີບັນດາພະແນກການ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມສໍາມະນາດັ່ງກ່າວຈະໄດ້ດໍາເນີນໄປເປັນເວລາ 3 ວັນ, ນັບແຕ່ວັນທີ 26-28 ພະຈິກ 2024 ຈິ່ງຈະສໍາເລັດ, ຈຸດປະສົງຂອງກອງປະຊຸມ ແມ່ນເພື່ອເປັນການຍົກລະດັບ ຄວາມຮັບຮູ້-ຄວາມເຂົ້າໃຈທາງດ້ານການຫັນເປັນດິຈິຕອນ, ພ້ອມທັງ ແນະນຳການນຳໃຊ້ເຄື່ອງມືດິຈິຕອນ, ໃນການສ້າງ ແລະ ບໍໍລິຫານຈັດການ ຂໍ້ມູນດິຈິຕອນ, ຄວາມປອດໄພທາງດ້ານໄຊເບີ, ແຜນການພັດທະນາບຸກຄະລາກອນ ເພື່ອກຽມຄວາມພ້ອມ ຂອງໄລຍະການພັດທະນາໃນຍຸກດິຈິຕອນສ້າງຄວາມເຂັ້ມແຂງໃຫ້ກັບບັນດາພະແນກການ ແລະ ຂະແໜງການຕ່າງໆ ພາຍໃນແຂວງ ໃນວຽກງານການບໍລິຫານ ແລະ ການບໍລິການລັດດິຈິຕອນ ພ້ອມທັງເປັນການຜັນຂະຫຍາຍ ຍຸດທະສາດການຫັນເປັນດິຈິຕອນ, ການພັດທະນາຊັບພະຍາກອນມະນຸດດ້ານດິຈິຕອນ, ບັນດານິຕິກຳກ່ຽວກັບການຫັນເປັນດິຈິຕອນ ຂອງ ສປປ ລາວ. ເຊິ່ງກອງປະຊຸມແມ່ນໄດ້ຮັບຟັງການສະເໜີກ່ຽວກັບດໍາລັດ ວ່າດ້ວຍກອງທຶນພັດທະນາໂທລະຄົມມະນາຄົມ ແລະ ການຫັນເປັນດິຈີຕອນ, ການປະຕິວັດອຸດສາຫະກໍາ 4.0, ເຕັກໂນໂລຊີ ແລະ ນະວັດຕະກໍາ, ອິນເຕີເນັດ-ສື່ສັງຄົມອອນລາຍ ແລະ ຫົວຂໍ້ອື່ນໆ ທີ່ກ່ຽວຂ້ອງອີກຈໍານວນໜຶ່ງ
ໂອກາດນີ້ ທ່ານ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານເຈົ້າແຂວງແຂວງຄໍາມ່ວນ ຍັງໄດ້ກ່າວມີຄໍາເຫັນ ແລະ ຮຽກຮ້ອງມາຍັງບັນດາຜູ້ເຂົ້າຮ່ວມ ໃຫ້ຫັນເປັນດິຈິຕອນໃນທຸກຂະແໜງການ, ທຸກພາກສ່ວນຕ້ອງຮ່ວມແຮງຮ່ວມໃຈພ້ອມກັນຫັນເປັນດິຈິຕອນໃຫ້ປະສົບຜົນສໍາເລັດ. ຄຽງຄູກັນນັ້ນ, ກໍ່ເພື່ອເປັນການເສີມຂະຫຍາຍການຫັນເປັນດິຈິຕອນໃນຂັ້ນພື້ນຖານ ໃຫ້ສາມາດເຕີບໃຫຍ່ຂະຫຍາຍຕົວຢ່າງໜັກແໜ້ນ ແລະ ສາມາດໃຫ້ທົ່ວເຖີງໃນຂອບເຂດທົ່ວປະເທດ, ໂດຍສະເພາະການພັດທະນາການນຳໃຊ້ເຕັກໂນໂລຊີດິຈິຕອນ ຢູ່ຂັ້ນສູນກາງຈົນຮອດທ້ອງຖິ່ນ ໃຫ້ສາມາດຕອບສະໜອງຄວາມຮຽກຮ້ອງຕ້ອງການຂອງສັງຄົມ ແລະ ປະຊາຊົນ ໃຫ້ມີຄວາມສະດວກ, ປອດໄພ ແລະ ຖືກຕ້ອງລະບຽບກົດໝາຍ. ພວກເຮົາຈະຕ້ອງຕັດສິນໃຈ ຫັນປ່ຽນບຸກທະລຸດ້ານຈິນຕະນາການ ແລະ ແບບແຜນວິທີເຮັດວຽກແບບທັນສະໄໝ ແນ່ໃສ່ຊຸກຍູ້ໃຫ້ເສດຖະກິດມີທາງອ່ຽງ ໃນການພັດທະນາຢ່າງຕໍ່ເນື່ອງ ລວມໄປເຖິງການນຳໃຊ້ເຕັກໂນໂລຊີດິຈິຕອນ ເຂົ້າໃນການຜະລິດ, ການບໍລິການ ເພື່ອສ້າງພື້ນຖານໂຄງລ່າງຂອງການພັດທະນາເສດຖະກິດໃຫ້ໝັ້ນຄົງ. ຊຸກຍູ້ສົ່ງເສີມການຫັນເປັນທັນສະໄໝ ເຂົ້າໃນການຄຸ້ມຄອງລັດ, ເປັນເຄື່ອງມືໃນການຊຸກຍູ້, ເພື່ອກຽມຄວາມພ້ອມຕໍ່ການພັດທະນາໃນຍຸກດິຈິຕອນ ແລະ ເພື່ອສ້າງຄວາມເຂັ້ມແຂງໃຫ້ກັບບັນດາ ພະແນກການ, ຂະແໜງການຕ່າງໆ ພາຍໃນແຂວງ ໃນວຽກງານການບໍລິຫານ ແລະ ບໍລິການລັດໃນການຫັນເປັນທັນສະໄໝໃຫ້ທົ່ວເຖິງຢ່າງມີປະສິດທິພາບ ປະສິດທິຜົນ.
ໃນໂອກາດດັ່ງກ່າວນີ້ ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ຍັງໄດ້ມອບອຸປະກອນຄອມພິວເຕີ ແລະ ປື້ມຄູ່ມືຄວາມຮູ້ພື້ນຖານການຫັນເປັນດິຈິຕອນ ລວມມູນຄ່າ 58 ລ້ານກີບ, ໃຫ້ ພະແນກ ຕສ ແຂວງຄໍາມ່ວນ.
